Read DIOSPA QHELQACHISQ Quechua JUECES 6 Bible Online

JUECES 6 - DIOSPA QHELQACHISQ Quechua bible

JUECES 6

¹Wakmantan Israel runakunaqa manapuni Señor Diospa munayninman hinachu ruwarqanku, chaymantan payqa qanchis watantinpacha Madián runakunaq munaychakuyninman saqerparirqan.

²Paykunataq Israel runakunata aswan-aswanta muchuchirqanku, chaymi Israel runakunaqa orqokunapi pakakunata ruwakamurqanku qaqa k'aktukunapi, qaqa wasikunapi, qaqa patakunapi ima.

³Israel runakuna imallatapas tarpukuqtinkun, Madián runakuna, Amalec runakuna, inti lloqsimuy lado runakunapiwan phawaykamuqku.

⁴Hinaspataq Israel suyupi tiyaykuqku, chakra llank'asqankutapas ch'usaqyachiqku Gaza llaqtakamaraq, Israel runakunaq mikhunanpaqtaq mana imapas kaqchu, ovejapas, wakapas, asnopas.

⁵Paykunaqa astakamuqku karpakunantin uywakunantin, langosta hina askhallaña, uywankuwanpas suyuntintan q'arachiqku. Paykunapas camellonkupas mana yupay atiyraqmi kaq.

⁶Chayraykun Israel runakunaqa khuyayta ñak'arirqanku, chayraqmi Señor Diosmanta yanapaynintapas mañakurqanku.

⁷Madián runakunaq ñak'arichisqan hawa Israel runakuna Señor Diosta waqyakuqtinkun,

⁸Señor Diosqa huk profetata paykunaman kachamurqan. Hinan profetaqa nirqan: — Israelpa Diosnin Señormi nin: Egipto suyupi kamachi kashaqtiykichismi horqomurqaykichis.

⁹Manataq Egiptollamantachu horqomurqaykichis, kaypi muchuchiqniykichismantapas horqollarqaykichistaqmi, paykunatan haykusqaykichisman hina wikch'urqani, qankunamantaq hallp'ankuta qopurqaykichis.

¹⁰Nirqaykichistaqmi: Ñoqan Diosniykichis Señor Diosqa kani, tiyasqaykichis hallp'api Amor runakunaq diosninkunataqa aman yupaychankichischu, nispa. Qankunataq ichaqa nisqayta mana kasukurqankichischu, nispa.

¹¹Chaymantataq Señor Diospa angelninqa Oframan hamuspa, Abiezerpa miraynin Joaspa encina sach'an chakipi tiyaykurqan. Joaspa churin Gedeontaq pakallapi uvas saruna ukhupi trigota p'anasharqan, Madián runakunaq mana rikunanpaq.

¹²Hinan Señor Diospa angelninqa rikhurispa nirqan: — Kallpasapa allin qhari, qanwanmi Señor Diosqa kashan, nispa.

¹³Gedeontaq kutichirqan: — Ay, wiraqocháy, ñoqaykuwan Señor Dios kashaqtinri, ¿imanaqtintaq kay hina imaymanakuna kawanku? ¿Maytaq chay ñawpa taytaykuq rimasqan Señor Diospa musphana ruwasqankunari? Egiptomantan Señor Diosqa horqomuwarqanku, nispan nirqanku. Kunanmi ichaqa Señor Dios wikch'upuwanku, Madián runakunamantaq qaraykuwanku, nispa.

¹⁴Señor Diostaq payta qhawaykuspa nirqan: — Rillay qanqa, kallpallaykiwanmi Israel llaqtamasiykita Madián runakunaq munaychakuyninmanta qespichinki. Ñoqa kikiymi kachashayki, nispa.

¹⁵Gedeonmi kutichillarqantaq: — Ay, wiraqocháy, ¿imaynatataq Israeltari qespichiyman? Familiayqa Manasés ayllumanta sinchi wakchallan, ñoqapas manan imapaschu kani paykuna ukhupiqa, nispa.

¹⁶Niqtinmi Señor Diosqa nirqan: — Ñoqan qanwan kashasaq. Ch'ulla runallapas kashanman hinatan Madián runakunataqa atipanki, nispa.

¹⁷Chaymi Gedeonqa nillarqantaq: — Allinpaq hap'iwanki chayqa, Señor Dios kasqaykita yachanaypaq ima señaltapas rikuchiway.

¹⁸Ama hinachu kay, amaraq kaymanta ripuychu qanman haywarinaypaq ofrendata apamunaykama, nispa. Señor Diostaq nirqan: — Arí, kutimunaykikaman kaypi suyashasqayki, nispa.

¹⁹Wasinman haykuspataq Gedeonqa cabrachata t'impuchimurqan, arroba hak'umantataq mana qonchuyoq t'antata ruwarqorqan. Hinaspa aychata canastaman churaykuspa, caldontapas mankaman hich'aykuspa, aparikurqan encina sach'aq kasqankama.

²⁰Chaypitaq Diospa angelninqa kamachirqan: — Chay aychata mana qonchuyoq t'antatawan kay qaqa pataman churaykuspa caldowan ch'aqchuykuy, nispa. Hinan Gedeonqa kamachisqanta hina ruwarqan.

²¹Señor Diospa angelnintaq chay aychata t'antatawan tawnanwan tupaykurqan, hinan qaqamanta ninaqa rawrarimuspa t'antata aychatawan ruphapurqan. Chay ratopachataq Señor Diospa angelninqa chinkarqapurqan.

²²Señor Diospa angelnin kasqanta reparaspataq, Gedeonqa nirqan: — ¡Ay, Señor Diosnilláy! ¡Uya-uyapuran angelniykiwan tupaykuni! nispa.

²³Señor Diostaq ichaqa nirqan: — Ama mancharikuychu, manan wañunkichu, allillanpunin kanki, nispa.

²⁴Hinan Gedeonqa Señor Diospa sutinpi huk altarta chaypi perqarqan, suticharqantaq: “Thak-kaymi Señor Diosqa”, nispa. Chay altarqa Abiezerpa mirayninpa Ofra llaqtanpin kashallanpuni.

²⁵Chay tutapachataq Señor Diosqa Gedeonta nirqan: — Taytaykiq hukkaq qanchis watayoq toronta aysay, hinaspataq taytaykiq ruwasqan Baalpa altarninta kumpay, kumpallaytaq altarnin qayllapi k'ullumanta Asera diosatapas.

²⁶Hinaspataq kay qaqa patapi ñoqa Diosniyki Señor Diospa sutiypi huk altarta allin ruwasqata perqanki. Chaymantataq chay hukkaq torota ñoqapaq sacrificiota ruphachimunki, k'ullumanta Asera diosa ch'eqtasqa patapi, nispa.

²⁷Hinan Gedeonqa pusarikurqan chunka runakunata Señor Diospa kamachisqankunata ruwamunanpaq, ichaqa manan p'unchaychu ruwarqan aswanpas tutalla, llaqta runata taytanpa ayllunkunatawan manchakuspa.

²⁸Qhepantin paqartaq llaqta runakuna rispa Baalpa altarnin kumpasqata k'ullumanta Asera diosatapas wit'usqata tarimurqanku, chaymantapas mosoq altar patapi huk toro ruphachisqatawan rikurqanku.

²⁹Hinan paykunapura tapunakurqanku: — ¿Pitaq kaytari ruwarqon? nispa. Tapupakuspankutaq yacharqorqanku Joaspa churin Gedeón chayta ruwasqanta.

³⁰Hinan Joasman phawaspanku nirqanku: — Churiykita horqomuy wañuchinaykupaq, Baal diospa altarnintan thunirqamusqa, qayllanpi k'ullumanta Asera diosatawan, nispa.

³¹Hinan Joasqa chay runakunata nirqan: — ¿Qankunachu Baalmanta hark'akuspa sayarinkichis? ¡Chay hark'apakuspa sayariq runakuna wañuchun manaraq pacha illarimushaqtin! Diospunitaqchus Baal chayqa, pay kikin maqapakuchun altarninta thunisqamanta, nispa.

³²Chaymi nirqanku: — Baalyá Gedeonta maqashachun paypa altarninta thunisqanmanta, nispa. Gedeontataq suticharqanku “Jerobaal”[2] nispa.

³³Chaymantataq llapan Madián runakuna, Amalec runakuna, inti lloqsimuy lado runakunapas huñuykukuspa Jordán mayuta chimparqanku, hinaspan Jezreel pampapi karpakurqanku.

³⁴Hinan Señor Diospa espiritunqa Gedeonman hunt'aykurqan, paytaq anejo waqrata tocarqan Abiezerpa miraynin huñukamunanpaq.

³⁵Chaymantapas willaqkunata kacharqan llapan Manasés aylluman, Aser aylluman, Zabulón aylluman, Neftalí ayllumanwan huñukamunankupaq, hinan paykunapas rillarqankutaq.

³⁶Chaymi Gedeonqa Diosta nirqan: — Qanmi niwarqanki Israelta qespichiy, nispa.

³⁷Chay niwasqaykita yachanaypaqmi oveja qarata era pataman churasaq. Tutamanta hamunaypaqtaq oveja qaralla sullaq ch'aranchasqan kanqa pampataq ch'aki kanqa chayqa, chaypin yachasaq cheqaqtapuni: Israelta qespichimuy, niwasqaykita, nispa.

³⁸Tutamanta rinanpaqtaq munasqan hinapuni qaralla hallch'ullaña kashasqa, qarata ch'irwarqoqtintaq hatun p'uku hunt'a sulla unuqa kasqa.

³⁹Chaywanpas Gedeonqa Diosta nillarqantaq: — Ama phiñakuychu, hukllatawan nisqayki, kay kutillatawanñan yachayta munani. Kay kutipiqa qarañataq ch'aki kachun, hallp'ataq sullaq ch'aranchasqan, nispa.

⁴⁰Hinan chay tutaqa munasqanta hinapuni Diosqa ruwallarqantaq. Tutamanta rinanpaqmi kashasqa hallp'aqa sullaq ch'aranchasqan, qarañataq ch'aki.