Read DIOSPA QHELQACHISQ Quechua HEBREOS 3 Bible Online

HEBREOS 3 - DIOSPA QHELQACHISQ Quechua bible

HEBREOS 3

¹Chay hinaqa, Diospaq ch'uyanchasqa wawqe-panaykuna, hanaq pachapaq waqyasqa-masiykuna, allintapuni Jesuspi yuyaychis. Paymi Diospa kachamusqan, iñiyninchispi uma sacerdote.

²Payqa churaqnin Diospaq hunt'aqmi karqan, imaynan Moisespas Diospa llaqtanpaq hunt'aq karqan hina.

³Imaynan wasi sayarichiqqa ruwasqan wasinmantapas aswan hatunchasqa kan, chay hinatan Diospas Jesustaqa Moisesmantapas aswantaraq hatunchan.

⁴Llapa wasiqa runaq sayarichisqanmi, Diosmi ichaqa tukuy imaymanata ruwarqan.

⁵Cheqaqtapunin Moisesqa Diospa llaqtan ukhupi hunt'aq kamachi karqan, payqa rimarqan imakunatachus Diosqa qhepaman rimanqa chaykunatan.

⁶Criston ichaqa hunt'aq Churi kaspa Diospa llaqtanta kamachin. Chay llaqtaqa ñoqanchismi kanchis, p'uchukaykamachus mana manchakuspa qaqata sayasunchis chayqa, kusikuy suyakuyninchispipas allinta hap'ipakusunchis chayqa.

⁷Chayraykun Santo Espirituqa nin: “Kunan p'unchaychus Diospa kunkanta uyarinkichis chayqa,

⁸ama sonqoykichista rumiyachiychischu, imaynan ch'inneqpi wateqay p'unchaypi ñoqa contra sayarirqanku hinataqa.

⁹Chaypin ñawpa taytaykichiskuna probawaspanku wateqawarqanku, ruwasqaykunata tawa chunka wata rikushaspankupas.

¹⁰Chayraykun chay runa miraypaq phiñakurqani, hinaspan nirqani: Paykunaqa sonqonkupi pantashallankupunin, manataqmi ñanniykunatapas reqsinkuchu”, nispa.

¹¹Chaymi phiñakuspa jurarqani: Samakunankupaq qosqay hallp'amanqa manan hayk'aqpas haykunqakuchu, nispa.

¹²Wawqe-panaykuna, makilla cuidakuychis, paqtataq mayqenniykichispas mana iñiq hina millay sonqoyoq kaspa, kawsaq Diosmanta t'aqakuwaqchis.

¹³Aswanpas sapa p'unchay hukmanta-huk kallpachanakuychis, chay “kunan p'unchay” nisqa manaraq tukukushaqtin, paqtan mayqenniykichispas huchaq q'otusqan kaspa sonqoykichista rumiyachikuwaqchis.

¹⁴Cristowan herenciayoqmi kanchis qallariypi confiakusqanchispi p'uchukaykama qaqata sayasunchis chayqa.

¹⁵Chayraykun nin: “Kunan p'unchaychus Diospa kunkanta uyarinkichis chayqa, ama sonqoykichista rumiyachiychischu, wateqay p'unchaypi ñoqa contra sayarirqanku hinataqa”, nispa.

¹⁶¿Pikunataq karqan Diospa siminta uyarispaña Dios contra sayariqkunaqa? Chaykunaqa karqan Egiptomanta Moisespa pusamusqan llapa runakunan.

¹⁷¿Pikunawantaq Diosqa tawa chunka wata phiñasqa kasharqan? Chaykunaqa huchallikuqkunan karqan, paykunan ch'inneqpi wañurqanku.

¹⁸¿Pikunamantaq Diosqa jurarqan samakunankupaq qosqan hallp'aman mana haykunankupaq? Chaykunaqa karqan payta mana kasuqkunan.

¹⁹Chay hinaqa, yachanchismi mana iñisqankurayku mana haykuy atisqankuta.