Read DIOSPA QHELQACHISQ Quechua JUECES 3 Bible Online

JUECES 3 - DIOSPA QHELQACHISQ Quechua bible

JUECES 3

¹Señor Diosmi Canaán suyupi wakin llaqtakunata hinallata saqerqan awqa-tinkuy mana rikuq qhepa wiñay Israel runakunata probananpaq.

²Chay llaqtakunawanmi Señor Diosqa awqa-tinkuy mana rikuq qhepa wiñay runakunaman imaynachus awqa-tinkuy kasqanta yachachinan karqan.

³Chaypaqmi qheparqan phisqantin Filistea reykuna, llapan Canaán runakuna, Sidón runakuna, Baal-hermón orqomanta Hamat Q'asakama Líbano orqo-orqopi tiyaq Hev runakunapiwan.

⁴Chay llaqtakunawanmi Señor Diosqa Israel runakunata probayta munarqan Moiseswan ñawpa taytankuman qosqan kamachikuyman hina hunt'anqakuchus icha manachus chayta yachananpaq.

⁵Israel runakunataqmi ichaqa Canaán runakunawan, Het runakunawan, Amor runakunawan, Ferez runakunawan, Hev runakunawan, Jebus runakunapiwan tiyarqanku.

⁶Israel runakunaqa chay runakunawan mich'uykukuspan wawankuwanpas casarakurqanku, diosninkutapas yupaychaysikurqanku, kaqllataq chay llaqta runakunapas casarakurqanku Israel runakunaq wawankunawan.

⁷Chaymantapas Israel runakunaqa manapunin Señor Diospa munayninman hinachu ruwarqanku, Diosninku Señor Diosta qonqaspankun Baal diosta, Asera diosata yupaycharqanku.

⁸Chaymantan Señor Diospa phiñakuyninqa paykunapaq rawrarirqan, chaymi Mesopotamia suyu rey Cusan-risataimman hap'iykachirqan, hinan Israel runakunaqa chay reypa kamachin kapurqanku pusaq watantin.

⁹Chaymantataq Israel runakunaqa Señor Diosta waqyakurqanku, paytaq qespichiq runata churamurqan, hinan chay runaqa qespichirqan. Paypa sutinmi karqan Otoniel, Calebpa sullk'an Cen runaq churin.

¹⁰Otonielmantaq Señor Diospa espiritunqa hunt'aykurqan, hinan payqa Israel runakunata kamachirqan, awqa-tinkuyman riqtinpas chaypi Señor Diosqa paywan rey Cusan-risataimta atipachirqan.

¹¹Chaymantataq Israel suyupi thak-kawsay karqan tawa chunka watantin, Otonieltaq wañukapurqan.

¹²Wakmantan Israel runakunaqa manapuni Señor Diospa munayninman hinachu ruwarqanku, chay hawan Señor Diosqa Moab suyu rey Eglonta Israelmanta aswan atiyniyoqman tukuchirqan.

¹³Hinan Eglonqa Amón runakunawan, Amalec runakunapiwan huñunakuspa Israel runakunata atiparqanku, Palmerakunayoq Llaqta nisqatapas hap'ikapurqanku.

¹⁴Chaymi Israel runakunaqa chunka pusaqniyoq watantin Eglonpa kamachin kapurqanku.

¹⁵Chaymantan Israel runakunaqa Señor Diosta waqyakullarqankutaq, paytaq huk qespichiq runata churamurqan. Chay qespichiqmi lloq'enchu karqan Benjamín ayllumanta Geraq churin Aod sutiyoq. Israel runakunan rey Eglonman sumaq sonqota Aodwan apachirqanku.

¹⁶Hinan Aodqa iskay ladonpi filoyoq puñalta ruwakurqan iskay cuarta hina sayayniyoqta, chaytataq warkuykukurqan paña teqnin p'achan ukhuman.

¹⁷Hinaspan sumaq sonqota Moab rey Eglonman qoykurqan. Eglonqa sinchi wirallañan karqan.

¹⁸Eglonman sumaq sonqota qoykuspataq, Aodqa apaysimuqninkunata kacharparipurqan.

¹⁹Gilgal qayllapi yupaychana saywa rumikunaq kasqanman chayaspataq, Aodqa Eglonman kutirimurqan. Hinaspan nirqan: — Reyníy, huk willakuyta willaykusqayki ichaqa sapallaykiman, nispa. Hinan reyqa runankunata: Lloqsiychis, nirqan. Llapankutaq lloqsirqanku.

²⁰Rey Eglón sapallan ruphay tiempo llanthukunan wasinpi tiyashaqtintaq, Aodqa chimpaykuspa nirqan: — Reyníy, Diospa willakuynintan apamushayki, nispa. Chayta niqtinmi Eglonqa tiyananmanta sayariykurqan.

²¹Aodtaq lloq'enchu kaspa lloq'e makinwan puñalta hap'ispa Eglonta wiksanpi sat'irqorqan.

²²Hinan puñalqa hap'inantinraq reypa wiksanman chinkaykurqan, wirasapa runa kasqanrayku. Chaymi Aodqa puñalta manaña aysarqanñachu.

²³Chaymantataq punkuta p'utiwan wisq'aykuspa, ventananta lloqsipurqan.

²⁴Pasakusqan qhepanmantataq reypa kamachinpi kaq runakunaqa hamuspa p'utiwan wisq'asqata punkuta tarirqanku, chaymi ninakurqanku: — Hisp'ana wasipichá kashan, nispanku.

²⁵Manapuni punkuta kicharikamuqtintaq, runakunaqa sayarayasqankupi mana imanakuyta atispanku, p'utiq sullunta aparqamuspa kicharqanku. Reytaq wañusqa chutarayapushasqa.

²⁶Punkuq kichakunanta suyarayashanankukamataq, Aodqa Gilgalpi yupaychana saywa rumikunatapas pasarqospa Seiratkamaña ayqekurqan.

²⁷Chayarqospataq Efraín orqo-orqopi waqra pututunta tocaykurqan Israel runakunata awqa-tinkuyman rinanpaq waqyaspa. Israel runakunataq llapanku huñurqokuspa Aod qollanayoq rirqanku.

²⁸Paytaq nirqan: — Haku ñoqawan, Señor Diosmi awqanchis Moab runakunata hap'iykachiwanchis, nispa. Hinan paykunaqa rispanku Jordán mayu chimpanata wisq'arqorqanku, manataq chayninta pitapas purichirqankuchu.

²⁹Chay kutipitaqmi yaqa chunka waranqa hina Moab runakunata wañurachirqanku, allichachaq kallpasapa qhari soldadokunataraqtaq kanpas. Manapunin ch'ullallapas kawsarqanñachu.

³⁰Chay hinatan Israel runakuna Moab runakunata chiriyachirqanku. Chaymantataq Israel suyupi thak-kawsay karqan pusaq chunka watantin.

³¹Chaymantataq Anatpa churin Samgar Israelpa qollanan karqan, paymi llank'aq toro chhukuna k'aspillawan wañurachirqan soqta pachak Filistea runakunata. Paypas Israel runakunata qespichillarqantaqmi.