Read DIOSPA QHELQACHISQ Quechua JOSUÉ 5 Bible Online

JOSUÉ 5 - DIOSPA QHELQACHISQ Quechua bible

JOSUÉ 5

¹Jordán mayuq inti haykuy ladonpi tiyaq llapa Amor runakunaq reyninkuna, lamar-qochaq qayllanpi tiyaq Canaán runakunaq reyninkunapas uyarirqanku Señor Diospa Jordán mayuta Israel runakunaq chimpananpaq ch'akichisqanta. Chaymi Israel runakuna hawa mancharikurqanku, hinan kallpankupas chiriyarqan.

²Chaypachataqmi Señor Diosqa Josueta kamachirqan: — Ch'ila rumimanta cuchillokunata ruwakuy Israel runakunaq qhari-kaynin qarachata señalanaykipaq, nispa.

³Chaymi Josueqa cuchillokunata ruwakuspa Israel runakunaq qhari-kayninta señalarqan “Señalana Orqo” nisqapi.

⁴Josueqa paykunata señalarqan Egiptomanta lloqsimuq llapan maqanakuy atiq qharikuna ch'inneq ñan purimusqankupi wañusqanku hawa.

⁵Hinaña paykuna señalasqa lloqsimurqanku chaypas, purimusqanku ñanpi nacemuqkunaqa manan señalasqachu karqanku.

⁶Israel runakunaqa tawa chunka watantinmi ch'inneqpi purirqanku Egiptomanta lloqsimuq llapan maqanakuy atiq qharikunapas wañuspa lliw tukukunankama. Chay runakunan Señor Diosta mana kasukusqakuchu, chayraykun Señor Diosqa jurasqa ñawpa taytankuman prometesqan lecheq miel misk'iq askha kanan hallp'ata mana rikunankupaq.

⁷Señor Diosmi chay runakunaq churinkunata taytankuq rantinpi churarqan, chaymi Josueqa paykunata señalarqan purimusqankupi señalay mana kasqanrayku.

⁸Llapanku señalasqa kaspankutaq kaqpi qhepakurqanku alliyanankukama.

⁹Chaymantataq Señor Diosqa Josueta nirqan: — Qankunapaqmi Egiptopi kamachi-kayniykichis p'enqay karqan, chaytan kunan p'unchay qechupuykichis, nispa. Chayraykun chay cheqasqa Gilgal[2] nisqa kapurqan kunan p'unchaykama.

¹⁰Gilgalpitaq chay killaq chunka tawayoq p'unchaynin ch'isita Jericó pampapi Pascua Fiestata ruwarqanku.

¹¹Qhepantin p'unchaytaq Canaán hallp'api wiñaq mikhuyta, mana qonchuyoq t'antata, trigo hank'ata ima mikhurqanku.

¹²Chay p'unchaymantapachan maná nisqa mikhuna manaña kapurqanñachu, chaymi Israel runakunaqa manaña maná nisqa mikhunata mikhurqankuñachu, aswanpas Canaán hallp'api wiñaq mikhuytan mikhupurqanku.

¹³Huk p'unchaymi Josueqa Jericó llaqta qayllapi kashaspa, espada hap'intin qharita ñawpaqenpi rikurqorqan. Chayman qayllaykuspataq tapuykurqan: — ¿Llaqta-masiykuchu kanki? Icha, ¿awqaykuchu? nispa.

¹⁴Chay qharitaq kutichirqan: — Manan mayqenpas. Ñoqaqa Señor Diospa ejercitonpa umallin kaspan hamuni, nispa. Chaymi Josueqa pampakama k'umuykukuspa yupaychaykurqan: — Señorníy, kamachiykin kani, ¿ima ruwanaytan munanki? nispa.

¹⁵Señor Diospa ejercitonpa umallintaq nirqan: — Sarusqayki pampaqa ch'uyan, usut'aykita ch'utikuy, nispa. Paytaq kamachisqanman hina ruwarqan.