Read DIOSPA QHELQACHISQ Quechua FILIPENSES 3 Bible Online

FILIPENSES 3 - DIOSPA QHELQACHISQ Quechua bible

FILIPENSES 3

¹Chay hinaqa, wawqe-panaykuna, Señorwan hukllachasqa kaspa q'ochukuychis. Qankunaq allinniykichispaq kaqtinmi mana sasachaspa ñawpaq qelqamusqay kikillantataq qelqamuykichis.

²Cuidakuychis alqo hina kawsaqkunamanta, mana allin ruwaqkunamanta, cuerponkuta wit'ukuqkunamantapas.

³Ñoqanchismi cheqaq señalasqaqa kanchis, Santo Espirituq yanapasqan kaspa Diosta yupaychanchis, Jesucristowan hukllachasqa kaspan qespikusqanchismanta kusikunchis, manataqmi cuerpopi runaq ruwasqanmanchu hap'ipakunchis.

⁴Chaywanpas ñoqaqa atiymanraqmi runaq ruwasqanman hap'ipakuyta. Pipas runaq ruwasqanman hap'ipakunman chayqa, ñoqaqa astawanraqmi hap'ipakuyman:

⁵Ñoqataqa pusaq p'unchayniyoq wawa kashaqtiymi qhari-kayniyta señalawasqaku. Ñoqaqa Israel runakunaq mirayninmi kani, Benjamín ayllumanta. Hebreo runakunaq churin, Hebreo runapunitaq kanipas. Diospa kamachikuy siminman hinaqa fariseon karqani,

⁶chaymi fariseokunaq yachachikuyninman sonqollisqa kaspay Jesucristoq iglesianta ñak'arichispa qatiykacharqani, chay yachachikuyman hina kawsayniypitaq mana huchachana karqani.

⁷Ichaqa tukuy imakunachus ancha chaniyoq kawarqan chaykunatan kunanqa Cristopi iñisqayrayku mana imapaq valeqta qhawapuni.

⁸Chaykunamantapas astawanqa tukuy imaymanayoq kaytapas mana valeq q'opata hinan qhawani Señorniy Jesucristota reqsinaypaq. Payta reqsiymi may chaniyoqpuniqa. Cristoraykun lliwta saqepuni, hinaspa q'opata hina qhawarini Cristota chaskikuspa

⁹paywan hukllachasqa kanaypaq. Ahinapin mana kamachikuy simita hunt'asqayraykuchu chaninchasqaqa kasaq, aswanpas Cristopi iñisqayraykun Diospa chaninpaq qhawarisqanqa kasaq.

¹⁰Ñoqaqa munanin Cristota reqsiyta, kawsarimpuy atiyninta, ñak'ariq-masin kayta, pay hina wañuchisqa kaytapas,

¹¹chay hinapin suyakuni imaynallamantapas wañusqaymanta kawsarichimpusqa kanaypaq.

¹²Chaykunata nispaqa, manan “lliwtañan aypani” nishanichu, manataq “hunt'asqañan kani” nishanichu, aswanpas kallpachakushanin, ichapas atiyman chayman aypayta, chaypaqtaqmi Jesucristopas ñawpaqtaña aypamuwarqan.

¹³Wawqe-panaykuna, ñoqa kikiypas manan chaymanqa aypaniraqchu, aswanpas kayllatan ruwashani: ñawpa kawsayniypi kaqkunata lliwta qonqapuspaymi, ñawpaqeypi kaqman aypanaypaq anchatapuni kallpachakushani,

¹⁴ñawpaqllamanpunin phawashani, Jesucristowan hukllachasqa kaspay premiota chaskinaypaq, chaypaqmi Diosqa hanaq pachaman waqyawarqan.

¹⁵Chay hinaqa, iñiyninchispi allin takyasqaña kashaqkunaqa chay hinatakama yuyasunchis. Huk-hinataña yuyankichis chaypas, Diosmi chaytaqa sut'inchasunkichis.

¹⁶Chaywanpas, maykamañachus chayanchis chayman hinapuni purisunchis.

¹⁷Wawqe-panaykuna, ñoqamanta yachaqakuychis, yachaqakullaychistaq imaynan ñoqaykupas allin kawsayta rikuchirqaykichis chayman hina kawsaqkunamanta.

¹⁸Askha kutitañan nirqaykichis, kunanpas wakmantan waqayniywanraq nimuykichis: Askha runakunan Cristoq cruzpi wañusqanta pisichaspanku mana allinta kawsashanku.

¹⁹Chay runakunaq p'uchukayninqa ñak'ariymi, paykunaq diosninkuqa wiksallankun, ruwasqankumanta p'enqakunankutaqa hatunchakunkuraqtaq, kay pacha kaqkunallapitaqmi yuyankupas.

²⁰Ñoqanchismi ichaqa hanaq pachapi llaqtayoq kanchis, chaymi hanaq pachamanta Qespichiq Señor Jesucristoq hamunanta makilla suyakushanchis.

²¹Paymi kay pisi kallpa cuerponchista huk-hinaman t'ikranqa, sumaq-sumaq k'anchaq cuerponman rikch'akuqta. Chaytaqa ruwanqa tukuy imaymanata kamachinan atiyninwanmi.