Read DIOSPA QHELQACHISQ Quechua 1 JUAN 5 Bible Online

1 JUAN 5 - DIOSPA QHELQACHISQ Quechua bible

1 JUAN 5

¹Pipas Jesusqa Cristo kasqanta iñiqqa Diospa wawanmi. Taytata munakuqqa chay taytaq wawankunatapas munakullantaqmi.

²Diosta munakuspanchis kamachikusqankunatapas hunt'aspanchismi Diospa wawankunata munakusqanchistaqa yachanchis.

³Diosta munakuspanchisqa kamachikusqankunatan kasukunchis, kamachikuyninkunaqa manataqmi sinchi sasachu.

⁴Pipas Diospa wawan kaqqa kay pachatan atipan, kay pachata atipachiqninchisqa iñiyninchismi.

⁵¿Pitaq kay pachata atipaqqa? Jesusqa Diospa Churin kasqanta iñiqllan.

⁶Jesucristoqa kay pachaman hamuspa unuwanmi bautizachikurqan, wañuspataq yawarninta hich'arqan. Payqa manan unullawanchu hamurqan, aswanpas yawarpiwanmi. Kikin Santo Espiritun chaykunataqa sut'ita willakun, payqa cheqaqpunin.

⁷Willaqkunaqa kinsan: [Hanaq pachapi… Yaya, Simi, Santo Espíritu, chay kinsantinqa ch'ullallan][1]

⁸Espíritu, unu, yawarpiwan, chay kinsantinqa huk-nisqallan kanku.

⁹Runakunaq willawasqanchistaqa creenchismi, Diospa willawasqanchistaqa aswantaraqmi creenanchis. Kikin Diosmi pichus Churin kasqantaqa willawarqanchis.

¹⁰Diospa Churinpi iñiqqa Diospa willakusqanta chaskispan sonqonpi waqaychan, Diospi mana iñiqmi ichaqa Churinmanta willasqan willakuyta mana chaskispa Diosta llullapaq hap'in.

¹¹Chay willakusqanman hinan Diosqa qowarqanchis wiñay kawsayta, chay kawsaytaqmi Churinpi kashan.

¹²Pipas Diospa Churinwan hukllachasqa kashaqqa wiñay kawsayniyoqmi, pipas Diospa Churinwan mana hukllachasqa kaqmi ichaqa mana wiñay kawsayniyoqchu.

¹³Chaykunatan qankunaman qelqamuykichis Diospa Churin Jesucristopi iñiqkunaman, wiñay kawsayniyoq kasqaykichista yachanaykichispaq.

¹⁴Ñoqanchisqa Diosman asuykuspan allintapuni yachanchis, munayninman hina imatapas Diosmanta mañakuqtinchisqa pay uyariwananchista.

¹⁵Ima mañakusqanchistapas Diospa uyariwasqanchistaqa yachanchismi, tukuy mañakusqanchiskunata chaskinanchistapas yachallanchistaqmi.

¹⁶Pipas iñiqmasinta rikunqa wañuyman mana aysaykuq hucha ruwashaqta chayqa, mañapunanmi, hinan Diosqa payman kawsayta qonqa wañuyman mana aysaykuq hucha kasqanrayku. Kanmi wañuyman aysaykuq hucha, chay huchapaqqa manan “Diosmanta mañapunan” ninichu.

¹⁷Tukuy mana chanin ruwayqa huchan, ichaqa kanmi wañuyman mana aysaykuq hucha.

¹⁸Yachanchismi Diospa wawanqa manan huchallikushallanchu. Paytaqa Diospa Churinmi waqaychan, chaymi saqrapas mana imananpaschu.

¹⁹Yachanchismi Diospa kasqanchista, lliw kay pachataq saqraq munaychakusqan kashasqantapas.

²⁰Yachallanchistaqmi Diospa Churin hamusqanta, paymi yuyayta qowanchis cheqaq Diosta reqsinanchispaq. Cheqaqkaqwan hukllachasqan kashanchis Churin Jesucristowan hukllachasqa kashasqanchisrayku. Jesucriston cheqaq Diospas, wiñay kawsaypas.

²¹Wawallaykuna, idolokunataqa amapuni yupaychaychischu.