Read DIOSPA QHELQACHISQ Quechua 1 TIMOTEO 1 Bible Online

1 TIMOTEO 1 - DIOSPA QHELQACHISQ Quechua bible

1 TIMOTEO 1

¹Ñoqa Pablon Jesucristoq apostolnin kani, chaypaqmi qespichiqninchis Diosqa churawarqan suyakusqanchis Señor Jesucristopiwan.

²Kay cartatan iñiypi cheqaq churiy qan Timoteoman qelqamuyki: Dios Yayanchismi Señorninchis Jesucristopiwan anchata saminchasunki, khuyapayasunki, thak-kaytapas qosunki.

³Macedonia provinciaman rishaspaymi Efeso llaqtapi qhepakunaykipaq valekurqaykiña. Chay hinaqa, qhepakuy chaypi, wakin runakunata kamachinaykipaq, ama q'ewisqa yachachikuykunata yachachinankupaq,

⁴amallataq cuentokunatapas ñawpa taytakunaq mana tukukuq suti qelqankutapas t'aqwishanankupaq. Chaykunaqa churanakuykunallatan hatarichin, manataqmi Diospa ruwayninkunapiqa imapaqpas valenchu, iñiyllawanmi Diospa ruwasqankunataqa reqsinchis.

⁵Chaytan kamachikuni ch'uya sonqowan, allin concienciawan, cheqaq iñiywan munanakuypi kawsanankupaq.

⁶Wakinmi chaykunamanta t'aqakurqanku, hinaspa yanqa ch'aqwaykunaman chapukuspa waqllipurqanku.

⁷Paykunaqa allin yachaqman tupuspan Diospa kamachikuy Simin Qelqamanta yachachiyta munanku, ichaqa manan paykuna kikinkupas yachankuchu rimasqankutaqa, nitaq yachachisqankutapas entiendenkuchu.

⁸Yachanchismi kamachikuy simiman hina kawsayqa allin kasqanta.

⁹Yachallanchistaqmi, kamachikuy simiqa manapunin chanin runakunapaqchu churasqa karqan, aswanpas mana chaninkunapaq, mana kasukuqkunapaq, Diosta mana manchakuqkunapaq, huchasapakunapaq, Diostapas, Dios yupaychaytapas pisichaqkunapaq, tayta-mamanta wañuchiqkunapaq, llapa runa wañuchiqkunapaq,

¹⁰qhelli huchapi puriqkunapaq, qharipura t'inkikuqkunapaq, runa suwakuqkunapaq, llullakuqkunapaq, yanqa-qasi juraqkunapaq, chanin yachachikuypa contranpi llapa sayariqkunapaqwanmi.

¹¹Chay chanin yachachikuyqa yupaychananchis Diospa qhapaq-atiyninmanta allin willakuykunaman hinapunin. Chay allin willakuykunata willanaypaqmi Diosqa churawarqan.

¹²Señorninchis Jesucriston hunt'aqpaq qhawariwaspa kamachin kanaypaq akllakuwarqan, hinaspan kallpachawarqan, chaymi anchatapuni graciasta qoni.

¹³Manan ñoqaqa chaypaq hinachu karqani, ñawpaqqa Jesucristota pisichaspan millaytapuni k'amirqani, paypi iñiqkunatapas ñak'arichispan qatiykacharqani. Ichaqa Diosmi khuyapayawarqan, mana yachaspa mana iñispa chaykunata ruwasqayrayku.

¹⁴Diosninchisqa anchatapunin khuyapayawarqan, hinaspan iñiyta, munakuyta Jesucristowan qowarqan.

¹⁵Kay simiqa cheqaqmi, chayraykun llapa runaqa iñinanpuni. Chay simin nin: Jesucriston kay pachaman hamurqan huchasapakunata qespichinanpaq, ñoqaqa paykunamanta aswan huchasaparaqmi kani, nispa.

¹⁶Diosmi ichaqa khuyapayawarqan, mana tukukuq paciencianta Jesucristo ñoqapi rikuchinanpaq. Chay hinapin ñoqaqa aswan huchasapaña kashaspaypas yachaqakunankupaq churasqa kani Jesucristopi iñispanku wiñay kawsayniyoq kanankupaq.

¹⁷Kunanqa wiñay-wiñay Reyta, mana wañuq, mana rikuna, sapallan Diosta wiñay-wiñaypaq yupaychasun hatunchasun. Amén.

¹⁸Churíy Timoteo, ñawpaqmantañan Diospa sutinpi wawqekunaq qanmanta profetizasqankuman hina kaykunata kamachiyki, chay profetizasqa simikunapi yuyaymanaspa allintapuni soldado hina maqanakuy,

¹⁹iñiypi qaqata sayaspa allin concienciaman hina purispa. Wakinqa concienciankuta mana kasuspan iñiyninkupi waqllipurqanku.

²⁰Chay waqllipuqkunamantan kanku Himeneowan Alejandrowan. Paykunatan Satanasman hap'ichirqani, Diospa contranpi amaña millayta rimashanankupaq.