Read DIOSPA QHELQACHISQ Quechua JUECES 19 Bible Online

JUECES 19 - DIOSPA QHELQACHISQ Quechua bible

JUECES 19

¹Chay p'unchaykunapin Israel suyuqa mana reyniyoq kasharqan. Efraín orqo-orqomanta aswan ukhuneqpin Leví ayllumanta huk runa tiyakuq. Paymi Judá aylluq Belén llaqtanmanta huk sipasta tiyaqmasin kananpaq pusakurqan.

²Chay warmitaqmi ichaqa phiñarqokuspa Belenpi taytanpa wasinman pasakapurqan, chaypitaq tawa killantin tiyamurqan.

³Chaymantataq qosanqa kamachinta pusarikuspa iskay asnonta qatiykukuspa qhepanta puririrqan warminta sumaqta rimaykuspa pusakampuq. Chayaqtintaq warminqa pusaykurqan, taytanpas payta rikuspa mayta kusikuspa chaskiykurqan.

⁴Suegrontaq hark'arqan qhepakunanpaq, hinan mikhurqanku ukyarqanku chaypi puñupurqanku, paytaq kinsa p'unchayta qhepakurqan.

⁵Tawakaq p'unchaypitaq tutallamanta sayarispa ripunanpaq q'epichakurqan, suegrontaq ichaqa hark'aykurqan: — Imallatapas mikhuykuyraq, chaymantaña ripunkichis, nispa.

⁶Hinan suegrontin tiyaykuspa mikhurqanku ukyarqanku, suegrontaq qatayninta nirqan: — Kunan tutatawan kaypi puñukuy, hinaspa kusikunki, nispa.

⁷Wakmanta ripunanpaq sayariqtintaq, suegronqa hark'aykurqan, hinan payqa qhepakurqan.

⁸Phisqakaq p'unchaytaq tutallamanta sayarillarqankutaq, hinan wakmanta suegronqa hark'aykullarqantaq: — Ama pasapuyraqchu, imallatapas mikhuykunkiraq, huk chhikanta suyaykuyraq, nispa. Chaymi paykunaqa tiyaykuspa mikhurqanku.

⁹Wakmanta Leví ayllu runa warmintin kamachintin ima ripunanpaq sayariqtintaq, suegronqa hark'allarqanpunitaq: — Qhawariy intita, kay horasñamá, kay tutatawan qhepakuy kusikunaykichispaq, paqarinña ichaqa tutallamanta wasiykiman ripunkichis, nispa.

¹⁰Leví ayllu runataq ichaqa mana qhepakuyta munaspa pasapurqanpuni iskaynin caronayoq asnontin, tiyaqmasin warmintin, kamachintin ima.

¹¹Manaraq inti haykuytataq Jerusalén nisqa Jebusman qayllaykurqanku, hinan kamachiqa nirqan: — Haku, Jebus runakunaq llaqtanman qorpachakuq haykusun, nispa.

¹²Leví ayllu runataq kutichirqan: — Manan wak runakunaq llaqtanmanqa mayqenmanpas haykusunmanchu, paykunaqa manan Israel runakunachu kanku. Rillasun Gabaakama,

¹³hinaspa qorpachakusun Gabaa llaqtapipas otaq Ramapipas, nispa.

¹⁴Ahinapin inti haykuyllataña Benjamín aylluq Gabaa llaqtanman chayarqanku.

¹⁵Ñanmanta t'aqarikuspataq qorpachakunankupaq Gabaa llaqtaman haykurqanku, hinaspan plaza pampapi tiyaykurqanku, manataq pillapas: Qorpachasqayki, nirqanchu.

¹⁶Tutayaykuytañataq huk yuyaq runa chakramanta hamusharqan, payqa Efraín orqo-orqomantan karqan, Benjamín aylluq Gabaa llaqtanpi tiyakuq.

¹⁷Chay yuyaq runataq purikuq runa plazapi tiyashaqta rikuspa chimpaykurqan, tapuykurqantaq: ¿Maymantan hamushankichis? ¿Maytataq rishankichisri? nispa.

¹⁸Paytaq nirqan: — Tutayarqachikuykun. Judá aylluq Belén llaqtanmantan hamushayku, Efraín orqo-orqoq ukhun tiyasqaymanraqmi kutipushayku. Belenpi kasqaykumantan kutipushayku, ichaqa manan mayqenpas: Qorpachasqayki, niwankuchu.

¹⁹Kashanmi q'achupas ichhupas asnoykupaq, kashallantaq t'antapas vinopas warmiypaq, runaypaq, ñoqapaqpas, imaykupas kashankaman, nispa.

²⁰Hinan yuyaq runaqa kutichirqan: — Allinpunin, chay hinaqa, hakuyá wasiyta, ima munasqaykitan qosqayki, manan munaymanchu plazapi illarinaykitaqa, nispa.

²¹Hinan wasinman pusarikurqan, chaypitaq asnokunaman qaraykurqan. Paykunataq chakinkuta maqchikurqanku, chaymantataq mikhurqanku ukyarqanku.

²²Allin kusisqaña kashaqtinkutaq, chay llaqta millay runakunaqa hamurqospa chay yuyaq runaq wasinta muyuykurqanku, wakintaq punkuta takaspa nirqanku: — ¿Maymi chay qorpachasqayki runa? Horqomuwayku t'inkikunaykupaq, nispanku.

²³Wasiyoq taytataq lloqsimuspa paykunata nirqan: — Wawqeykuna, amayá kay millaytaqa ruwaychischu, kay runaqa wasiypin qorpachakushan.

²⁴Kayqa ususiy kashan, mana qhariwan kaqraq, kashallantaq kay runaq warminpas. Kunanpacha paykunata horqomusqaykichis ima munasqaykichista ruwanaykichispaq. Kay runata ichaqa amapuni chay millaytaqa ruwaychischu, nispa.

²⁵Chay runakunataq mana uyariq tukurqanku, chaymi Leví ayllu runaqa warminta paykunaman horqorqan. Hinan chay runakunaqa chay warmita ima munasqankuta ruwaspa violarqanku illariq tutantin, illarimuytataq wikch'upurqanku.

²⁶P'unchayamuqtintaq warmiqa hampurqan chay qorpachasqa kasqanku wasipi qosanpa kasqanman, punkuman chayamuspataq laq'akuspa wikch'urayapusharqan.

²⁷Qosantaq tutallamanta sayarispa punkuta kicharikamurqan wakmanta puririnanpaq, hinan punku haykunapi tiyaqmasin warmiqa laq'arayapushasqa, punku sarunaman makinkunata churaykuspa.

²⁸Paytaq nirqan: — Sayariy, haku ripusun, nispa. Warmiqa manan rimarirqanñachu. Hinan payqa warminpa ayanta asnonman cargaykuspa wasinman apakapurqan.

²⁹Wasinman chayaspataq warminpa ayanta cuchillowan chunka iskayniyoqman kuchurqarirqan, chaytataq apachirqan Israel runakunaq tiyasqankunaman.

³⁰Hinan chayta llapan rikuqkuna nirqanku: — ¡Egiptomanta Israel runakunaq lloqsimusqanmanta kunankamaqa manan kay hina rikukurqanraqchu! ¡Manan hayk'aqpas kay hinaqa karqanraqchu! Kunanri, ¿imanasuntaq? ¡Manan hinallaqa kanmanchu! ¿Ima ruwananchistapas yuyaykusunpunin? nispa.