Read DIOSPA QHELQACHISQ Quechua JUECES 5 Bible Online

JUECES 5 - DIOSPA QHELQACHISQ Quechua bible

JUECES 5

¹Chay p'unchaymi Deborawan Abinoampa churin Baracpiwan kay hinata takirqanku:

²— Israel umalli runakunan awqa-tinkuyman phawarirqanku, Israel runakunan kikinkumanta maqanakuyman rirqanku, chaykunamanta Señor Diosta yupaychaychis.

³¡Uyariwaychis, reykuna! ¡Uyariwaychis, kamachikuqkuna! Señor Diosmanmi takipusaq, Israelpa Diosninmanmi takipusaq.

⁴Señor Diosníy, Seirmanta lloqsimuqtiykin, Edommanta puririmuqtiykin, kay pacharaq kuyurirqan, hanaq pacharaq phaqcharirqan, phuyukunaraq paramurqan.

⁵Qanmi Sinaí orqopi Dios kanki, qanmi Israelpa Diosnin kanki, orqokunaraqmi ñawpaqeykipi chhaphchikurqan,

⁶Anatpa churin Samgarpa p'unchayninpipas, Heberpa warmin Jaelpa p'unchayninpipas, suyuntinta puriq qhatuqkunapas purinanku ñantan saqepurqanku, astakuqkunapas khallka ñannintan puriyta qallarirqanku.

⁷Campopi tiyaq Israel runakunapas llapanmi ch'usaqyapurqanku, ñoqa Débora, sayarinay p'unchaykama, arí, ñoqan Israelpa maman hina sayarirqani.

⁸Mosoq dioskunata akllakuqtinkun, llaqta punkukunapi maqanakuykuna karqan, ichaqa tawa chunka waranqa Israel runakuna ukhupin lanzapas escudopas mana rikuypas karqanchu.

⁹Israelpi umalli runakunawanmi sonqoyqa kashan, paykunamantakama awqa-tinkuyman riq runakunawanpas. ¡Señor Diosta yupaychaychis!

¹⁰Yuraq asnopi puriqkuna, qompi chusi patapi tiyaqkuna, ñanta puriqkuna, Señor Diospa ruwasqanmanta willariychis.

¹¹Haqay uywaman unu ukyachina patapin platillokunata tocaspa takishanku, Señor Diospa hatun atipasqanmanta, Israel ayllu runawan atipachisqanmanta. Señor Diospa llaqtan runakunan puririrqanku llaqta punkuman.

¹²¡Rikch'ariy, hatariy, Débora! ¡Rikch'ariy, sayariy, takiy! Qanpas Abinoampa churin Barac, sayariy, presoykikunata apay.

¹³Hinan umallikunaq kasqanman uraykamurqanku awqa-tinkuypi manaraq wañuq runakuna, ñoqarayku uraykamurqanku Señor Diospa llaqtan runakuna atiyniyoq awqankuwan churanakunanpaq.

¹⁴Efraín ayllu runakunan wayq'oman usqhaylla uraykamurqanku, Benjamín ayllu soldadokunan qhepankuta uraykamurqanku, Maquirmantapas umallikunan uraykullarqankutaq, Zabulonmantapas kamachikuqkunan uraykullarqankutaq.

¹⁵Isacar ayllu uma runakunapas Deboratan puriysirqanku, Isacar ayllu runakunapas Baractan yanaparqanku, chaymi wayq'omanpas qhepanta phawaykurqanku. Rubén aylluq hallp'anpiqa askhan wakcha-kusichikuna, qhapaq-llakichikuna.

¹⁶¿Imanaqtintaq qhepakurqanki uywa kanchallaykipi, michiqkunaq oveja waqyasqanta uyarispa? Rubén aylluq hallp'anpiqa askhan kanku allichachaq manchali runakuna.

¹⁷Jordán chimpapin qhepakurqanku Galaad runakunaqa, barconkuq qayllanpin qhepakurqanku Dan runakunaqa, kasqan qocha patapin llakhiraq karqanku Aser runakunaqa.

¹⁸Zabulón aylluwan Neftalí aylluwantaq wañuytapas mana manchasparaq hatun awqa-tinkuypi maqanakusharqanku.

¹⁹Reykunan hamuspa maqanakurqanku, Canaán reykunan maqanakurqanku, Meguido mayu pata Taanacpi qolqekuna llat'anaytapas manan atirqankuchu.

²⁰Hanaq pachamantan qoyllurkuna maqanakamurqan, tiyasqankumantan Sísara contra sayarimurqan.

²¹Cisón mayuqa llapantañan apapurqan, ñawpa Cisón mayuqa lliwtañan qhochupurqan. ¡Sonqolláy, kallpachakuspa puririy!

²²Sinchi phawaq caballokunan phawaylla phawarqan, chakinkuq k'unrururusqanmi uyarikurqan.

²³Señor Diospa angelnintaq rimarirqan: Meroz llaqtata ñakaychis, runankunatapas ñakallaychistaq, Señor Diosta mana yanapasqankumanta, Señor Dioswan atiyniyoq contra mana maqanakusqankumanta, nispa.

²⁴Llapan warmikunamanta aswan saminchasqa Jaelqa kachun, Cen runa Heberpa warminqa saminchasqa kachun, karpa-karpapi tiyaq warmikunamantapas aswan saminchasqa kachun.

²⁵Unuta Sísara mañakuqtinpas, lechetan Jaelqa haywarirqan, hatun pocillopin leche lluklluta haywarirqan.

²⁶Lloq'e makinwanmi takarputa hoqarirqan, paña makinwantaq q'asunata hoqarirqan, Sisaraq umantan q'asuspa p'akirqan, uma ch'ipuntapas takarpuwanmi t'oqorqan.

²⁷Sisaraqa hukpaqkamallañan ñoqhorparikurqan, Jaelpa chakinpi payqa ñoqhorparikurqan, ñoqhorparikusqanpin wañusqa chutarparikurqan.

²⁸Sisaraq mamantaq wasi ventanamanta qhawapakamusharqan, qhawapakamusqanpin llakikuymanta mana paypiñachu karqan: ¿Imanaqtintaq mana usqhaychu carretanqa chayamun? ¿Imanaqtintaq mana usqhaychu rikhurimunri? nispa.

²⁹Yachaysapa sipasninkunaqa mamantan nirqanku, paypas chay kasqantan nillarqantaq:

³⁰Awqa-tinkuypi llat'anamusqankutachá rakinakushanku, sapanka qharimanchá hukta iskaytapas sipaskunata rakishanku, Sisarapaqtaqchá ima sumaq awasqakunata akllashanku, ima sumaq puytuchasqa awasqakunatachá akllashanku, atipaqkaqpaqchá iskay puytuchasqa awasqa kashan, nispa.

³¹Señor Diosníy, chay hina wañuchisqapuni kachun llapan awqaykikunaqa. Qan munakuqtaq k'ancharichun, inti hinaraq wach'irichunku, nispa. Chaykuna qhepatataq thak-kawsay suyuntinpi karqan tawa chunka watantin.