Read DIOSPA QHELQACHISQ Quechua TITO 2 Bible Online

TITO 2 - DIOSPA QHELQACHISQ Quechua bible

TITO 2

¹Qan ichaqa, cheqaq yachachikuyman hina yachachiy.

²Kurak runakunata yachachiy kikinkuta allinta cuidakunankupaq, respetanapaq hina kawsanankupaq, allin yuyaywan purinankupaq, yachachillaytaq iñiypi, munakuypi, pacienciapipas allin kanankupaq.

³Kurak warmikunatapas yachachillaytaq Diospaq t'aqasqa hinapuni kawsanankupaq, ama yanqa-qasi tumpaq kanankupaq, ama machaq kanankupaq, aswanpas allinkaqta yachachiq kanankupaq.

⁴Ahinapin yachachinqaku sipas warmikunata qosanku munakuyta, wawanku munakuyta,

⁵allin yuyaywan puriyta, ch'uya kawsayniyoq-kayta, wasinkupi imallapas ruwakuyta, sumaq sonqo kayta, qosanku kasukuyta, chhaynapi ama pipas Diospa simin contra rimananpaq.

⁶Waynakunatapas yuyaychallaytaq allin yuyayniyoq kanankupaq.

⁷Tukuy imapi qan kikiyki allin ruwaykunata kawsayniykipi rikuchiy. Yachachispaykiqa tukuy sonqowan respetanapaq hina yachachiy,

⁸rimasqaykiqa mana huchachana cheqaqpuni kachun. Ahinapin qan contra sayariqkunapas p'enqakunqaku, manataq ima mana allintapas ñoqanchismanta rimanqakuchu.

⁹Kamachi runakunata yachachiy patronninkuta tukuy imapi kasukunankupaq, kusichiq kanankupaq, ama kutipakuq kanankupaqwan.

¹⁰Ama imatapas suwakuchunkuchu, aswanpas tukuy imapipas hunt'aqpuni kachunku. Qespichiqninchis Diosmanta yachachikuyqa tukuypi sumaqpuni kasqanta rikuchinankupaq.

¹¹Diosmi khuyapayakuyninta rikuchiwarqanchis, llapa runa qespichisqa kanankupaq.

¹²Chay khuyapayakuyninmi yachachiwanchis Diosta mana manchakuytapas, kay pachaq kaqninkunata sinchi munapayaytapas wikch'upuyta, hinaspa allin yuyaywan purispa, chaninta kawsaspa, Diosta manchakuspa kay pachapi kawsananchispaq.

¹³Chay hinata kawsashaspaqa kusisamiyoq suyakuyninchis hunt'akunantan suyakushanchis. Chay suyakuyninchisqa Jesucristoq qhapaq-atiyninpi rikhurimuyninmi. Paymi hatun Diosninchispas Qespichiqninchispas,

¹⁴paymi ñoqanchisrayku wañuyman entregaykukurqan tukuy mana allin ruwaykunamanta kacharichinawanchispaq, hinaspa huchamanta ch'uyanchasqan kaspa llaqtan kananchispaq, allin kaqkunata tukuy sonqo ruwananchispaq.

¹⁵Chaykunatan yachachinayki, tukuy atiywan kallpachaspa anyaspa ima. Amataq qantaqa pipas pisichachunchu.