Read DIOSPA QHELQACHISQ Quechua 1 TIMOTEO 5 Bible Online

1 TIMOTEO 5 - DIOSPA QHELQACHISQ Quechua bible

1 TIMOTEO 5

¹Kurak runataqa ama phiñarikuychu, aswanpas taytaykita hina yuyaychaykuy. Waynakunatapas wawqeykikunata hina rikuy,

²kurak warmikunatapas mamaykita hina rikuy, sipaskunatapas tukuy ch'uya-kaywan panaykikunata hina rikuy.

³Cheqaqpuni mana piniyoq viudakunataqa yanapaykuy.

⁴Ichaqa pi viudapas wawakunayoq nietokunayoq kan chayqa, paykunan ñawpaqtaqa Diospi iñiq hina familiankuta yanapaykunanku, ahinapin tayta-mamankumanpas uywasqankumanta chaninta kutichinanku, Diospas chaytapunin munan.

⁵Cheqaqpuni mana piniyoq viudaqa Diospin suyakun, mana p'itiyta mañakuspan tuta-p'unchay rogakun.

⁶Aychan kusichiyllapi puriq viudan ichaqa wañusqa hina kashan.

⁷Chaykunata kamachiy ama imamantapas anyasqa kanankupaq.

⁸Pipas ayllunta mana yuyarinchu, aswantaqa familianta mana uywanchu chayqa, cheqaq iñiymantan t'aqakapun, mana iñiyniyoq runamantapas aswan millayraqmi kapun.

⁹Viudakuna qelqana libropiqa soqta chunka kurak watayoq, ch'ulla qosaq warmin kaq viudallan qelqasqa kanan.

¹⁰Allin ruwasqankunapi reqsisqa kachun: wawankunata allin uywaq, qorpachayta allin yachaq, iñiq-masinkunata huch'uyyaykukuywan serviq, llakisqakunata sonqochaykuq, tukuy allin ruwaykunata hunt'aq.

¹¹Sipas viudakunata ichaqa amaraq libropi qelqaychu. Paqtan cuerponkuwan atipachikuspa wakmanta casarakuyta munankuman, hinaspa Cristomanta karunchakunkuman.

¹²Ahinapin prometekusqankuta p'akispa huchachasqa kankuman.

¹³Hinallataq wasin-wasinta purispa qella kayta yachankuman, manan qella kayllatapaschu aswanpas simi apa-kaytan yachankuman, tukuy imaymanaman chapukuspan mana rimanakunataraq rimankuman.

¹⁴Chayraykun sipas viudakunataqa casarakunankuta munani, wawakunayoq kanankuta, wasinkupi kaqkunatapas allinta kamachinankuta, ahinapi awqanchis ama huchachawananchispaq.

¹⁵Wakin viudakunaqa t'aqarikapuspankun Satanaspa qhepanta ripushanku.

¹⁶Mayqen iñiq warmiqpas[2] familian ukhupi viudakuna kan chayqa, yanapananmi chay viudakunata, manataqmi iglesiaq uywananpaqchu saqerparinan, ahinapin iglesiaqa cheqaqpuni mana piniyoq viudakunallata uywanqa.

¹⁷Iglesiapi allinta kamachiq umalli runakunaqa allin respetasqa, chanin pagasqapunin kananku, astawanqa Diospa siminta willaqkuna yachachiqkunapiwan.

¹⁸Diospa Simin Qelqan nin: “Erata saruq torotaqa aman senq'apankichu”, nispa. Qelqaqa nillantaqmi: “Llank'aqmanqa llank'asqanmanta paganapunin”, nispa.

¹⁹Umalli runata huchachaqtinkuqa iskaypas kinsapas testigo kallaqtinmi uyarinki.

²⁰Huchallapipuni kashaq runakunataqa llapa iñiqkunaq qayllanpi anyay, chay hinapin wakinkunapas manchakunqaku.

²¹Diospa qayllanpi, Señor Jesucristoq qayllanpi, akllakusqan angelkunaq qayllanpiwanmi kamachiyki, ama pimanpas sayapakuspa, ama ñawpaqmanta yuyaykusqaykiman hina ruwaspa chaykunata hunt'anaykipaq.

²²Iglesiapi llank'ananpaqqa ama pimanpas usqhaylla makiykita churaspa akllaychu, paqtan huchallikuqmasin rikhuriwaq. Qanqa ch'uyatapuni kawsay.

²³Wiksa nanayniyki hawa, sapa kuti onqosqaykiraykupiwan amaña unullatachu ukyay, aswanpas huk chhikan vinotawan ukyaykuy.

²⁴Wakin runaq huchankunaqa manaraq juzgasqa kashaqtinmi sut'inchakapunña, wakin runaq huchantaq ichaqa qhepataña rikhurin.

²⁵Chay hinallataqmi allin ruwasqakunapas sut'ipuni rikhurin, mana sut'i rikhuriq allin ruwasqakunapas manataqmi pakasqallaqa qhepakunmanchu.