Read DIOSPA QHELQACHISQ Quechua JOSUÉ 13 Bible Online

JOSUÉ 13 - DIOSPA QHELQACHISQ Quechua bible

JOSUÉ 13

¹Sinchi yuyaqña Josué kaqtintaq, Señor Diosqa nirqan: — Qanqa sinchitañan machuyaykapushanki, askha hallp'akunaraqmi mana hap'isqa kashan:

²Filistea runakunaq hallp'an, Gesur runakunaq hallp'an,

³Egipto suyu qorpa Sihor mayumanta wichay ladopi Ecrón llaqta qorpakama, chay hallp'akunataqmi Canaán runakunaq karqan. Chaypin Filistea runakunaq phisqa reyninkuna tiyashanku: Gaza llaqtapi, Asdod llaqtapi, Ascalón llaqtapi, Gat llaqtapi, Ecrón llaqtapiwan. Kashallantaqmi Avim runakunaq hallp'anpas.

⁴Kashallantaqmi uray ladopi Canaán runakunaq hallp'anpas Sidón runakunaq Mearah llaqtanmanta Amor runakunaq qorpanpi Afec llaqtakama.

⁵Kashallantaqmi Gebal runakunaq hallp'an, kaqllataq inti lloqsimuy lado Líbano suyupas Hermón orqo chaki Baal-Gadmanta Hamat Q'asakama.

⁶Libanomanta Misrefotmaim llaqtakama orqo-orqopi tiyaq llapan Sidón runakunata haykusqaykichisman hina wikch'usaq. Chaymi qanqa kamachisqayman hina Israel runakunaman chay hallp'ata rakipunki chaypi tiyakapunankupaq.

⁷Chay hallp'akunatan rakipunki isqonnintin aylluman, Manasespa kuskannin ayllunmanwan, nispa.

⁸Rubén aylluman, Gad aylluman, Manasespa kuskannin ayllunmanwanmi Moisesqa Jordán mayu inti lloqsimuy ladopi hallp'ankunata ñawpaqña rakiykapurqan.

⁹Hallp'ankutaq karqan Arnón mayu qayllapi Aroer llaqtamanta, hinallataq Arnón wayq'opi kaq llaqtamantapas, Medeba pata pampantin Dibón llaqtakama,

¹⁰hinallataq rey Sehonpa llapan llaqtankunapas Amón runakunaq qorpankama. Sehonqa Hesbón llaqtapi kamachikuq Amor runakunaq reyninmi karqan.

¹¹Chay kinsa aylluqtaq kapurqan Galaad hap'iy, Gesur hap'iy, Maaca hap'iypiwan, kaqllataq Hermón orqopas, llapan Basán suyu Salca llaqtakamaraq.

¹²Chaymi kasqa Refaim runakunamanta puchuqpa miraynin Basán suyu rey Ogpa hallp'an, payqa Astarot llaqtapi Edrei llaqtapiwanmi kamachikusqa. Sehonta Ogtawanmi Moisesqa atipaspa hallp'ankumanta qarqopurqan.

¹³Gesur runakunan Maaca runakunapiwan mana qarqosqachu karqanku, hinallan paykunaqa Israel runakunawan kuska tiyakapusqaku.

¹⁴Leví ayllumanmi ichaqa hallp'ata Moisesqa mana qosqachu, paykunapaqqa Israelpa Diosnin Señorman ruphachinapaq apamusqa ofrendamanta wakinninmi karqan, Diospa Moisesta nisqanman hina.

¹⁵Rubén ayllumanmi Moisesqa hallp'ata rakiykusqa mirayninkuman hina.

¹⁶Chay hinapin hallp'ankuqa mast'arikurqan Arnón mayu qaylla Aroer llaqtamanta, hinallataq chay wayq'opi llaqtamantawan Medeba pata pampakama.

¹⁷Hesbón llaqtataq chay pata pampapi llaqtakunapiwan karqan: Dibón, Bamot-baal, Bet-baal-meón,

¹⁸Jahaza, Cademot, Mefaat,

¹⁹Quiriataim, Sibna, wayq'opi kaq moqo patapi Zaret-sahar,

²⁰Bet-peor, Bet-jesimot, Pisga orqo qhatakunapiwan.

²¹Hinan pata pampapi llapan llaqtakuna, Hesbón llaqtapi kamachikuq Amor runakunaq reynin Sehonpa suyunpas Rubén aylluq kapurqan. Moisesmi atiparqan Sehonta, hinallataq Sehonpa kamachin Madián suyu umalli runakunatawan: Evita, Requemta, Zurta, Hurta, Rebatawan.

²²Israel runakunaqa espadawanmi wañuchirqanku Beorpa churin watuq Balaamta askha runakunatawan.

²³Llapan chay llaqtakunan huch'uy llaqtakunantin Rubén aylluman mirayninkuman hina rakisqa karqan. Inti haykuy qorpataq Jordán mayu patantakama karqan.

²⁴Kaqllataq Gad ayllumanpas Moisesqa hallp'ata rakiykurqan mirayninkuman hina.

²⁵Chay hinapin paykunaq karqan Jazer hap'iypas, Galaad hap'iypi llapan llaqtakunapas, hinallataq Rabá llaqta inti lloqsimuy lado Amón runakunaq kuskannin hallp'anmanta Aroer llaqtakama,

²⁶Hesbón llaqtamanta Ramat-mizpa llaqtakama, hinallataq Betonim llaqtakama, kaqllataq Mahanaim llaqtamantapas Lodebar llaqta qorpakama.

²⁷Jordán qheswa wayq'opitaq kasqa Bet-aram llaqta, Bet-nimra llaqta, Sucot llaqta, Zafón llaqtapiwan. Chay llaqtakunan Hesbón llaqta rey Sehonpa suyunmanta puchurqan. Chay hinapin hallp'ankuqa mast'arikurqan Jordán mayu inti lloqsimuy lado mayu patantakama Cineret qochakamaraq.

²⁸Chay llaqtakunan huch'uy llaqtakunantin rakisqa karqan Gad aylluman mirayninkuman hina.

²⁹Kaqllataqmi Manasés aylluq kuskanninman Moisesqa hallp'ata rakiykurqan mirayninkuman hina.

³⁰Chay hinapin hallp'ankuqa karqan Mahanaim llaqtamanta rey Ogpa llapan Basán suyuntin, Jairpa soqta chunkantin llaqta,

³¹Galaadpa kuskannin, Astarot llaqta, Edrei llaqtapiwan. Llapan chay llaqtakunataq hallp'akunantin rakisqa karqan Manasespa churin Maquirpa mirayninkunaman hina.

³²Jericó chimpa Jordán mayu inti lloqsimuy lado Moab suyu pata pampakunapi kashaspan, Moisesqa chay hallp'akunata rakirqan.

³³Leví ayllumanñataq ichaqa hallp'ata mana qorqanchu, aswanmi nirqan: Israelpa Diosnin Señormi qankunaq herenciaykichisqa, nispa.