Read DIOSPA QHELQACHISQ Quechua JUECES 9 Bible Online

JUECES 9 - DIOSPA QHELQACHISQ Quechua bible

JUECES 9

¹Jerobaalpa churin Abimelectaq Shehem llaqtaman rirqan mamanpa ayllunkunawan parlaq, hinaspan llapanta nimurqan:

²— Llapan Shehem runakunata tapuychis: ¿Jerobaalpa qanchis chunkantin churinkunaq kamachisqan kaytachu munankichis, icha ch'ulla runallaq kamachisqan kaytachu? nispa. Qankunapas reparaychisyá ñoqaqa yawarniykichismi kani riki, nispa.

³Chaymi mamanpa ayllunkunaqa sumaqta parlapayarqanku Shehem runakunata, hinan Shehem runakunaqa llapallanku Abimelecta rey kananta munarqanku: Payqa ayllunchismi, nispanku.

⁴Hinan Abimelecman qorqanku Baal-berit diospa yupaychana wasinmanta qanchis chunka qolqeta. Chay qolqewanmi payqa millay qella tumaqaya runakunata mink'arqan paywan rinanpaq.

⁵Hinan paykunaqa rirqanku taytan Jerobaalpa Ofrapi wasinta, chaypitaq huk qaqa patapi Abimelecqa wawqenkunata qanchis chunkantinta wañuchirqan, Jerobaalpa sullk'akaq churin Jotamtaq pakakuspa mana wañurqanchu.

⁶Chaymantataq Shehem runakuna llapan Bet-milo cheqas runakunapiwan huñuykukurqanku Shehempi yupaychana saywa rumiq kasqan encina mallki chakipi, chaypitaq Abimelecta reyta churakurqanku.

⁷Chayta willaqtinkutaq Jotamqa Gerizim orqo pataman seqarqan, hinaspan chay patamanta alto kunkawan waqyakamurqan llapankuq uyarinanpaq hina: — ¡Uyariwaychis Shehem runakuna! ¡Diospas qankunata uyarillachuntaq!

⁸Llapan mallkikunas puririsqaku reyninkuta akllakunankupaq. Olivo sach'atas nisqaku: Reyniyku kapuwayku, nispanku.

⁹Olivo sach'ataqsi nisqa: Aceiteywanmi yupaychakun runakunatapas dioskunatapas. ¿Chaytachu ñoqari saqeyman qankunaq reyniykichis kanaypaq? nispa.

¹⁰Higos sach'atataqsi nisqaku: Qanyá reyniyku kapuwayku, nispanku.

¹¹Higos sach'ataqsi nisqa: Misk'illañan kani sumaq ruruyoqtaq. ¿Chaytachu ñoqari saqeyman qankunaq reyniykichis kanaypaq? nispa.

¹²Uvas sach'atañataqsi nisqaku: Qanyá reyniyku kapuwayku, nispanku.

¹³Uvas sach'ataqsi nisqa: Vinoywanmi kusikun runakunapas dioskunapas. ¿Chaytachu ñoqari saqeyman qankunaq reyniykichis kanaypaq? nispa.

¹⁴Llapan mallkikunas t'ankartañataq nisqaku: ¡Qanyá reyniyku kapuwayku! nispanku.

¹⁵T'ankar ch'aphrataqsi nisqa: Cheqaqtapuni akllakuwaspaykichisqa, hamuychis llanthuypi k'uytuykuq. Mana chaytaq ñoqamanta nina rawrarichun Líbano cedro mallkikunata ruphananpaq, nispa.

¹⁶Kunantaq niwaychis: ¿Cheqaq allin yuyaywanpunichu Abimelecta reypaq akllarqankichis? ¿Qankunari Jerobaalta aylluntawan sumaqtachu rikurqankichis, imaynan paypas qankunata rikurqasunkichis hinata?

¹⁷Taytayqa wañuytapas mana manchakuspan qankunarayku maqanakurqan Madián runakunamanta qechunasuykichispaq.

¹⁸Qankunataq aswanraq taytaypa ayllunkuna contra sayarirqankichis, churinkunatapas huk qaqa patallapi qanchis chunkantinta wañuchirqankichis. Chaymantataq uywasqan warmiq churin Abimelectaraqtaq yawarniykichis kasqanrayku Shehem reyta churakunkichis.

¹⁹Kunan cheqaq allin yuyaywanchus ruwarqankichis Jerobaalta ayllunkunatawan chayqa, Abimelecwan kusikuychis paypas qankunawan kusikullachuntaq.

²⁰Mana chay hina kaqtintaq, Abimelecmanta nina rawrarispa llapan Shehemta Bet-milotawan ruphachun, hinallataq Shehemmanta Bet-milomantawan nina rawrarimuspa Abimelecta ruphachun, nispa.

²¹Chayta niykuspataq Jotamqa wawqen Abimelecta manchakuspa ayqekapurqan Beer llaqtapi tiyananpaq.

²²Abimelectaq kinsa wataña Israel runakunata kamachirqan.

²³Hinan Diosqa Abimelecman Shehem runakunamanwan mana allin yuyayta churaykurqan paykunapura cheqninakunankupaq, chaymi Shehem runakunaqa Abimelec contra hatarirqanku,

²⁴Diosmi chayta ruwarqan Jerobaalpa qanchis chunkantin churinkuna wañuchisqanku aynimanta Abimelecwan yanapaqnin Shehem runakunapiwan ñak'arichisqa kanankupaq.

²⁵Shehem runakunataq orqo patakunaman runakunata churamurqanku Abimelecman phawaykunankupaq, chaykunataqmi ñan puriqkunata lliwta qonqay llat'anasharqanku. Chaytataq hukkuna Abimelecman willakamurqanku.

²⁶Huk p'unchaytaq Ebedpa churin Gaalqa wawqenkunantin Shehemman hamurqan, Shehem runakunataq payta hap'ipakurqanku.

²⁷Hinaspan llapanku uvas chakraman pallaq rirqanku, chaypitaq uvasta saruspa q'ochukurqanku. Chaymantataq kutirqanku diosninkuq wasinman, chaypin mikhuspanku ukyaspanku Abimelec contra millayta rimarqanku.

²⁸Hinan Gaalqa nirqan: — Jerobaalpa churillan kashaspa, ¿imamanraqmi chay Abimelecqa tukushan? ¡Chay Zebultaq kamachin hina! Ñoqanchis Shehem runakunari, ¿imataq kashanchis paykunaq kamachinpi kananchispaqri? Aswanpas Shehem llaqta sayarichiq Hamorpa kamachinta ruwasun, ama Abimelectaqa kasusunchu.

²⁹¡Ay! Ñoqalla qankunaq umalliykichis karqoyman, Abimelectaqa hukpaqkaman wikch'urqoyman. Niymanraqtaq: Soldadoykikunata huñumuy maqanakunanchispaq, nispa.

³⁰Ebedpa churin Gaalpa rimasqanta uyarispataq, llaqta kamachiq Zebulqa phiñakurqan.

³¹Hinaspan Abimelecman pakaylla willachimurqan: Ebedpa churin Gaalmi wawqenkunantin Shehemman hamusqaku, hinaspan llaqta runata yachachispa qan contra tanqashan.

³²Chayrayku, soldadoykikunapiwan tutalla hamuychis, hinaspa campopi pakarqarikamuychis.

³³Tutamantataq llaqtaman phawaykamunkichis inti lloqsimuqtin hina. Gaal runankunantin qanwan maqanakuq lloqsimuqtinkutaq, ima munasqaykita paykunata ruwanki, nispa.

³⁴Chaymi Abimelecqa kaq tutapacha soldadonkunantin lloqsimuspa tawa t'aqaman rakinakurqan, Shehem qayllapitaq pakarqarikurqanku.

³⁵Gaaltaq llaqta punkuman lloqsimurqan, hinan Abimelecqa soldadonkunantin pakakusqankumanta lloqsirqarimurqanku.

³⁶Chay runakunata rikurqospataq Gaalqa Zebulta nirqan: — ¡Qhawariy! Runakunaraqsi orqokunamanta uraykarqarimushan, nispa. Zebultaq nirqan: — Orqokunaq llanthuntachá runata hina qanqa qhawashanki, nispa.

³⁷Wakmanta Gaalqa nillarqantaq: — ¡Qhawariy! Pachaq Pupun nisqamantapas huk t'aqa hamushallantaq. Huk t'aqapas Watuqkunaq Encina Sach'an ñanmanta hamushallantaq, nispa.

³⁸Zebultaq ichaqa nipurqan: — Kunanri, ¿ima ninkitaq, simisapa? Kusataraqtaq rimasharqankiqá: ¿Imataq kashanchis Abimelecpa kamachinpi kananchispaqri? nispa. Haqaymi qanpa pisichasqayki soldadokuna. ¡Phawayyá! Riy, hinaspa paykunawan maqanakamuy, nispa.

³⁹Chaymi Gaalqa Shehem runakunapiwan maqanakuq lloqsirqan.

⁴⁰Abimelectaq ichaqa Gaalta qatiykacharqan, hinan Gaalqa paymanta ayqerikapurqan. Askhataq k'irisqa karqanku, llaqtaman haykuna punkupipas.

⁴¹Abimelectaq Aruma llaqtapi qhepakurqan, Zebulñataq Shehemmanta Gaalta wawqenkunatawan qarqomurqan.

⁴²Qhepantin p'unchaytaq Shehem llaqta runakunaqa chakrankuman qhawaq lloqsirqanku, chaytataq Abimelecman willarqanku.

⁴³Hinan payqa soldadonkunata kinsaman t'aqarqarispa pampaman pakarqarichirqan. Llaqtamanta lloqsisqankuta rikurqospataq pakakusqankumanta phawarispa maqamurqanku.

⁴⁴Abimelectaq paywan kaq soldadokunapiwan llaqta punkuman phawarispa chaypi sayarparirqan. Wakin iskay t'aqañataq chakrankupi kashaqkunaman phawaykuspa wañuchirqanku.

⁴⁵Chay p'unchay ch'isiyaqnintinmi Abimelecqa llaqta runakunawan maqanakurqan llaqtata hap'ikapunankama, hinaspan llapan chaypi tiyaq runakunata wañuchirqan, llaqtamantaq kachita wisñiykurqan.

⁴⁶Chay ruwasqanta yachaspataq, Shehem llaqta torrepi kashaqkuna haykurqanku El-Berit diosninku yupaychana wasi ukhu pukaraman.

⁴⁷Chaypi llapa runakunaq huñusqa kasqanta yachaspataq,

⁴⁸Abimelecqa llapa soldadonkunantin Salmón orqota wicharqan. Chaypitaq hachawan ch'aphrakunata wit'urqan, chayta winaychakuspan q'epikurqan. Hinaspa soldadonkunata kamachirqan: — Usqhaylla qankunapas ñoqa hina ruwaychis, nispa.

⁴⁹Hinan ch'aphrakunata winaycharqarikuspa, Abimelecpa qhepanta rirqanku diosninku yupaychana wasikama. Chaypitaq ch'aphrata tawqaykuspa ninawan kanaykurqanku. Chay hinapin llapan torrepi kaqkunata wañuchirqanku, yaqa waranqata hina qharikunantinta warmikunantinta.

⁵⁰Chaymantataq Abimelecqa Tebes llaqtaman rirqan, hinaspan llaqtata muyuykuspa hap'ikapurqan.

⁵¹Chay llaqta chawpipin allin ruwasqa torre karqan, chaymanmi llapan qharikuna warmikuna llaqta umalli runakunapiwan pakarqokurqanku, ukhumanta punkuta wisq'arqamuspataq torre pataman seqarqorqanku.

⁵²Abimelectaq maqanakuspa torre punkuman chayarqan, chayta kanaykunan kashaqtintaq,

⁵³huk warmiqa torre patamanta tunawa rumiwan ch'aqemuspa Abimelecpa umanta ch'eqtarqan.

⁵⁴Hinan Abimelecqa usqhaylla arma q'epiysiqninta waqyarispa nirqan: — Espadaykita horqokuspa wañurqachiway, ama ñoqamanta: Warmiq sipisqanmi wañurqon ninankupaq, nispa. Chaymi arma q'epiysiqninqa sat'irqapurqan, Abimelectaq wañupurqan.

⁵⁵Hinan Israel runakunaqa Abimelecta wañusqata rikuspanku, wasinkuta ripurqanku.

⁵⁶Chay hinapin Diosqa Abimelecman kutichipurqan taytanta mana allin ruwasqanmanta, qanchis chunkantin wawqenkuna wañuchisqanmantawan.

⁵⁷Kaqllataq Shehem runakunamanpas Diosqa kutichipurqan mana chanin ruwasqankumanta, Jerobaalpa churin Jotampa ñakayninpas llapankumanmi chayarqan.