Read DIOSPA QHELQACHISQ Quechua COLOSENSES 3 Bible Online

COLOSENSES 3 - DIOSPA QHELQACHISQ Quechua bible

COLOSENSES 3

¹Cristowan kuskan kawsarichimpusqa kankichis, chayrayku hanaq pachapi kaqkunata maskhaychis, chaypin Cristoqa tiyashan, Diospa paña ladonpi.

²Ama kay pacha kaqkunapichu yuyaychis, aswanpas hanaq pacha kaqkunapi yuyaychis.

³Qankunaqa Cristowanmi wañurqankichis, kawsayniykichistaq Cristowan Diospi pakasqa kashan.

⁴Kikin Cristopunin kawsayniykichisqa, chaymi pay rikhurimuqtin qankunapas paywan kuska qhapaq k'anchayninpi rikhurillankichistaq.

⁵Chay hinaqa, qankuna kay pachapi lliw millay ruwaykunamanta t'aqakuychis, ama qhelli huchapi puriychischu, ama millay map'ata ruwaychischu, ama cuerpoykichispa munasqanta ruwaychischu, ama mana allinta yuyaykuychischu, ama munapayaychischu, munapayayqa ídolo yupaychay hinan.

⁶Chaykuna hawan mana kasukuqkunaman Diospa phiñakuyninqa chayamun.

⁷Qankunapas ñawpaqqa chaykunata ruwaspan purirqankichis.

⁸Kunan ichaqa tukuy kaykunata saqepuychis: k'arak phiñakuyta, phiñasqalla kayta, millay-kayta, tumpayta, qhelli rimayta.

⁹Ama qankunapura llullakuychischu. Qankunaqa ñawpa kawsayniykichispi millay ruwaykunatan wikch'upunkichisña,

¹⁰hinaspan mosoq runa-kaywan p'achawan hina churakunkichisña. Kamaqniykichis Diosmi paypa rikch'ayninman hina chay mosoq runata mosoqyachishan payta allinta reqsinankama.

¹¹Chay kawsaypiqa manañan t'aqa-t'aqa kay kanñachu, mana judío runawanpas judío runawanpas, qhari-kaynin señalasqawanpas mana señalasqawanpas, wak llaqtayoqwanpas ch'unchuwanpas, kamachiwanpas mana kamachiwanpas, aswanpas Cristollañan, payllataqmi llapapipas kashan.

¹²Diosmi qankunataqa munakusunkichis, chaymi paypaq kanaykichispaq akllakurqasunkichis. Chay hinaqa p'achawan hina p'achakuychis khuyapayakuq-kaywan, sumaq sonqo-kaywan, huch'uyyaykukuywan, llamp'u sonqo-kaywan, pacienciawan ima.

¹³Qankunapura paciencianakuychis, pipas hukpa contranpi imatapas riman chayqa, pampachaykunakuychis. Imaynan Cristopas pampacharqasunkichis, chay hinallataq qankunapas pampachaychis.

¹⁴Chaykunamanta astawanqa munakuq sonqo kaychis, munakuymi tukuy imatapas sumaqta hukllaman tukuchin.

¹⁵Diosqa huk cuerpolla kanaykichispaqmi waqyarqasunkichis thak-kaypi kawsanaykichispaq, chayrayku Cristoq qosqasuykichis thak-kayqa sonqoykichispi kamachikuchun. Hinallataq agradecekuq kaychis.

¹⁶Cristoq yachachikuynin sonqoykichispi llimp'arichun, qankunapura tukuy yachaywan yachachinakuspa kallpachanakushaqtiykichis, hinallataq salmokunata, yupaychana espiritual takikunata, takishaqtiykichis, Diosman tukuy sonqo graciasta qoshaqtiykichis.

¹⁷Tukuy imataña ruwankichis otaq rimankichis chaypas, lliwta ruwaychis Señor Jesuspa sutinpi, paywan Dios Yayaman graciasta qospa.

¹⁸Casarasqa warmikuna, qosaykichista kasuychis, chaytan ruwanaykichis Señorpi iñiqkuna hinapuni.

¹⁹Qosakuna, esposaykichista munakuychis, amataq paykunata k'amipayaychischu.

²⁰Wawakuna, tukuy imapi tayta-mamaykichista kasuychis, chaymi Señorta kusichin.

²¹Tayta-mamakuna, wawaykichista ama k'utuychischu, paqtan unphuyankuman.

²²Kamachikuna, kay pacha patronniykichista tukuy imapi kasuychis, ama qhawashasqallachu ruwaychis runakunata kusichinallaykichispaqqa, aswanpas cheqaq sonqowan Diosta manchakuspa ruwaychis.

²³Tukuy imatapas runakunapaq ruwaspaykichisqa tukuy sonqowan ruwaychis, Señorpaq hinapuni, ama runakunapaq hinallachu.

²⁴Qankunaqa yachankichisñan tupaqniykichis herenciata Señorpa qonasuykichista. Qankunaqa cheqaq Patronniykichis Cristotan servishankichis.

²⁵Mana chaninta ruwaqmi ichaqa, mana chanin ruwasqallantataq chaskinqa, Diosqa manan mayqen runamanpas sayapakunchu.