Read DIOSPA QHELQACHISQ Quechua TITO 3 Bible Online

TITO 3 - DIOSPA QHELQACHISQ Quechua bible

TITO 3

¹Wawqe-panakunata yuyarichiy suyu kamachiqkunatapas llaqta kamachiqkunatapas kasukunankupaq. Paykunaqa kasukuq kachunku, tukuy ima allinkaqkunatapas usqhaylla ruway munaqtaq kachunku.

²Ama pimantapas millayta rimachunkuchu, amataq churanakuchunkuchu, aswanpas lliw runakunaman tukuy llamp'u-kayta rikuchispa sumaq sonqo kachunku.

³Ñoqanchispas ñawpaqqa mana yuyayniyoqmi karqanchis, mana kasukuqtaq, pantachisqataq, imaymana niraq munapayaykunapi aycha kusichiykunapi watasqa. Kawsarqanchispas mana allinpi, envidiakuspa, cheqnichikuspa, hukkuna-hukkunawan cheqninakuspa.

⁴Qespichiqninchis Diospa sumaq sonqo-kaynin, runakunapaq munakuyninpas rikhurimuqtinmi ichaqa

⁵qespichiwarqanchis, manan chaninkaqkunata ruwasqanchisraykuchu, aswanpas paypa khuyapayakuyninraykun. Paymi Santo Espirituwan mosoqmanta nacechiwaspanchis, mosoq kawsayta qowaspanchis maylliwarqanchis.

⁶Qespichiqninchis Jesucristowanmi payqa Santo Espirituta llimp'arishaqtapuni qowarqanchis.

⁷Ahinapin Diosqa khuyapayawaspanchis chaninchawanchis, chaymi suyakusqanchis wiñay kawsayta chaskisunchis.

⁸Kay simiqa cheqaqpunin. Chayraykun chaykunataqa allintapuni yachachinaykita munani, Diospi iñiq runakunapas allin ruwaykunata makilla ruwashanankupaq. Chaykunaqa kusapunin, runakunaq allinninpaqtaqmi kanpas.

⁹Ichaqa mana yuyayniyoq yanqa tapunakuykunamantapas, ñawpa taytakunaq suti qelqankumantapas, churanakuykunamantapas, kamachikuy simi hawa ch'aqwaykunamantapas t'aqakuy, chaykunaqa yanqan, manataqmi imapaqpas valenchu.

¹⁰Pipas iglesiata t'aqanachin chayqa, iskay kutikama anyay, manapuni kasukuqtin ichaqa ama payta chaskiyñachu.

¹¹Yachankiñan chay runaqa waqllisqa kasqanta, kikin huchallantaq huchachasqantapas.

¹²Artemasta otaq Tiquicota kachamuqtiyqa usqhayllan Nicópolis llaqtaman watukuqniy hamunki. Chaypin paray tiempota qhepakusaq.

¹³Zenas sutiyoq abogadota, Apolostawan puriyninkupi yanapaykuy, ama imankupas pisinanpaq.

¹⁴Iñiq-masinchiskunapas allin ruwaykuna ruwaytapuni yachachunku, imapipas pisichikuqta yanapaykunankupaq, ahinapin kawsayninkuqa hukkunapaq allin ruruq kanqa.

¹⁵Llapa ñoqawan kashaqkunan napaykamusunki. Munakuwaqninchis iñiq-masinchiskunata napaykapuwaychis. Diosninchismi llapaykichista anchata saminchasunkichis.