Read DIOSPA QHELQACHISQ Quechua 1 TIMOTEO 2 Bible Online

1 TIMOTEO 2 - DIOSPA QHELQACHISQ Quechua bible

1 TIMOTEO 2

¹Ñawpaqtaqa kaytan yuyaychayki: llapa runapaq Diosmanta mañapuychis, valekuychis, rogakuychis, Diosman graciasta qoychis.

²Mañapullaychistaq reykunapaqpas, llapa kamachikuqkunapaqpas, allin kawsaypi, sumaq kawsaypi kawsakunanchispaq, Diosman sonqollisqa, tukuy imapipas paypa sonqonman chayaqta ruwaspa.

³Qespichiqninchis Diospa qayllanpi chay hina mañakuyqa allinmi, paypa sonqonman chayaqtaq kanpas.

⁴Payqa munanmi llapan runakuna qespichisqa kanankuta, cheqaq-kayta reqsinankutapas.

⁵Diosqa ch'ullallan, hinallataqmi Diostawan runakunatawan allipunachiqpas ch'ullalla, paymi Jesucristo runa.

⁶Jesucristoqa pay kikinmi wañuyman hap'iykachikurqan, llapa runa huchankumanta kacharichisqa kanankupaq, chaywanmi Diosqa yuyaykusqanta tiemponpipuni sut'inchan.

⁷Chaypaqmi ñoqaqa willaq kanaypaq churasqa karqani, apóstol kanaypaq, iñiymanta cheqaq-kaymantawan mana judío runakunaman yachachinaypaqwan. Cheqaqtan rimani, manan llullakunichu.

⁸Chayraykun munani hinantinpi llapa runakuna ama phiñakuspa, ama churanakuspa, ch'uya sonqowan makinta hoqarispa Diosmanta mañakunankuta.

⁹Hinallataq munani warmikunapas allinta hap'iq p'achawan churakunankuta, iman p'achakunata hinalla allin yuyaywan, ichaqa ama qoriwanpas, perlakunawanpas, ancha valorniyoq p'achawanpas p'achakunankuta, amallataq chukcha ñaqch'akuyninkutapas k'achanchakunankuta,

¹⁰aswanpas munanin allinkunata ruwaspa Diosta yupaychaq warmikuna hinapuni kawsanankuta.

¹¹Iglesiaq huñukuyninpi warmiqa ch'inlla yachaqakuchun, tukuy imapi kasukuspa.

¹²Warmitaqa manan yachachinanta munanichu, manallataq qharita kamachinantapas, aswanpas ch'inlla kanantan munani.

¹³Diosqa Adantan ñawpaqtaqa ruwarqan, chaymantañan Evataqa.

¹⁴Manataqmi Adanchu q'otusqa karqan, aswanpas Evan q'otuchikuspa huchallikurqan.

¹⁵Ichaqa wawakunata uywaspan iñiypi, munakuypi, ch'uya-kaypi, allin yuyaypi ima, qaqata sayaspa qespichisqa kanqa.