Read DIOSPA QHELQACHISQ Quechua HEBREOS 11 Bible Online

HEBREOS 11 - DIOSPA QHELQACHISQ Quechua bible

HEBREOS 11

¹Iñiyqa suyashasqanchista cheqaqtapuni chaskinanchispaq yuyaymi, mana rikusqanchistapas kashasqanpaqpuni yuyaymi.

²Ñawpa taytanchiskunapas chay hina iñiyniyoq kaspankun Diospa allinpaq hap'isqan karqanku.

³Iñiywanmi yachanchis Diospa siminwan hinantin pachakuna kamasqa kasqanta, kunan rikusqanchis kaqkunaqa mana rikusqamanta ruwasqan karqan.

⁴Iñiywanmi Abelqa aswan allin sacrificiota Diosman haywarqan Cainpa haywasqanmantaqa, chayraykun Diosqa payta chaninpaq hap'irqan, ofrendankunatapas chaskiykurqan. Chaymi Abelqa wañupunña chaypas chay iñiyninwan rimashallan.

⁵Iñiywanmi Enocqa kawsashaqlla hanaq pachaman apasqa karqan, manataq payta tarirqankuñachu, Dios payta apakapusqanrayku. Diospa Simin Qelqapin willakun manaraq apasqa kashaspaqa Diospa sonqonman chayaqtapuni kawsasqanta.

⁶Pipas mana iñiyniyoq kaspaqa manan Diospa sonqonman chayaqtapuni ruwayta atinmanchu. Chhaynaqa, pipas Diosman asuykuqqa iñinanpunin Diospa kasqanta, Diosqa maskhaqninkunata saminchaq kasqantapas.

⁷Iñiywanmi Noeqa manaraq rikusqakunamanta Dios willaqtin hina, manchakuywan kasukuspa arcata ruwarqan llapa familiantin qespichisqa kananpaq. Chay iñiyninwanmi payqa runakunata huchacharqan, iñiyllawantaqmi chanin kawsaytapas chaskirqan.

⁸Iñiywanmi Abrahamqa Diospa waqyasqanta kasukuspa llaqtanmanta lloqsimurqan, hinaspa puririrqan Diospa herencia qonan hallp'aman, ichaqa manan yacharqanchu maymanchus rishasqanta.

⁹Iñiywanmi Abrahamqa Diospa prometesqan hallp'api tiyarqan wak llaqtayoq hina. Payqa karpakunapin tiyarqan, pay hinallataqmi chay kikin prometesqata chaskiq Isaacpas Jacobpas karpakunapi tiyarqanku.

¹⁰Abrahamqa suyasharqan Diospa wakichispa sayarichisqan allin teqsiyoq llaqtatan.

¹¹Iñiywanmi kikin Sarapas payaña kashaspa atiyta chaskirqan wiksallikunanpaq, prometeqnin Diosqa hunt'aq kasqanta iñisqanrayku.

¹²Chhaynaqa, Abrahamqa yuyaqllaña kasharqan chaypas, mirayninqa karqan hanaq pachapi ch'askakuna hinan, lamar-qocha patapi aqo hina mana yupay atinan.

¹³Llapan chay runakunaqa iñishaspallan wañukapurqanku Diospa prometesqan kaqkunata manaraq chaskishaspa, ichaqa iñiyniyoq kaspankun karullamanta chaykunata qhawarirqanku, hinaspa kusikurqanku. Ahinapin kay pachapiqa purikuqkunalla kasqankuta sut'inchakurqanku.

¹⁴Chay hinata rimaqkunaqa sut'itan reqsichikunku llaqtayoq-kayta maskhashasqankuta.

¹⁵Maymantachus lloqsimusqanku llaqtata yuyashankuman karqan chayqa, atinkumanmi karqan chayman kutipuyta.

¹⁶Ichaqa aswan sumaqkaq llaqtatan munarqanku, hanaq pacha sumaq llaqtata. Chayraykun Diospas mana p'enqakunchu “paykunaq Diosnin” kayta, paykunapaqmi llaqtata wakichipurqan.

¹⁷Iñiywanmi Abrahamqa Diospa probasqan kaspa, Isaacta pusarqan sacrificiopi Diosman haywananpaq. Payqa manan sapan churinta sacrificiopi haywayta mich'akurqanchu, Diosña prometerqan:

¹⁸Isaac churiykipin mirayniyki kanqa, nispa chaypas.

¹⁹Abrahamqa yuyaykurqanmi Diosqa wañusqamanta kawsarichimpunanpaq atiyniyoq kasqanta. Chay hinaqa, huk rikch'anachiypin nisunman: Abrahamqa churintan chaskikapun wañusqamanta kawsarimpuqta hina, nispa.

²⁰Iñiywanmi Isaacqa Jacobta Esautawan samincharqan, imaynachus qhepaneqman kanankumanta rimaykuspa.

²¹Iñiywanmi Jacobqa wañukapushaspaña, Josepa churinkunata sapankata samincharqan, hinaspa Diosta yupaycharqan tawnanman q'emiykukuspa.

²²Iñiywanmi Joseqa wañukapushaspaña willarqan Israelpa mirayninkuna Egipto suyumanta lloqsipunankuta, hinaspan paypa tullunkunata apapunankupaq kamachikurqan.

²³Iñiywanmi Moisestaqa naceqtin hina tayta-maman kinsa killata pakarqanku, munay wawa kasqanrayku, manataq manchakurqankuchu reypa kamachikusqantapas.

²⁴Iñiywanmi Moisesqa hatunña kaspa mana munarqanchu Egipto rey Faraonpa ususinpa wawan nisqa kayta,

²⁵aswanmi Diospa llaqtanwan kuska muchuchisqa kayta yuyaykurqan, pisi p'unchaykunalla huchaq kusichikuyninpi kawsananmantaqa.

²⁶Egiptopi qhapaq kaymantaqa Cristoraykun pisichasqa kayta aswan qhapaq kaypaq hap'irqan, payqa samiyoq kaytan suyakusharqan.

²⁷Iñiywanmi Egiptomanta ripurqan reypa phiñakusqanta mana manchaspa. Payqa mana rikuna Diostan rikushanmanpas hina qhawaspa qaqata sayarqan.

²⁸Iñiywanmi Pascua Fiestatapas ruwarqan, hinallataq yawarwan punkukunata ch'aqchunapaqpas kamachikurqan, Israel runakunaq phiwi churinkunata chay wañuchiq ángel ama wañuchinanpaq.

²⁹Iñiywanmi Israel runakunaqa Puka Qochata ch'aki hallp'ata hina chimparqanku, Egipto runakunataq ichaqa chimpayta munaspanku unuq millp'usqan wañupurqanku.

³⁰Iñiywanmi Jericó llaqtaq muyuriq perqanpas thunikurqan, qanchis p'unchayta Israel runakuna muyuykuqtinku.

³¹Iñiywanmi rabona Rahab warmipas kawsarqan qhamiyaqkunata sumaqta chaskisqanrayku, manan mana kasukuqkunawan kuskachu wañurqan.

³²¿Imatataq astawan niyman? Manachá willaspa tukuyta atiymanchu Gedeonmanta, Baracmanta, Sansonmanta, Jeftemanta, Davidmanta, Samuelmanta, profetakunamantapas.

³³Iñiywanmi paykunaqa suyukunata atiparqanku, chaninninpi kamachikurqanku, Diospa prometesqankunata chaskirqanku, leonkunaq simintapas mukirqanku.

³⁴Sinchi manchana rawrashaq ninatan wañuchirqanku, filo espadawan wañuchinamantan ayqerqanku, pisi kallpakunapas kallpachakurqankun, awqa-tinkuypin ancha atiyniyoq rikhurirqanku, hinaspan awqankuq soldadonkunatapas pasaqta atiparqanku.

³⁵Warmikunapas wañuqninkutan kawsarichisqata chaskikapurqanku. Hukkunataq sinchi ñak'arichisqa wañukapurqanku, paykunaqa manan kacharichisqa-kayta munarqankuchu aswan allin kawsarimpuyta aypanankupaq.

³⁶Wakinmi asipayasqa soq'asqa karqanku, wakintaq cadenakunawan watasqa carcelpi rikukurqanku.

³⁷Wakinkunataq karqanku ch'aqesqa, serruchuwan kuchusqa, espadawan wañuchisqa, kayman chayman purirqanku oveja qarawan cabra qarawan p'istuykusqa, mana imayoq, sinchi llakichisqa, sinchi maqasqa ima.

³⁸Kay pachaqa manan paykunapaq hinachu karqan. Chaymi ch'inneqkunapi, orqo-orqopi, qaqa wasikunapi, hallp'a t'oqokunapipas chinkasqa purirqanku.

³⁹Llapallanmi chay runakunaqa iñisqankurayku allinpaq hap'isqa kashaspapas, Diospa prometesqanta mana chaskirqankuchu.

⁴⁰Diosmi ñoqanchispaq aswan allinkaqta yuyaykuspa wakichipuwarqanchis, paykunapas ñoqallanchiswantaq hunt'asqa kanankupaq.