Read DIOSPA QHELQACHISQ Quechua JOSUÉ 3 Bible Online

JOSUÉ 3 - DIOSPA QHELQACHISQ Quechua bible

JOSUÉ 3

¹Qhepantin p'unchaymi tutallamanta Josueqa llapa Israel runakunantin Sitim pampamanta puririspa Jordán mayu pataman chayarqanku, manaraq chimpashaspankutaq chayllapiraq karpakurqanku.

²Kinsa p'unchaymantataq umalli runakunaqa karpan-karpanta purimuspanku,

³Israel runakunata kamachirqanku: Diosniykichis Señor Diospa rimanakuy arcanta Leví runa sacerdotekunaq apashasqanta rikurqospaykichismi, puririmunkichis maypichus kasqaykichismanta, hinaspan qhepanta rinkichis.

⁴Qankunaqa manan chay ñanta rikunkichisraqchu, chayraykun paykuna pusasunkichis maynintachus rinaykichista. Rimanakuy arcamanmi ichaqa ama qayllankichischu, yaqa huk kilómetro hina qhepallanta rinkichis, nispa.

⁵Chaymantataq Josueqa Israel runakunata nirqan: — Señor Diosmi paqarin qankunaq rikushasqaykichis imaymana musphanata ruwanqa, chayrayku ch'uyanchakuychis, nispa.

⁶Hinallataq sacerdotekunata kamachirqan: — Rimanakuy arcata apaychis, hinaspa llaqtaq ñawpaqenta riychis, nispa. Paykunataq arcata wanturikuspa runakunaq ñawpaqenta rirqanku.

⁷Chaymantataq Señor Diosqa Josueta nirqan: — Kunanmantapachan Israel runakunawan mentachisqayki, chay hinapin paykuna yachanqaku qanwan kashasqayta imaynan Moiseswanpas karqani hinata.

⁸Hinallataq rimanakuy arca wantuq sacerdotekunata kamachinki Jordán mayu unu pataman chayaspanku, mayu ukhupi sayaykunankupaq, nispa.

⁹Chaymantataq Josueqa Israel runakunata nirqan: — Qayllaykamuychis, Diosniykichis Señor Diospa nisqantan willasqaykichis.

¹⁰Kunanmi yachankichis Kawsaq Diospuni qankuna chawpipi kashasqanta, yachallankichistaq suyuman haykusqaykichisman hina Canaán runakunata, Het runakunata, Hev runakunata, Ferez runakunata, Gerges runakunata, Amor runakunata, Jebus runakunata Diospa wikch'usqanta.

¹¹Teqsimuyuntin Kamachiq Señor Diospa rimanakuy arcanmi qankunaq ñawpaqeykichista Jordán mayuta chimpanqa.

¹²Kunanqa chunka iskayniyoq qharikunata akllaychis huktakama Israelpi sapanka ayllumanta.

¹³Teqsimuyuntin Kamachiq Señor Diospa rimanakuy arcanta wantuq sacerdotekuna Jordán mayu unuman saruykuqtinku hinan, mayuqa iskayman t'aqarikunqa. Wichaymanta phawamuq unun kasqanpi qochachakunqa, urayman phawaqñataqmi ch'akipunqa, nispa.

¹⁴Israel runakunan karpankumanta puririrqanku Jordán mayuta chinpanankupaq. Rimanakuy arcata wantuq sacerdotekunataq paykunaq ñawpaqenta rirqanku.

¹⁵Mayu chimpay yuyaykusqanku p'unchaykunaqa cosecha tiempon karqan, sapa watallapunitaq chay tiempopi Jordán mayuqa patantintaraq llimp'aspa suchuykamuq. Rimanakuy arcata wantuq sacerdotekuna mayuta saruykuqtinkutaq,

¹⁶wichaymanta phawamuq unuqa kasqanpi takyarparispa, paykunaq chimpanan cheqasmanta karupiraq qochachaykukurqan Saretán qaylla Adam llaqtakama. Arabá qheswa wayq'onta Kachi Qochaman haykuq unutaq ch'akirqapurqan. Hinan chayninta Israel runakunaqa Jericó cheqasman chimparqanku.

¹⁷Paykunaqa allin ch'aki hallp'ata hinan Jordán mayuta chimparqanku, Señor Diospa rimanakuy arcanta wantuq sacerdotekunataq chaykama Jordán mayu ukhupi allin ch'aki hallp'api hina sayasharqanku.