Read DIOSPA QHELQACHISQ Quechua JUECES 11 Bible Online

JUECES 11 - DIOSPA QHELQACHISQ Quechua bible

JUECES 11

¹Jefteqa Galaad suyumanta kallpasapa allin qharin karqan, payqa rabona warmiq wachakusqan Galaad sutiyoq runaq churinmi karqan.

²Galaadpa warmintaq churikunata wachakurqan, chaykunan wiñarqarispa Jeftetaqa taytanpa wasinmanta qarqorqanku: Manan taytanchispa imanpas qanpaqqa kananchu, qanqa wak warmiq wawanmi kanki, nispanku.

³Chaymi Jefteqa wawqenkunamanta ayqekapuspa Tob llaqtaman ripurqan. Chaypin qella, tumaqaya runakunata huñuspa paykunaq umallin kapurqan.

⁴Chay pisi killakunamanta hinataq Amón runakunaqa Israel runakunaman phawaykurqanku.

⁵Hinan Galaadpi kurak taytakunaqa Tob llaqtata rirqanku Jefteta pusamunankupaq,

⁶hinaspan nirqanku: — Haku ripusun, Amón runakunawan awqa-tinkuypi qollanayku kanaykitan munayku, nispa.

⁷Jeftetaq paykunata nimurqan: — Qankunaqa cheqnikuspan taytaypa wasinmanta qarqowarqankichis, ¿kunantaqchu sonqo nanay llakikuypi rikukuspaykichis maskhaqniyraqtaq hamuwankichis? nispa.

⁸Galaad kurak taytakunataq nirqanku: — Arí, chaywanpas qan maskhaqpunin puririmuyku. Haku ripusun. Amón runakunawan awqa-tinkuypi tupaysimuwayku, hinallataq Galaadpi llapaykuq qollanayku kapunki, nispanku.

⁹Hinan Jefteqa paykunata nirqan: — Qankunapunitaq llaqtayman pusawankichis Amón runakunawan maqanakuqta, chaypitaq Señor Diosqa ñoqawan atipachiwanqa chayqa, ñoqan qankunaq qollanaykichis kapusaq, nispa.

¹⁰Chaymi kurak taytakunaqa kutichirqanku: — Señor Diosmi uyarishawanchis, nisqaykiman hinapunin ruwasaqku, nispa.

¹¹Hinan payqa llaqta taytakunawan kutimpurqan, paykunataq qollanankupaq Mizpapi churakapurqanku, chaypitaq Jefteqa ñawpaq rimasqankuta Señor Diospa ñawpaqenpi wakmanta nillarqantaq.

¹²Chaymantataq Jefteqa Amón runakunaq reyninman willaqkunata tapumunanpaq kacharqan: ¿Iman qan ñoqawan ruwanayki, chaymi suyuykamaraq maqanakuq phawaykamuwanki? nispa, nimunankupaq.

¹³Chaymi Amón runakunaq reyninqa Jeftepa willaqninkunata nimurqan: — Egiptomanta hamushaspankun Israel runakuna hallp'aykuta qechuwarqanku, Arnón mayumanta Jaboc mayukama, chaymantapas Jordán mayukamaraq. Kunanqa sumaqllapi chay hallp'aykuta kutichipuwayku, nispa.

¹⁴Chaymantan Jefteqa Amón runakunaq reyninman willaqkunata wakmanta kacharqan:

¹⁵Kay hinatan Jefteqa nin: Israel runakunaqa manas qechusqakuchu Moab hallp'atapas Amón hallp'atapas.

¹⁶Egiptomanta hamushaspankuqa, ch'inneqnintas hamusqaku Puka Qochaman chayamunankukama, chaymantapas Cadesmansi chayasqaku.

¹⁷Hinaspas Israel runakunaqa Edom reyman kachasqaku: Ama hinachu kay, hallp'ayki chawpillanta pasakusaqku, nispa, niqta. Hinas Edom reyqa mana munasqachu, chaymantapas Moab reyman kachallasqataqsi, manallataq chay reypas munasqachu, chayraykus Israel runakunaqa Cadesllapiña qhepakapusqaku.

¹⁸Chaymantataqsi ch'inneqninta rispa, Edom suyuq Moab suyuqpiwan qorpantakama muyusqaku, Moab suyu inti lloqsimuy ladoman chayasqaku, hinaspas Arnón mayuq wichayninpi karpakusqaku. Hinas Moab hallp'amanqa mana haykusqakuchu, chay mayu qorpa kasqanrayku.

¹⁹Chaymantas kachallasqakutaq Amor runakunaq reynin Hesbonpi kaq Sehonman: Ama hinachu kay, hallp'ayki chawpillanta pasakusaqku hallp'aykuman ripunaykupaq, nispa, niqta.

²⁰Hinas Sehonqa mana munallasqataqchu hallp'ankuq chawpin pasanankuta, aswansi llapan soldadonkunata huñurqospa, Jahazaman rispa karpakusqaku, hinaspataqsi Israelwan maqanakusqa.

²¹Israelpa Diosnin Señortaqsi ichaqa Israelwan atipachipusqa rey Sehonta soldadonkunatawan, hinaspas llapan Amor runakunaq hallp'anta Israel runakunaqa hap'ikapusqaku,

²²Arnón mayumanta Jaboc mayukamaraq, ch'inneqmantapas Jordán mayukamaraq.

²³Chay hinaqa, Israelpa Diosnin Señormi Amor runakunamanta qechuspa, Israel runakunaman hallp'ankuta qosqa. ¿Chaytachu qanqa qechuyta munawankiku?

²⁴Qankunapas Quemos diosniykichispa qosqantaqa manan kacharikuwaqchischu riki, chay hinallataqmi ñoqaykupas Diosniyku Señorpa qowasqankutaqa manapuni kacharillasaqkutaqchu.

²⁵¿Qanri aswan allinchu kayta munanki Moab rey Ziporpa churin Balacmanta? Paypas manan Israel runakunawan churanakurqanchu, manallataqmi maqanakurqanpaschu.

²⁶Kinsa pachak watañan Israel runakunaqa tiyashayku Hesbón llaqtapi ayllunkunantinpi, kaqllataq Aroer llaqtapi llapa ayllunkunallantinpitaq, Arnón mayu patapi llapan llaqtakunapipas. ¿Imanaqtintaq mana chay p'unchaykunapiraqchu qechukapurqankichisri?

²⁷Ñoqaqa manan qantaqa rimapayaykichu, qanmi aswan mana allintaqa ruwashawankiku ñoqaykuwan maqanakuq hamuspayki, ichaqa Señor Diosmi chaninchaqqa, paypuni chaninchachun Israel runakunata Amón runakunatawan, nispa, niqta.

²⁸Chaywanpas Amón runakunaq reyninqa manan kasukurqanchu Jeftepa willachisqanta.

²⁹Hinan Señor Diospa Espiritunqa Jefteman hunt'aykurqan. Chaymi payqa Galaad hap'iyta Manasés aylluq hallp'anta muyurqamurqan, hinaspan Mizpa llaqtaman rirqan. Chaymantataq Amón runakunaq hallp'anman chimparqan.

³⁰Chaypitaq Señor Diosman prometekurqan: Ñoqamanchus Amón runakunata hap'ichiwanki chayqa,

³¹paykunata atiparqospa kutipushaqtiy, mayqenchus wasiymanta ñawpaqta taripamuwanqa, chaytan qanman ruphachina sacrificiota haywamusqayki, nispa.

³²Hinaspan Jefteqa mayuta chimparqospa Amón runakunawan maqanakurqan, Señor Diostaq paywan atipachirqan.

³³Chaymi Jefteqa askhatapuni awqankunata wañurachirqan, hinaspan hap'ikapurqan iskay chunka llaqtakunata, Aroermanta Minitninta Abel-keramimkama. Chay hinapin Israel runakunaqa Amón runakunata k'umuchirqanku.

³⁴Mizpapi wasinman Jefteqa kutipuqtintaq, sapallan ususin payman chaskiq lloqsimurqan tusukuspa tinyata tocakuspa. Payllapunitaq sapallan wawan karqan,

³⁵chaymi ususin hamushaqta rikurqospa, llakikuymanta p'achanta llik'ikurqan, nirqantaq: — ¡Imaraqmi wawalláy! ¡Qanraqtaq hamunkipas kay llakiman churaykuwanaykipaq! Kunanri, ¿imanaykusaqtaq? Señor Diosmanmi prometekurqani, chaytaqa hunt'asaqpunin, nispa.

³⁶Ususintaq nirqan: — Papáy, ñataq Señor Diosta nirqankiña chayqa, ñoqawan hunt'allay, ñataq Señor Diospas awqayki Amón runakunata atipanña chayqa.

³⁷Chaywanpas ama hinachu kay, iskay killata suyaykuway orqon-orqonta sipasmasiykunawan purimunaypaq wawayoq-kayman manaraq chayasqaymanta waqaspay, nispa.

³⁸Jefteqa ususinta nirqan: — Wawalláy, riyyá, nispa, kacharparipurqan iskaynin killantin. Chay killakunapitaq sipasmasinkunawan orqon-orqonta purimurqan wawayoq-kayman manaraq chayasqanmanta waqaspa.

³⁹Iskaynin killa tukukuqtintaq taytanman kutimpurqan, paytaq ima rimarisqanta Diosman hunt'apurqan, ususinqa doncellallaraqmi karqan.

⁴⁰Chay p'unchaymantan Israelpi sipaskuna watapi huk kuti tawa p'unchaynintinta Jeftepa ususinmanta orqota waqaq riqku.