Read DIOSPA QHELQACHISQ Quechua FILIPENSES 2 Bible Online

FILIPENSES 2 - DIOSPA QHELQACHISQ Quechua bible

FILIPENSES 2

¹Cristochus kallpachashasunkichis, munakuyninchus sonqochashasunkichis, Santo Espirituchus yanapashasunkichis, llamp'u sonqoyoq khuyapayakuqchus kashankichispas

²chayqa, anchatan kusichiwankichis, huk sonqolla llapa kawsaspaykichis, huk-nisqalla munanakuspaykichis, kaq yuyaynillayoq huk sonqollataq kaspaykichis ima.

³Ama imatapas ruwaychischu allinnillaykichista maskhaspapas hatunchakuspapas, aswanpas huch'uyyaykukuspa hukkunata aswan allinpaq hap'iychis kikiykichismantaqa.

⁴Ama pipas pay kikinpa allinnillantaqa maskhachunchu, aswanpas hukkunaq allinnintapas maskhallachuntaq.

⁵Imaynachus Jesucristoq yuyaynin karqan, chay hinallataq qankunaq yuyayniykichispas kachun:

⁶Cristoqa Diospuni kashaspapas, manan Dios-kayninman hap'ipakurqanchu,

⁷aswanmi qhapaq-atiyninta saqespa, runa hina nacerqan kamachi runa hina kananpaq.

⁸Runa kaspanmi pay kikin huch'uyyaykukurqan, Diosta kasukuq kaspanmi wañurqan, cruzpi wañuytapas mana p'enqakuspa.

⁹Chayraykun Diospas paytaqa anchatapuni hatunchaykurqan, hinaspan payman sutita churarqan lliw sutimantapas qollana kaqtapuni.

¹⁰Chay hinapin Jesuspa sutinpi llapalla qonqorikunqaku, hanaq pachapi kaqkunapas, kay pachapi kaqkunapas, Ukhu-pachapi kaqkunapas,

¹¹Jesucristopuni Señorqa kasqantan llapalla sut'ita rimarinqaku, Dios Yaya hatunchasqa kananpaq.

¹²Chay hinaqa, munasqa wawqe-panaykuna, imaynan qankunawan kashaqtiypas kasuwarqankichispuni, chay hinallataq kunan qankunamanta karupiña kashaqtiypas kasullawaychispuni. Hinaspa Diospaq tukuy sonqo llank'aychis manchakuywan khatatataywan, qespisqa kasqaykichispi wiñanaykichispaq,

¹³paymi allin munayninman hina allinkaq ruwayta munachisunkichis hinaspa ruwachisunkichis.

¹⁴Tukuy imatapas ruwaychis ama chhuchupakuspa ama churanakuspa.

¹⁵Ahinapin qankunaqa kay q'ewisqa waqllisqa miray ukhupi tiyaspa, mana huchachana kankichis, hinallataq Diospa wawankuna hinapuni ch'uya sonqo mana huchachana kankichis. Qankunaqa kay tutayaq pachata k'anchaq ch'askakuna hinan k'anchashankichis,

¹⁶Diospa kawsachiq siminta paykunaman willaspaykichis. Ahinapin ñoqapas Cristoq hamunan p'unchaypi alabakusaq mana yanqapaq kallpayta usuchisqaymanta, mana yanqapaq llank'asqaymantawan.

¹⁷Diospi iñispan qankunaqa llank'asqaykichista Diosman sacrificiota hina haywankichis. Ichapaschá wañuchisqa kaspay, sacrificioykichis pataman vino hich'ana ofrenda hina hich'asqa kayman. Chay hina kaqtinqa kusikuspan llapaykichiswan q'ochukusaq.

¹⁸Chay hinallataq qankunapas kusikuychis, ñoqawan kuskataq q'ochukuychispas.

¹⁹Señor Jesús munaqtinqa, Timoteotan usqhayllata watukuqniykichista kachamusaq, imaynachus kashasqaykichista yachaspa kusikunaypaq.

²⁰Manan pipas Timoteo hina yuyaykuq-masiyqa kanchu, cheqaqtapuni tukuy sonqowan allin kanaykichista munaqpas.

²¹Lliwpas paykunapaq allin kaqllatan maskhanku, manataqmi Jesucristoq kaqnintaqa.

²²Yachanchisñan Timoteoqa llank'aypaq kusa kasqantaqa, payqa allin willakuykunata willaypin llank'aysiwarqan, imaynan churiqa taytanta yanapan hinata.

²³Paytan qankunaman kachamuyta yuyaykushani, kacharisqachus kasaq icha manachus chayta yacharqospa hina.

²⁴Ichaqa Señorpin suyakushani ñoqapas qankunata watukuq usqhaylla hamunaypaq.

²⁵Yuyaykusqayman hinaqa allinpunin rikch'akuwan wawqe Epafroditota qankunaman kachamuyniy, paymi llank'aqmasiy soldadomasiypas, paytan qankuna kikiykichis kachamuwarqankichis tukuy imapi yanapawananpaq.

²⁶Epafroditoqa maytapunin llapaykichiswan tupaykuyta munashan, sinchitan llakikushan onqosqa kasqanmanta uyarisqaykichisrayku.

²⁷Arí, cheqaqtapunin onqorqan, yaqapunin wañukapunpas, ichaqa Diosmi payta khuyapayarqan, manataq payllatachu, aswanpas ñoqatawanmi khuyapayawarqan ama llakipas llaki-pata kanaypaq.

²⁸Chayraykun aswan usqhaylla kachamushaykichis, payta wakmanta rikuspa kusikunaykichispaq, ñoqapas amaña sinchita llakikunaypaq.

²⁹Ancha kusikuywan Epafroditota chaskiychis, Señorpi iñiq wawqeta hinapuni, hinallataq pay hina llank'aq wawqekunatapas anchata respetaychis.

³⁰Cristoq kamachinpi kashaspan yaqa wañurqanpas, qankunaq rantiykichispin llank'aysiwarqan wañuytapas mana manchakuspa.