Read DIOSPA QHELQACHISQ Quechua JUECES 21 Bible Online

JUECES 21 - DIOSPA QHELQACHISQ Quechua bible

JUECES 21

¹Israel runakunan Mizpapi huñukushaspanku jurachinakusqaku Benjamín ayllu runakunaman ususinkuta mana qonankupaq.

²Maqanakuyta tukuspankutaq Betelman kutimurqanku, chaypitaq Diospa ñawpaqenpi tiyaykuspa tutakama khuyayta waqaykurqanku.

³Nirqankutaq: — Israelpa Diosnin Señorniyku, ¿imanaqtinmi kay llaki qatiwanku? ¿Imaynan Israelpa huk ayllun chinkanman? nispa.

⁴Paqarisnintintaq tutallamanta hatarispanku altarta ruwarqanku, chaypitaq Señor Diosman haywarqanku ruphachina sacrificiokunata sumaq kawsay sacrificiokunatawan.

⁵Chaymantataq tapunakurqanku: — ¿Mayqenninchistaq Mizpapi huñukuyman mana riysiwarqanchischu? nispanku. Ñawpaqñan paykunaqa jurachinakusqaku huñukuyman mana riqtaqa wañuchinankupaq.

⁶Israel runakunataq Benjamín ayllu wawqenkuta khuyapayaspa ninakurqanku: — Kunanqa huk ayllun Israelmanta ch'usaqyachisqa kapun.

⁷Kunanri, ¿imanasuntaq chay mana warmiyoq qhepaqkunapaqri? Ñoqanchisqa Señor Diospa sutinpin jurarqanchis ususinchista paykunawan mana casarachinanchispaq, nispa.

⁸Ninakullarqankutaq: — ¿Mayqenninchistaq Mizpapi huñukuyman mana riysiwarqanchischu? nispanku. Galaadpi Jabes llaqtamantataq mana ch'ullallapas huñukuyman hamusqachu.

⁹Llapanku sutinkumanta waqyanakuqtinkutaq, Galaadpi Jabesmanta runakunaqa chaypi mana hukllapas karqanchu.

¹⁰Chaymi paykunaqa chunka iskayniyoq waranqa allichachaq qharikunata kacharparispa nirqanku: — Galaadpi Jabes llaqtata rispa, chaypi tiyaqkunata wañuchimuychis warmintin wawantinta.

¹¹Wañuchimunkichisqa llapan qharita, kaqllataq qhariwan kaqña llapan warmikunatapas, nispa.

¹²Hinan tarimurqanku mana qhariwan kaq tawa pachak sipaskunata, chaykunatan pusamurqanku Canaán suyupi karpankuq kasqan Siloman.

¹³Chaymantataq llapa Israel runakunaqa Rimón Salla nisqapi pakakuq Benjamín runakunaman willachimurqanku: Sumaqta kawsakapusunchis, nispa.

¹⁴Chaymi Benjamín runakunaqa paykunaman hamurqanku, Israel runakunataq Jabesmanta apamusqanku sipaskunata sapankaman qorqanku, ichaqa manan llapankumanchu ayparqan warmiqa.

¹⁵Hinan Israel runakunaqa Benjamín ayllumanta llakikurqanku, Israel llaqtapi huñu kawsay kashaqtin Señor Diospa t'aqarparisqanmanta.

¹⁶Israel llaqta kurak taytakunataq ninakurqanku: Benjamín ayllu warmikunaqa llapantaq wañupunku chayri, ¿imanasuntaq mana warmiyoq kaqkunapaqri?

¹⁷Israelqa manan huk ayllunta chinkachinmanchu, imatapas ruwasunpunin Benjamín aylluq kawsarinanpaqqa.

¹⁸Ichaqa manapunin ususinchistaqa qosunmanchu Benjamín aylluwan casarakunankupaq: Pipas ususin qoqqa ñakasqan kanqa, nispa, Israel llaqtantin jurachinakusqanchisrayku, nispa.

¹⁹Hinaspan nirqanku: — Chayarqamushanñatáq Silopi sapa wata Señor Diospa sutinpi fiesta ruwayqa. Siloqa kashan Betelpa wichayninpi, Shehemman rina hatun ñanpa inti lloqsimuyninpi, Lebonaq uranpi, nispa.

²⁰Chaymanmi Benjaminmanta puchuq runakunata kacharqanku: — Silota riychis, uvas chakrakunapitaq pakarqarikunkichis.

²¹Chaymantataq makilla qhawamunkichis. Hinaspan Silomanta t'aqa-t'aqa tusukuspa sipaskuna lloqsimuqtin, qankunapas pakakusqaykichismanta phawarqarimunkichis, sapankaykichistaq huk warmitakama suwakuspa llaqtaykichista ripunkichis.

²²Sipaskunaq taytanku otaq turankunapas manuchaq hamuwaqtinkutaq nisaqku: Ama hinachu kaychis, ñoqaykun valekuykiku chay runakunata pampachanaykichispaq, manan llapankupaqchu maqanakuymanta warmita apamurqayku. Hinaspapas manan qankunapunichu qoshankichisqa riki, chay hinaqa manan chay juramentasqaykichismanta huchayoqchu kankichis, nispa.

²³Chaymi Benjamín runakunaqa chay nisqankuta hap'ikuspa, tusukuspa lloqsimuq sipaskunata suwakuspanku llaqtankuta ripurqanku. Chaypitaq llaqtakunata wakmanta sayarichispa tiyarqanku.

²⁴Wakin Israel runakunapas ripullarqankutaq wasinkuman ayllunkumanwan.

²⁵Chay p'unchaykunapiqa Israel runakunaqa mana reyniyoqmi karqanku, sapankataq ima munasqanta ruwasharqan.