Read DIOSPA QHELQACHISQ Quechua 1 JUAN 1 Bible Online

1 JUAN 1 - DIOSPA QHELQACHISQ Quechua bible

1 JUAN 1

¹Qallariypin Kawsay Simiqa kasqapuniña. Chay Simitaqa uyarirqaykun, ñawiykuwanmi rikurqayku, qhawarqayku, makiykuwantaq llamiykurqaykupas, chaykunamantan qelqamuykichis.

²Chay kawsaymi rikuchikurqan, chaymi ñoqayku rikuspayku willarqayku, hinaspan chay wiñay kawsaymanta qankunamanpas willamuykiku, chay kawsaymi Yayawan kasharqan hinaspa ñoqaykuman rikuchikuwarqanku.

³Imatachus rikurqayku, uyarirqayku chaytan willamuykiku, qankunapas ñoqaykuwan huk sonqolla kanaykichispaq. Cheqaqtapuni huk sonqolla kayninchisqa Dios Yayawan Churin Jesucristopiwanmi.

⁴Chaykunatan qankunaman qelqamuykichis q'ochukuyninchis hunt'asqa kananpaq.

⁵Jesucristomanta yachaqasqayku willakuytan willamuykiku: Diosqa k'anchaymi, manataqmi huk chhikan laqhayaqllapas paypiqa kanchu.

⁶Laqhayaqpi kawsashaspa “Dioswanmi huk sonqolla kashani” nisunman chayqa, llullakunchismi, manataqmi Diospa cheqaq-kayninman hinachu kawsanchis.

⁷Ichaqa k'anchaypichus kawsanchis Diospa k'anchaypi kasqanta hina chayqa, huk sonqollan kanchis hukkuna hukkunawan, Churin Jesucristoq yawarnintaq tukuy huchamanta ch'uyanchawanchis.

⁸“Manan huchayoqchu kani” ninchis chayqa, ñoqanchis kikinchistan q'otukunchis, manataqmi Diospa cheqaq-kayninqa sonqonchispi kanchu.

⁹Ichaqa huchanchiskunatachus Diosman willakusun chayqa, Diosqa hunt'aqmi chanintaqmi huchanchiskunata pampachawananchispaq, tukuy mana chanin-kayninchistapas ch'uyanchawananchispaq.

¹⁰“Manan huchallikunichu” ninchis chayqa, Diostan “llulla” nishanchis, manataqmi siminqa sonqonchispi kanchu.