Read DIOSPA QHELQACHISQ Quechua 1 TESALONICENSES 2 Bible Online

1 TESALONICENSES 2 - DIOSPA QHELQACHISQ Quechua bible

1 TESALONICENSES 2

¹Wawqe-panaykuna, yachankichismi qankunaman watukuq hamusqaykuqa mana yanqapaqchu kasqanta.

²Yachallankichistaqmi ñawpaqta Filipos llaqtapi muchusqaykuta, k'amisqa kasqaykuta, chaywanpas Diosninchismi kallpachawarqanku, hinan qatiykachakuyña kashaqtinpas mana mancharispa Diospa allin willakuyninkunata willarqaykichis.

³Willasqaykuqa cheqaqpunin, allin yuyaywanmi rimarqaykupas, manataqmi q'otuytapas yuyaykurqaykuchu.

⁴Aswanpas Diosmi allinpaq hap'iwaspanku allin willakuykunata willanaykupaq kamachiwarqanku, chaymi chay hinata willayku. Manan runakunatachu kusichiyta munayku, aswanpas sonqonchista t'aqwiq Diostan.

⁵Qankunaqa yachankichismi, manan hayk'aqpas sumaqta rimaq tukuspachu alabarqaykiku, manataqmi qolqetapas munapayarqaykuchu, Diosmi chaytaqa yachan.

⁶Manan runakunaq hatunchasqan kaytachu munayku, qankunaqtapas nitaq hukkunaqtapas,

⁷Cristoq apostolninkuna hinaña qankunata kamachinaykupaq atiyniyoq kashaspaykupas. Aswanmi qankuna ukhupi llamp'u sonqo karqayku, imaynan mamaqa ñuñuq wawanta sumaqta uywan hinata.

⁸Qankunataqa anchatapunin munakuykiku, chayraykun mana Diosmanta allin willakuykunallatachu willayta munarqaykiku, aswanpas kikin kawsayniykutawanmi qoyta munarqayku, ancha munasqa ñoqaykupaq kasqaykichisrayku.

⁹Wawqe-panaykuna, qankunaqa yuyashankichispunichá llank'asqaykutapas sayk'usqaykutapas. Tuta-p'unchaymi makiykuwan llank'arqayku, Diosmanta allin willakuykunata qankunaman willaspa ama mayqenniykichistapas gastachinaykupaq.

¹⁰Qankunan allinta yachankichis, Diospas yachallantaqmi, qankuna iñiqkuna ukhupi ch'uyata, chaninta, mana huchachanata kawsasqaykuta.

¹¹Yachallankichistaqmi sapankaykichista kallpachasqaykutapas sonqochasqaykutapas, imaynan taytaqa wawankunapaq ruwan hinata.

¹²Qankunatan kallpacharqaykichis Diospa sonqonman chayaqtapuni kawsanaykichispaq. Diosmi waqyasunkichis qhapaqsuyunpi paywan kuska hatunchasqa kanaykichispaq.

¹³Chayraykun ñoqaykupas Diosman graciasta qollaykupuni. Qankunaqa Diospa siminta willashaqtiykun uyarispaykichis Diospa siminta hinapuni chaskikurqankichis, manataq runakunaq siminta hinallachu chaskirqankichis. Chay cheqaq simin qankuna iñiqkunapi atiywan ruwashan.

¹⁴Wawqe-panaykuna, llaqta-masiykichispa qatiykachasqanmi muchurqankichis, imaynan Judea hap'iypi Jesucristopi kashaq Diospa iglesiankunata judío runakuna qatiykacharqanku hinata.

¹⁵Chay judío runakunan Señor Jesustapas profetakunatapas wañuchirqanku, ñoqaykutataq qarqomuwarqanku. Paykunaqa manan Diosta kusichinkuchu, tukuy runaq contrantaqmi kankupas.

¹⁶Paykunaqa hark'awankun mana judío runakunaman qespichisqa kanankupaq willanaykutapas. Chay hinapin astawanraq huchata hunt'aykachikunku, ichaqa ñan Diospa k'arak phiñakuynin paykunaman chayamushanña.

¹⁷Wawqe-panaykuna, huk pisi tiempo qankunamanta karunchasqa kaspa, manaña kuskachu kashanchis chaypas, sonqoykupiqa yuyashallarqaykikun, maytapunin qankunawan tupaykuytapas munarqayku.

¹⁸Chaymi qankunaman hamuyta munarqayku, astawanqa ñoqa Pablon, askha kutita hamuyta yuyaykurqani, ichaqa Satanasmi sapa kuti hark'awarqanku.

¹⁹Chhaynaqa, ¿mayqentaq suyakuyniykupas, kusikuyniykupas, Señorninchis Jesucristo kutimuqtinqa kanqa? ¿Imamantataq paypa qayllanpiqa atipaqkuna hina q'ochukusaqku? ¿Manachu qankuna kankichis?

²⁰Arí, qankunapunin q'ochukunaykupas kusikunaykupas kankichis.