Read DIOSPA QHELQACHISQ Quechua JUECES 17 Bible Online

JUECES 17 - DIOSPA QHELQACHISQ Quechua bible

JUECES 17

¹Huk runan karqan Micaías sutiyoq Efraín orqo-orqopi tiyaq.

²Paymi mamanta nirqan: — Waranqa pachakniyoq qolqeykitan suwachikurqanki, hinan chay suwaqniykita ñakarqanki, chay qolqeykitaqa ñoqan suwakurqani, makiypin kashan, nispa. Mamantaq payta nirqan: — Wawalláy, Señor Diosmi saminchasunki, nispa.

³Churintaq chay waranqa pachaknin qolqeta mamanman kutichipurqan, hinan payqa churinta nirqan: — Ñoqaqa Señor Diosmanmi kay qolqeta qopusaq amaña qanman ñakayniy chayanasuykipaq, chay hinaqa, kay qolqeta pagaspa qolqewan llunch'isqa idolota ruwachimusaq. Kayqa qolqeta qosqayki, nispa.

⁴Mamanman qolqenta kutichipuqtintaq, mamanqa iskay pachak qolqeta apaspa qolqe unuyachiqman qorqan. Hinan qolqe unuyachiqqa qolqewan llunch'isqa idolota ruwarqan, chaytataq Micaiaspa wasinpi churarqan.

⁵Micaiaspa wasinpin yupaychana wasi kasqa. Paytaq ruwarqan sacerdoteq churakunan Diospa munaynin tapuna unkuta, wasipi kaq dioskunatapas. Hinaspan hukkaq churinta sacerdote kananpaq churaykurqan.

⁶Chay p'unchaykunapin Israel runakunaqa mana reyniyoq kasharqanku, sapanka runan ima munasqankuta ruwasharqanku.

⁷Chaypachan Judá aylluq Belén llaqtanpi Leví ayllu wayna tiyasharqan.

⁸Paymi Belenmanta puririmurqan wak tiyanata maskhaspa. Efraín orqo-orqopi purishaspataq Micaiaspa wasinman chayarqan.

⁹Hinan Micaiasqa tapuykurqan: — ¿Maymantan hamushanki? nispa. Waynataq kutichirqan: — Ñoqaqa Leví ayllu runan kani, Judá aylluq Belén llaqtanpi tiyaq, kunantaq wak tiyanata maskhakushani, nispa.

¹⁰Hinan Micaiasqa nirqan: — Wasiypi tiyakushasun, taytay hina kapuwanki, sacerdoteraqtaq kankipas. Sapa watan chunka qolqeta pagasqayki, mikhuchisqayki p'achachisqayki ima, nispa.

¹¹Leví ayllu waynataq Micaiasta nirqan: — Arí, tiyakusunmi, nispa. Churin hinataq kapurqan.

¹²Hinan Micaiasqa chay Leví ayllu waynata sacerdotenpaq churakurqan, waynapas chaypi tiyananpaq qhepakapurqan.

¹³Micaiastaq nirqan: — Leví runa sacerdoteyoq kaqtiyqa, Señor Diosmi allintapuni saminchawanqa, nispa.