Read DIOSPA QHELQACHISQ Quechua 1 PEDRO 4 Bible Online

1 PEDRO 4 - DIOSPA QHELQACHISQ Quechua bible

1 PEDRO 4

¹Chay hinaqa, imaynan Cristopas ñoqanchisrayku cuerpopi ñak'arirqan, chay hinallataqmi qankunapas ñak'arinaykichispaq wakichisqa kashanaykichis. Ñak'ariyta cuerpopi muchuqqa huchamantan t'aqarikapunña,

²chaymi tukuy kawsasqan p'unchaykunapiqa manaña runaq millay munayninman hinañachu kawsanan, aswanpas Diospa munayninman hinallañan.

³Ñawpa tiempopiqa askhatañan ruwarqankichis Diospi mana iñiq runakunaq ruwasqanta. Chay tiempopin kawsarqankichis viciokunapi, millay munaykunapi, machaykunapi, aychaq millay munayninkunapi, machay fiestakunapi, millakuy idolokunata yupaychaykunapi ima.

⁴Diospi mana iñiq runakunaqa musphaspan qhawasunkichis sinchi millay hucha ruwayninkupi mana paykunawan kuskachu ruwaysikusqaykichismanta, chaymi qankuna contrapas rimanku.

⁵Ichaqa, kawsaqkunatapas wañuqkunatapas juzgananpaq wakichisqa kashaq Diosmanmi paykunaqa cuentata qonqaku.

⁶Chaypaqmi wañusqakunamanpas allin willakuykunaqa willasqa karqan, llapa runa hina kay pachapi juzgasqa kananku kashaqtinpas, Diospa munasqanta hina espiritupi kawsanankupaq.

⁷Ichaqa tukuy imaymanaq tukukapuyninqa sispaykamushanñan. Chayrayku, qankunaqa allin yuyayniyoq kaychis, makilla kaychis, Diosmanta mañakunaykichispaq.

⁸Aswantaqa tukuy sonqo munanakuychis. Munakuyqa askha huchakunatan pampachan.

⁹Qorpachanakuychis ama rimapakuspalla.

¹⁰Sapankaykichismi Diospa qosqan atiy qokuyta chaskirqankichis, chaywan hukkunata serviychis, Diospa imaymana qokuyninkunawan allinta llank'aspa.

¹¹Pipas willan chayqa, Diospa siminkunata willachun. Pipas servin chayqa, Diospa qosqan atiyman hina servichun, tukuy ima ruwasqanpi Jesucristowan Diosqa hatunchasqa kananpaq. Paypan hatunchasqa-kaypas, hatun kamachikuypas wiñay-wiñaypaq. Amén.

¹²Munasqa wawqe-panaykuna, sinchi sasakunapiñan kashankichis, chaywanpas ama mancharikuychischu mana reqsisqa sasachakuykunapas kashanman hinaqa.

¹³Aswanpas kusikuychis Cristoq ñak'ariyninkunapi ñak'ariq-masin kasqaykichismanta, qhapaq-atiyninpi Cristo rikhurimuqtinpas anchatapuni q'ochukunaykichispaq.

¹⁴Cristoraykuchus k'amisqa kankichis chayqa, kusisamiyoqmi kankichis. Diospa atiyniyoq Espiritunmi qankunaman uraykamun.

¹⁵Mayqenniykichispas muchunkichis chayqa, ama muchuchunchu runa wañuchisqanmanta, suwakusqanmanta, mana allin ruwasqanmanta, hukpa ruwananman chapukusqanmanta muchuq hinaqa.

¹⁶Ichaqa pipas Cristopi iñisqanrayku muchun chayqa, ama p'enqakuchunchu, aswanpas Cristopi iñiq kasqanmanta Diosta yupaychachun.

¹⁷Ñan chayamunña Diospi iñiqkunamanta taripay qallarinan p'unchay. Ñoqanchismantachus taripay qallarin chayqa, ¿imaynaraqtaq kanqa Diospa allin willakuyninkunata mana kasukuqkunaq p'uchukayninqa?

¹⁸Chhaynaqa, chanin runachus ñak'ayllata qespikun chayqa, ¿imaynataq kanqa mana iñiqpas huchasapapas?

¹⁹Chayrayku, Diospa munayninman hina muchuqkunaqa prometesqanta hunt'aq kamaqninku Diosman kikinkuta hap'ichikuchunku, hinaspa allinkaqkunata ruwashallachunku.