Read DIOSPA QHELQACHISQ Quechua JOSUÉ 23 Bible Online

JOSUÉ 23 - DIOSPA QHELQACHISQ Quechua bible

JOSUÉ 23

¹Askha watakunañan pasasharqan, Señor Diospa Israel runakunata awqankumanta samachisqan. Hinan Josueqa sinchi machuña kaspa

²llapan Israel runakunata, kurak taytakunantinta, umallikunantinta, juezkunantinta, oficialkunantinta waqyachispa nirqan: — Ñoqaqa sinchitañan machuyaykapushani.

³Qankunaqa lliwtan rikurqankichis Diosninchis Señor Diospa ñoqanchista amachaspa chay llaqtakunata imaymana ruwasqanta, paymi ñoqanchisrayku maqanakurqan.

⁴Ñoqan aylluykichisman lliw hallp'akunata rakirqani inti lloqsimuy ladopi Jordán mayumanta inti haykuy ladopi lamar-qochakama. Ñoqan rakirqani llapan hap'isqa kaq hallp'akunata manaraq hap'isqa kaq hallp'akunatapas.

⁵Señor Diosmi wikch'unqa chay hallp'api tiyashaqkunata, qankunataqmi hallp'ankuta hap'ikapunkichis, Diosninchis Señor Diospa niwasqanchisman hina.

⁶Allintapuni sayaychis Moisespa kamachikuy qelqanta llapantapuni hunt'anaykichispaq, ama pañamanpas lloq'emanpas t'aqakuspa.

⁷Aman qankuna ukhupi tiyaq wak runakunawanpas mich'ukunkichischu, aman diosninkutapas yupaychankichischu, aman kasunkichischu, amapunin sutinkutapas rimarinkichischu, amallataq sutinkupipas jurankichischu.

⁸Aswanpas Diosninchis Señor Diosllamanpunin k'askakunkichis, imaynan kaykama ruwashankichis hinallatapuni.

⁹Señor Diosmi haykusqaykichisman hina ñawpaqeykichismanta llapan kallpasapa hatuchaq llaqtakunata wikch'urqan, manataq kunankama pillapas qankunawan churanakuyta atinchu.

¹⁰Qankunaqa huk runallaraqmi waranqa runata qatirirqankichis, Diosninchis Señor Diospa prometewasqanchisman hina ñoqanchismanta maqanakusqanrayku.

¹¹Kunanqa, anchatapuni cuidakuychis, Diosninchis Señor Diosta munakunaykichispaq.

¹²Qankunataqchus Señor Diosmanta t'aqarikuspa qankuna ukhupi tiyaqkunawan mich'ukuspa casarakapunkichis chayqa,

¹³allinta yachakuychis, Diosninchis Señor Diosqa manan wikch'unqachu chay runakunata qankuna ukhumanta, aswanmi chay runakunata Diosqa tukuchinqa huk toqllata, huk llikata hina chaypi urmanaykichispaq. Chay runakunan qankunata nanachisunkichis hasut'i hina, ñawiykichispi khiska hina, Señor Diospa qosqasuykichis chay sumaq hallp'api llapaykichis tukukunaykichiskama.

¹⁴Ñoqaqa wañukapusaqñan, ichaqa ñawpaqtaraqmi munani qankuna tukuy alma, tukuy sonqo Señor Diospa sumaq nisqasuykichista llapanta hunt'asqanta reqsikunaykichista, payqa llapantapunin rimarisqantaqa hunt'arqan.

¹⁵Chhaynaqa, imaynan Señor Diosqa sumaq nisqankunata lliwta hunt'arqan, chay hinallataqmi qankunaman chayachimullanqataq imaymana rikch'aq llakikuykunata, kay sumaq qosqasuykichis hallp'api llapaykichis wañunaykichiskama.

¹⁶Paywan rimanakusqaykichista mana hunt'aspa wak dioskunata yupaychankichis chayqa, Señor Diosmi qankunapaq phiñakapunqa, kay sumaq qosqasuykichis hallp'amantapas llapaykichistan picharparisunkichis, nispa.