Read DIOSPA QHELQACHISQ Quechua JUECES 8 Bible Online

JUECES 8 - DIOSPA QHELQACHISQ Quechua bible

JUECES 8

¹Hinaqtinmi Efraín ayllu runakunaqa phiñasqa Gedeonta nirqanku: — ¿Imanaqtinmi mana willakuspa qanlla Madián runakunawan maqanakuq rirqanki? nispa, payta phiñarikurqanku.

²Gedeontaq paykunaman kutichirqan: — Ñoqaq ruwasqayqa manan imapaschu, qankunaq ruwasqaykichisraqmá aswan allinpas. Qankunaq pisilla ruwasqaykichisraqmi ñoqaykuq askha ruwasqaykumantaqa aswan allinpas.

³Diosmi hap'ichirqasunkichis Madián runakunaq iskaynin umalli runankunata, Orebta Zeebtawan. Manamá chay ruwasqaykichista hinaraqchu ñoqaqa ruwarqani, nispa. Chayta niqtinmi Efraín runakunaqa mana phiñakapurqankuñachu.

⁴Gedeontaq kinsa pachak runakunantin Jordán mayuta chimpaspa sinchi sayk'usqaña kasharqanku, ichaqa awqankutaqa qatipashallarqankupunin.

⁵Chaymi Gedeonqa Sucot llaqtapi runakunata nirqan: — Ama hinachu kaychis, runaykunaman t'antata qoripuwaychis, sinchi sayk'usqallañan kashanku, Madián runakunaq reyninkuna Zebatawan Zalmunatawanmi qatipashayku, nispa.

⁶Sucotpi kamachikuqkunataq nirqanku: — ¿Zalmunata Zebatawanri ñachu hap'irqonkiña soldadoykikunaman t'antata haywarinaykupaqri? nispa.

⁷Hinan Gedeonqa kutichirqan: — Suyaykuychis, Zebata Zalmunatawan Señor Dios hap'irqochiwaqtinkun, kutirqamuspa q'ala aychaykichispi khiskawan kisapiwan hasut'isqaykichis, nispa.

⁸Chaymantataq Penielman wichaspa Sucotpi hina t'antata mañarikurqanku, hinan Penielpi runakunapas Sucot runakuna hina nillarqankutaq.

⁹Chaymi Gedeonqa Peniel runakunata nirqan: — Awqayta atiparqamuspan kay torretapas thunirqollasaqtaq, nispa.

¹⁰Zebawan Zalmunawantaq Carcor llaqtapi kashasqaku chunka phisqayoq waranqa soldadokunantin. Chay runakunaqa inti lloqsimuy lado soldadokunamanta puchuqllañan karqan, pachak iskay chunka waranqataq wañupusqaña.

¹¹Gedeontaq wicharqan Noba llaqta Jogbeha llaqta inti lloqsimuy lado astakuqkunaq purinan ñanninta, hinaspan Carcorpi llakhi kashaq soldadokunaman phawaykurqanku.

¹²Zebawan Zalmunawantaq ayqerikurqanku, Gedeontaq ichaqa qhepankuta phawaspa hap'irqamurqan, hinaspan paykunaq soldadonkunata q'aqcharqan.

¹³Chay maqanakuymanta Heres Q'asanta kutimuspataq,

¹⁴Gedeonqa Sucot llaqtayoq waynata ñanpi hap'irqorqan, hinaspan chayta allin-allinta tapurqan. Hinan chay waynaqa Sucot llaqtapi qanchis chunka qanchisniyoq kurak taytakunaq sutinta qelqaspa qorqan.

¹⁵Llaqtaman haykuspataq Gedeonqa runakunata nirqan: — ¡Kayqa Zebapas Zalmunapas! Qankunan asikuspa niwarqankichis: ¿Zebata Zalmunatawanri ñachu hap'irqonkiña sayk'usqa soldadoykikunaman t'antata haywanaykupaqri? nispa.

¹⁶Chaymantataq Gedeonqa Sucotpi kurak taytakunata khiskawan kisapiwan hasut'irqan.

¹⁷Chaymantapas Penielpi torreta thunillarqantaq, chay llaqta runakunatapas wañurachirqan.

¹⁸Hinaspan Zebata Zalmunatawan Gedeonqa tapuykurqan: — ¿Imaynataq Tabor orqopi wañuchisqaykichis runakunari karqan? nispa. Paykunataq kutichirqanku: — Chay runakunaqa qan kasqanmi kasqa, sapankankun reypa churinman rikch'akusqaku, nispa.

¹⁹Chayta niqtinmi Gedeonqa qaparirqan: — ¡Ay, chayqa wawqeykunan! ¡Wawqeykunatapunin wañuchisqankichis! Señor Diospa sutinpin niykichis, manachus wañuchiwaqchis karqan chayqa, ñoqapas kunan manan qankunata wañuchiykichismanchu karqan, nispa.

²⁰Chaymantataq Gedeonqa kurak churin Jeterta kamachirqan: — Sayariy, kaykunata wañuchiy, nispa. Jetertaq ichaqa sinchi warmallaraq kaspa, mana espadanta hoqariyta munarqanchu manchakusqanrayku.

²¹Hinan Zebawan Zalmunawanqa Gedeonta nirqanku: — Qanyá qhari kaspaqa wañuchiwayku, qhariqa reqsikun mana manchakuq kasqanpin, nispa. Chaymi Gedeonqa sayarispa paykunata wañuchirqan, hinaspan camellonkuq kunkanpi q'anchi killaman rikch'akuq walqanchakunata apakurqan.

²²Israel suyu runakunataq Gedeonta nirqanku: — Qanqa Madián runakunaq makinmantan horqowarqankiku, chayrayku kamachiqllaykuña kapuy wawaykiq wawankama, nispa.

²³Chayta niqtinkun Gedeonqa kutichirqan: — Manan ñoqapas wawaykunapas qankunaq kamachiqniykichisqa kaykumanchu. Señor Diosmi kamachiqniykichisqa kanqa.

²⁴Aswanpas hukta mañarikusqaykichis, ñoqamanqa llat'anaspa qechumusqaykichis alhajakunata qoriwaychis, nispa. (Chay atipasqa runakunaqa Ismael runa kaspan, llapanku qorimantakama alhajakunata churakuqku).

²⁵Paykunataq nirqanku: — Arí, qosqaykikun, nispa. Huk llikllata pampaman mast'aykuspataq, chaymankama qori alhajakunata chanqamurqanku.

²⁶Llapan chay qori alhaja huñusqataq llasarqan yaqa iskay chunka kilo hina, chaymantapas kallarqanraqtaq imaymana sumaq k'achanchanakuna, Madián reykunaq churakunan sumaq llawlli-puka awasqa p'achakunapas, kaqllataq camellonkuq kunkanpi walqanchakunapas askhallaña karqan.

²⁷Hinan Gedeonqa chay qorikunamanta ruwachirqan sacerdoteq churakunan Diospa munaynin tapuna unkuta, chaytataq Ofra llaqtanpi waqaychachirqan. Chay unku ruwachisqanmi llapan Israel runakunata, Gedeonta aylluntawanpas misk'achirqan, paykunan Señor Diosta qonqarispa t'aqarikapurqanku.

²⁸Chay hinapin Madián runakunaqa Israelpa atipasqan kaspa, manaña kallpachakurqankuchu, Israel suyuntinpitaq thak kawsay karqan tawa chunka watantin Gedeón kawsashanankama.

²⁹Hinan Joaspa churin Jerobaal sutichasqanku Gedeonqa wasinman tiyaq ripurqan.

³⁰Askha warmiyoq kaqtinmi, churinkunaqa qanchis chunka karqan.

³¹Shehem llaqtayoq tiyaqmasin warmipipas kallarqantaqmi huk churin Abimelec sutiyoq.

³²Gedeonmi wañukapurqan sinchi yuyaqllaña, hinan Abiezerpa miraynin Ofra llaqtapi taytanpa p'ampakusqanman p'ampapurqanku.

³³Gedeonpa wañukapusqan qhepatataq Israel runakunaqa qhellichakurqanku Baal dioskunata yupaychaspa, diosninkupaqmi akllakurqanku Baal-berit-ta.

³⁴Chay hinatan Dosninku Señor Diosta qonqapurqanku, hinaña muyuriqninkupi awqankumanta qespichirqan chaypas.

³⁵Manallataq rikuqpas tukurqankuchu Gedeonpa ayllunkunatapas paykunapaq imaymana allinkuna ruwapusqanmanta.