Read DIOSPA QHELQACHISQ Quechua 2 PEDRO 2 Bible Online

2 PEDRO 2 - DIOSPA QHELQACHISQ Quechua bible

2 PEDRO 2

¹Israel llaqta ukhupipas karqanmi llulla profetakuna, chay hinallataqmi qankuna ukhupipas llulla yachachiqkuna kanqa. Paykunan pantachiq q'ewisqa yuyaykuyninkuta pakallapi yachachinqaku, ahinapin huchamanta kacharichiqninku Señortapas neganqaku. Chaykuna ruwasqankuwanmi paykunallataq qonqaylla ch'usaqyachisqa kapunqaku.

²Askhataqmi paykuna hina imaymana huchakunapi kawsanqaku, chaymi paykuna hawa cheqaq-kay ñanmantapas runakunaqa millayta rimanqaku.

³Chay yachachiqkunan qolqeta sinchita munaspanku llulla yachachikuyninkuta yachachispa qankunamanta qolqeta sik'isunkichis, ichaqa unay tiempomantañan paykunaqa huchachasqa karqanku, chaymi muchuchisqa kanankuqa usqhaylla hamushan.

⁴Diosqa manan pampacharqanchu huchallikuq angelkunatapas, aswanmi tutayaq Ukhu-pachaman wikch'uykurqan, hinaspa laqhayaq ukhuman watasqata wisq'aykurqan taripay p'unchaypaq waqaychasqa kanankupaq.

⁵Manallataqmi Diosqa ñawpa runakunatapas pampacharqanchu, aswanmi unuwan millp'uchirqan llapa waqllisqa millay runakunata, ichaqa chanin kawsaymanta willaq Noellatan qespichirqan, wakin qanchis runakunatawan kuskata.

⁶Hinallataq Sodoma Gomorra llaqtakunatapas thunisqa kanankupaq huchachaspa usphaman tukunankukama ruphachirqan, ahinapi chay qhepata kawsaq millay runakuna wananankupaq.

⁷Ichaqa chanin runa Lot-tan qespichirqan, chay waqllisqa runakunaq millay kawsayninkuwan llakichisqa kashasqanmanta.

⁸Chay chanin runaqa paykunawan tiyaspanmi millay mana chanin ruwasqankuta rikuspa uyarispa ima maytapuni sapa p'unchay sonqonpi llakikuspa kawsarqan.

⁹Chaywanpas Señorqa yachanmi payta manchakuqkunata sasachakuymanta qespichiyta, mana chanin runakunatataq taripay p'unchaypi ñak'arichisqa kanankupaq waqaychayta.

¹⁰Astawanqa muchuchinqa aychaq millay munaynin qhelli-kaypi kawsaqkunata, Diospa kamachikuq-kayninta pisichaqkunatapas. Chaykunaqa mana p'enqakuspa k'ankaykachaq k'ullukunan kanku, manataqmi manchakunkuchu hanaq pachapi atiyniyoqkuna k'amiytapas.

¹¹Ichaqa kikin angelkunapas aswan kallpayoq atiyniyoq kashaspankupas manan chay atiyniyoqkunataqa Señorpa ñawpaqenpi k'amispa huchachankuchu.

¹²Chay runakunaqa uywa hina mana yuyayniyoqmi kanku, cuerponkuq munasqanman hinallan kawsanku, nacenkupas hap'ispa wañuchisqa kanankupaqmi, mana entiendesqankuta ñakaspankutaq waqllisqankupi wañunqaku.

¹³Hukkunata ñak'arichisqankuman hinan ñak'arinqaku. Paykunaqa p'unchaypacha mana chanin chinkay kawsaypi purisqankuwan q'ochukunku. Qankunawanraqtaqmi paykunaqa mikhunankupaq huñukunku, ichaqa sinchi p'enqaymi millaymi kanku, qankunata q'otuspataq kusikunku.

¹⁴Warmita rikuspaqa wasanchay huchatan ruwayllataña munanku, manataqmi huchallikuywan amikunkuchu. Iñiypi mana takyasqa runakunaq sonqontan suwanku. ¡Imaymanata munapayanapaqmi allin yachachisqa kanku! ¡Diospa ñakasqan runakunan kanku!

¹⁵Cheqaq ñanmanta waqllispan chinkapunku, Beorpa churin profeta Balaampa kawsasqanta hinan kawsanku, paymi mana chaninta ruwaspa qolqellata tariyta munarqan,

¹⁶chaymi mana rimaq china asnopas, runa hina rimarispa mana chanin ruwasqanmanta k'amirqan, ahinapin profetaq mana yuyayniyoq kayninta hark'arqan.

¹⁷Chay runakunaqa mana unuyoq pukyukuna hinan kanku, sinchi wayraq apamusqan phuyu hinan kanku, paykunaqa laqha tutayaqpi wiñay kanankupaq huchachasqañan kanku.

¹⁸Anchaykachaq yanqa simikunatan rimanku, aychaq millay munayninman hina chinkaypi kawsanankupaq yuyaychanku, pantaypi kawsaqkuna ukhumanta ayqekapushaq runakunatapas q'otunku.

¹⁹Kacharichisqa-kaytan paykunaman prometenku, ichaqa paykuna kikinkun qhelli kawsaypa watasqan kanku. Pipas atipachikun chayqa, chay atipaqninpa kamachinmi kapun.

²⁰Qespichiq Señor Jesucristota reqsishaspaña kay pachaq qhelli-kayninmantapas ayqeshaspaña, wakmanta chaykunapi waqllispa atipachikunqaku chayqa, aswan mana allinraqmi kanqaku ñawpaq kasqankumantaqa.

²¹Paykunapaqqa aswan allinmi kanman karqan chanin-kay ñanta mana reqsiyninku, chayta reqsishaspaña paykunaman qosqa ch'uya kamachikuymanta t'aqarikapunankumantaqa.

²²Kay rikch'anachiy simin paykunapi hunt'akun: “Alqon kutichimusqanta mikhuykakapun”. “Chayllaraq mayllisqa khuchipas t'urumanmi qhospaykapun”, niq.