Read DIOSPA QHELQACHISQ Quechua 2 TIMOTEO 4 Bible Online

2 TIMOTEO 4 - DIOSPA QHELQACHISQ Quechua bible

2 TIMOTEO 4

¹Jesucriston hamunqa qhapaqsuyunpi, wañuqkunatapas kawsaqkunatapas juzgananpaq, chaymi paypa qayllanpi Diospa qayllanpiwan tukuy sonqo kamachiyki:

²Diospa siminta willay, atikuqtinpas mana atikuqtinpas willallaypuni. Hinallataq tukuy pacienciawan yachachispa uyanchay, anyaykuy, kunaykuy.

³Hamuq tiempo chayamuqtinmi cheqaq yachachikuyta mana uyariytapas munanqakuñachu, aswanmi yanqa uyariyllata munaq kaspanku paykunaqa munayninkuman hina askha yachachiqkunata huñunqaku,

⁴hinaspan cheqaq-kayta mana uyariyta munaspa cuentokunata uyarinqaku.

⁵Qan ichaqa, tukuy imapipas allin yuyayniyoqpuni kay, ñak'ariykunata muchuy, Jesucristomanta allin willakuykunata willay, Diospa qosqan llank'anaykita allinta hunt'ay.

⁶Ñoqaqa sacrificasqa kanaypaqñan kashani, ripunay p'unchaypas qayllamushanñan.

⁷Allin maqanakuytan maqanakuniña, llank'anaytan tukuniña, iñiyniypin qaqata sayarqani.

⁸Kunanqa chanin kawsasqaymantan hanaq pachapi corona suyashawan, chaytan chanin Juez Señorqa taripay p'unchaypi qowanqa, manataq ñoqallamanchu, aswanpas paypa kutimunanta makillaña llapa suyaqkunamanpas qollanqataqmi.

⁹Imaynallamantapas usqhayllapuni watuykakamuway.

¹⁰Demasqa kay pacha kaqkunata munakuspanmi saqerpariwan, hinaspan Tesalónica llaqtata ripun. Hinallataq Crescentepas Galacia provinciata rin, Titotaq Dalmacia provinciata rin.

¹¹Lucasllañan ñoqawan kashan. Marcosta maskhamuspayki pusamuway, payqa kusatan llank'anapi yanapawanqa.

¹²Tiquicotaqa Efeso llaqtatan kachani.

¹³Hamuspaykiqa Troas llaqtapi Carpoq wasinpi saqemusqay capayta apamuwanki, hinallataq qelqa k'uyukunatapas, astawanqa qarapi qelqasqakunata.

¹⁴Herrero Alejandron imaymana mana allinkunata ruwaykuwarqan, Señormi ruwasqanman hina kutichipunqa.

¹⁵Qanpas chay runamanta cuidakuy, payqa sinchitapunin willasqanchis contra sayarirqan.

¹⁶Ñawpaqkaq kutipi llaqta kamachikuqkunaq ñawpaqenpi tupapakushaqtiyqa manan pipas ñoqawan karqanchu, llapallankun saqerpariwarqanku. Suyakushanin amapuni paykunataqa Dios huchachachunchu.

¹⁷Chaywanpas Señormi ñoqawan kasharqan, hinaspa kallpachawarqan, chaymi hunt'asqata allin willakuykunata willarqani llapa mana judío runakunaq uyarinanpaq. Ahinapin leonpa siminmanta hina qespichisqa karqani.

¹⁸Señormi tukuy mana allinkunamanta qespichiwanqa, hinaspan hanaq pacha qhapaqsuyunpi kanaypaq waqaychawanqa. Wiñay-wiñaypaq Señorqa hatunchasqapuni kachun. Amén.

¹⁹Priscata Aquilatawan napaykapuway, Onesiforoq wasinpi kaqkunatawan.

²⁰Erastoqa Corinto llaqtapin qhepakamurqan, Trofimotataq Mileto llaqtapi onqosqata saqemurqani.

²¹Manaraq paray tiempo chayamushaqtin hamuypuni imaynallamantapas. Napaykamusunkin Eubulo, Pudente, Lino, Claudia, hinallataq llapan wawqe-panakunapas.

²²Señor Jesucristo qanwan kachun, Diosninchis llapaykichista anchata saminchasunkichis.