Read DIOSPA QHELQACHISQ Quechua COLOSENSES 4 Bible Online

COLOSENSES 4 - DIOSPA QHELQACHISQ Quechua bible

COLOSENSES 4

¹Patronkuna, kamachiykichiskunata sumaqta chaninta rikuychis, qankunaqpas Patronniykichis hanaq pachapi kashasqanta yachaspaykichis.

²Diosmantaqa mañakushallaychispuni, graciasta qospa rikch'ashallaychispuni.

³Mañapullawaychistaq ñoqaykupaqpas, Cristomanta pakasqa yachayta willanaykupaq punkuta Dios kicharipuwanankupaq, chayraykun presopas kashani.

⁴Diosmanta mañapuwaychis ancha sut'itapuni Cristomanta willanaypaq.

⁵Diospi mana iñiq runakunaq qayllanpiqa allin yuyaywanpuni kawsaychis, tiempoykichistapas amataq usuchiychischu.

⁶Rimakuyniykichisqa ancha sumaqpuni kachun, kachiwan kachichasqa hina, ahinapin yachankichis imaynatachus sapankamanpas allinta kutichinaykichista.

⁷Imaynachus ñoqa kashasqaytaqa munasqanchis wawqe Tiquicon lliwta willasunkichis, payqa Señorpa hunt'aq kamachinmi, llank'aq-masiytaqmi kanpas.

⁸Paytaqa kachamushaykichis imaynachus kasqaykuta willanasuykichispaqpunin, sonqoykichistapas kallpachaykunanpaqwan.

⁹Tiquicoqa hamushan munasqa hunt'aq wawqenchis Onesimopiwanmi. Onesimoqa qankunamanta hukniykichismi. Paykunan tukuy imachus kaypi kaqkunataqa willasunkichis.

¹⁰Presomasiy Aristarcon Bernabepa primon Marcospiwan napaykamusunkichis. Marcos watukamusunkichis chayqa sumaqta chaskiykuychis, chaytaqa ñan kamachirqaykichisña.

¹¹Napaykamullasunkichistaqmi Justo sutichasqa Jesuspas. Paykunallan judío runakunamanta llank'aq-masiykunaqa kanku, Diospa qhapaqsuyunmanta ñoqawan willanku, paykunan anchata kallpachawarqanku.

¹²Napaykamullasunkichistaqmi qankunamanta hukniykichis Cristoq kamachin Epafraspas. Payqa Diosmanta mañapullasunkichispunin Diospa munayninta ruwaspa allin takyasqapuni kanaykichispaq, iñiypipas mana iskayrayaspa wiñasqaña kanaykichispaqwan.

¹³Ñoqaqa allintan yachani qankunapaq Epafrasqa anchata llank'ashasqanta, hinallataq Laodicea llaqtapi kaqkunapaqpas, Hierápolis llaqtapi kaqkunapaqpas.

¹⁴Munasqa médico Lucaspas napaykamullasunkichistaqmi, hinallataq Demaspas.

¹⁵Laodicea llaqtapi kashaq wawqe-panakunata napaykapuwaychis, hinallataq Ninfastapas napaykapuwaychis, wasinpi huñukuq iglesiatapas.

¹⁶Qankuna kay cartata leespaykichisña Laodicea llaqtapi iglesiaman apachiychis, paykunapas leenankupaq, qankunapas Laodicea iglesiamanta apachimusunkichis chay cartata leellaychistaq.

¹⁷Arquipota niychis: Señorpa qosqasuyki llank'anataqa allintapuni hunt'ay, nispa.

¹⁸Ñoqa Pablon makiywan kay napaykukuyta qelqamuykichis. Preso kashasqaymanta yuyarikuwaychis. Diosninchis sumaqta saminchasunkichis.