Read DIOSPA QHELQACHISQ Quechua JUECES 4 Bible Online

JUECES 4 - DIOSPA QHELQACHISQ Quechua bible

JUECES 4

¹Aodpa wañukapusqanmantataq wakmanta Israel runakunaqa manapuni Señor Diospa munayninman hinachu ruwarqanku.

²Chaymi Señor Diosqa Israel runakunata hap'iykuchirqan Canaán runakunaq reynin Jabinman, paymi Hazor llaqtata kamachirqan, soldadonkunaq umallintaq karqan Haroset-goimpi tiyaq Sísara.

³Jabinqa isqon pachak fierro carretakunayoqmi karqan, chaymi Israel runakunata iskay chunka wata sinchita muchuchirqan. Hinan Israel runakunaqa Señor Diosta waqyakurqanku yanapaykunanpaq.

⁴Chay p'unchaykunapin Lapidotpa warmin profetisa Deboraqa Israel runakunaq uma qollanan karqan.

⁵Sapa p'unchaymi Deboraqa Efraín orqo-orqo Ramawan Betelwan tupay palmera mallki chakipi tiyarqan, chaypin payman hamuq Israel runakunata juzgarqan. Chayraykun chay mallkita sutichaqku “Deboraq Palmeran” nispa.

⁶Chaymantan Deboraqa Neftalí hallp'api Cedespi tiyaq Abinoampa churin Baracta waqyachispa nirqan: — Israelpa Diosnin Señormi kamachishasunki: Tabor orqoman rispa, Neftalí ayllumanta Zabulón ayllumantawan chunka waranqa runakunata huñumuy.

⁷Ñoqataq pusamusaq rey Jabinpa soldadonkunaq umallin Sisarata soldadonkunantinta carretankunantinta Cisón mayupi qankunawan maqanakunanpaq, chaypin qankunawan paykunata atipachisaq, nispa.

⁸Hinan Baracqa kutichirqan: — Qan ñoqawan riqtiykiqa risaqmi, mana riqtiykiqa, manan riymanchu, nispa.

⁹Deborataq nirqan: — Risaqmi qanwan, ichaqa Señor Diosmi huk warmiwan Sisarata wañuchinqa, chayrayku kay awqa-tinkuyman risqaykiqa manan qanpa sutiykipi atipasqachu kanqa, nispa. Hinaspan Deboraqa Cedesman Baracpiwan rirqanku.

¹⁰Chaypitaqmi Baracqa huñuykurqan Zabulón aylluta Neftalí ayllutawan. Chaymi chunka waranqa runakuna paywan rirqanku, Deborapas riysillarqantaq.

¹¹Moisespa suegron Hobabpa miraynin Cen runakunamanta t'aqakapuspan Heberqa tiyapusqa Cedes qaylla Zaanaimpi encina mallki chakipi.

¹²Sisaramantaq willarqanku Abinoampa churin Baracqa Tabor orqopiña kasqanta,

¹³chaymi isqon pachak fierro carretankunantin soldadonkunantin ima puririmurqanku Haroset-goimmanta Cisón mayukama.

¹⁴Hinan Deboraqa Baracta nirqan: — ¡Rillayña! Kunan p'unchaymi Señor Diosqa Sisarata qanman hap'iykachisunki. ¡Señor Diosmi soldadoykikunaq ñawpaqenta rishan! nispa. Chaymi Baracqa Tabor orqomanta uraykurqan chunka waranqa soldadokunantin.

¹⁵Paykuna phawaykuqtinkutaq, Señor Diosqa q'aqcharqan Sisarata, soldadonkunata, carretakunapi phawaqkunatawan. Chaymi Sisaraqa carretanmanta uraykuspa chakillapiña ayqekurqan.

¹⁶Baractaq qatiykachaykurqan soldadokunata carretapi phawaqkunatawan Haroset-goimkamaraq, chay p'unchaymi Sisaraq soldadonkunamanta mana ch'ulla runallapas kawsarqanchu.

¹⁷Sisarataq ayqekurqan Cen runa Heberpa warmin Jaelpa karpankama, Hazor llaqta rey Jabinwan Heberwan sumaqpi kawsashasqankurayku.

¹⁸Jaeltaq Sisaraman taripaspa nirqan: — Pasaykamuy wiraqocha ama manchakuspa, nispa. Hinan Sisaraqa karpanman haykuykurqan, chaypitaq Jaelqa qatanawan Sisarata qataykurqan.

¹⁹Sisarataq nirqan: — Ama hinachu kay, ch'akishawanmi, unuchaykita qoykuway, nispa. Paytaq leche waqaychana qara p'uyñuta kicharqospa qoykurqan lecheta ukyaykunanpaq, chaymantataq kaqta qataykapurqan.

²⁰Sisaraqa nillarqantaq: — Karpayki punkullapi tiyay. Pipas hamuspa: ¿Pin chaypi kashan? niqtinqa: Manan pipas kanchu, ninki, nispa.

²¹Sinchi sayk'usqa kaspataq Sisaraqa misk'ita puñurqapurqan, hinan Jaelqa k'ullumanta q'asunata karpa chutana takarputawan hoqarispa, sumaqllata Sisaraman asuykurqan. Hinaspan takarpuwan uma ch'ipunmanta pampaman sat'irqorqan. Chay hinapin Sisaraqa wañupurqan.

²²Sisarata qatipamuspa Barac chayarqamuqtinmi, Jaelqa taripaspa payta nirqan: — Hamuy, maskhasqayki runaqa kaypin kashan, nispa. Karpaman haykuspataq Sisarataqa chutarayashaqta tarirqan, uma ch'ipunmanta takarpuwan sat'irqospa wañuchisqata.

²³Ahinapin Señor Diosqa chay p'unchay Israel runakunawan Canaán rey Jabinta atipachirqan.

²⁴Chaymantapachan Israel runakunaqa rey Jabinta aswan-aswanta qhawaykurqanku pasaqta tukunankukama.