Read DIOSPA QHELQACHISQ Quechua HEBREOS 2 Bible Online

HEBREOS 2 - DIOSPA QHELQACHISQ Quechua bible

HEBREOS 2

¹Chayraykun lliw uyarisqanchista makillapuni kasunanchis, paqtan chaykunamanta karunchakushasunman.

²Angelkunawan Diospa willachisqan simiqa atiyniyoqmi karqan, chaymi chay simita mana kasukuqkunapas huchallikuqkunapas chaskinankuman hinapuni muchuchisqa karqanku.

³Chhaynaqa, ¿imaynatataq ñoqanchisqa ayqekusunchis kay hatun qespikuyta pisipaq hap'isunchis chayqa? Kay qespikuy willakuytaqa kikin Señor Jesuspunin ñawpaqtaraq willasqa, chaymantañan payta uyariqkuna ñoqanchisman cheqaq kasqanta sut'inchawarqanchis.

⁴Diospas chay willawasqanchistaqa cheqaqcharqanmi señalkunata, milagrokunata, imaymana atiyniyoq ruwaykunata ruwaspa, munayninman hina Santo Espirituq atiy qokuyninkunata rakiwaspanchis.

⁵Diosqa manan angelkunatachu churarqan rimashanchis chay mosoqyachisqa hamuq pachata kamachinanpaq.

⁶Aswanpas huk cheqaspin Diospa Simin Qelqa nin: “Diosnilláy, ¿imataq runari payta yuyarinaykipaq? ¿Imataq wañuq runari paymanta llakikunaykipaq?

⁷Runataqa angelkunamanta as pisi sullk'amanmi tukuchirqanki, qollanata hinan paytaqa hatunchaykurqanki, [ruwasqaykikunapin payta munaychachirqanki].[1]

⁸Llapanta kamachinanpaqmi paytaqa churarqanki”, nispa. Chhaynaqa, lliwta kamachinanpaq runata churaspan, Diosqa tukuy imaymanawan payta kasuchirqan. Ichaqa manaraqmi rikunchischu runata tukuy imaymanaq kasusqantaqa.

⁹Chaywanpas Jesustaqa rikunchismi, paymi angelkunamanta as pisi sullk'aman tukuchisqa karqan, Diospa khuyapayakuyninpi llapa runarayku wañunanpaq. Paymi wañurqan, chayraykun munayniyoq Señor hina hatunchasqaña kashan.

¹⁰Tukuy imapas Diospa kamasqanmi, paypaqtaq lliw chaykunapas. Diosqa munanmi llapan wawankunata hanaq pachaman pusayta, chaymi payqa ñak'arisqanwan Jesusta hunt'asqata ruwarqan. Jesusmi qespikuy ñanninta paykunata pusaqqa.

¹¹Huchamanta ch'uyanchaqpas ch'uyanchasqa kaqkunapas llapallankun ch'ulla Yayallayoq kanku, chaymi Jesusqa mana p'enqakunchu paykunata “wawqeykuna” niyta.

¹²Paymi nin: “Wawqeykunamanmi sutiykita willasaq, huñunakuypin takispa yupaychasqayki”, nispa.

¹³Nillantaq: “Ñoqan Diosman hap'ipakusaq”, nispa. Hukpipas nillantaq: “Kaypin kashani Diospa qowasqan wawakunapiwan”, nispa.

¹⁴Chay hinaqa, imaynan wawakuna aychayoq yawarniyoq karqan, chay hinallataqmi Jesuspas aychayoq yawarniyoq kapurqan, ahinapi wañuchiq atiyniyoq saqrata wañuyninwan atipananpaq,

¹⁵hinaspa tukuy kawsasqanku p'unchaykunapi wañuyta manchakuspa kamachi hina kawsaqkunata qespichinanpaqwan.

¹⁶Jesusqa manan angelkunata yanapaqchu hamurqan, aswanpas Abrahampa mirayninta yanapaqmi hamurqan.

¹⁷Chaypaqtaq tukuy imapipas wawqenkuna hinapuni kanan karqan. Ahinapi Diospa ñawpaqenpi khuyapayakuq hunt'aq uma sacerdote karqan, runakunaq huchankunatapas wañusqan sacrificiowan pampachachinanpaq.

¹⁸Pay kikinmi ñak'arirqan wateqasqa kaspa, chayraykun payqa wateqasqakunatapas yanapayta atin.