Read DIOSPA QHELQACHISQ Quechua 2 JUAN 1 Bible Online

2 JUAN 1 - DIOSPA QHELQACHISQ Quechua bible

2 JUAN 1

¹Ñoqa kurak umalli runan Diospa akllasqan señoraman wawakunantinman qelqamuykichis. Qankunatan cheqaqtapuni munakuykichis, manataqmi ñoqallachu, aswanpas cheqaq-kayta llapa reqsiqkunapas munakullasunkichistaqmi.

²Qankunataqa munakuykichis sonqonchispi cheqaq-kay kasqanraykun, chay cheqaq-kayqa wiñaypaqmi ñoqanchiswan kanqa.

³Dios Yayan Churin Jesucristopiwan sumaqta saminchawasunchis, khuyapayawasunchis, thak-kaytapas qowasunchis, cheqaq-kayninman munakuyninman hina.

⁴Anchatapunin kusikurqani, imaynan Dios Yaya kamachiwarqanchis chayman hina wakin wawaykikuna cheqaq-kaypi purishasqanta rikuspa.

⁵Kunanqa, señora, valekuykin hukkuna hukkunawan munanakunanchista. Kay qelqamusqayqa manan mosoq kamachikuychu, aswanpas qallariymantapacha yachasqanchis kikin kamachikuymi.

⁶Munakuyqa Diospa kamachikuyninkunaman hinapuni kawsaymi. Qallariymantapacha yachasqaykichis kamachikuyqa khaynatan nin: “Munakuypin kawsanaykichis”, nispa.

⁷Askhan pantachiqkunaqa kay pachapi purishanku, paykunaqa Jesucristoq runa-kaypi hamusqantan neganku. Chay hina runakunaqa q'otukuqkunan, Cristo contra sayariqkunataqmi kankupas.

⁸Qankunaqa makilla paykunamanta cuidakuychis, llank'asqaykichis ama usuqpaq kananpaq, aswanpas hunt'asqa premiota chaskinaykichispaq.

⁹Pipas Cristoq yachachikuyninpi mana takyaspa q'ewisqa yachachikuyta yapaykun chayqa, manan Dioswan hukllachasqachu kashan, Cristoq yachachikuyninpi takyaqmi ichaqa Yayawanpas Churiwanpas hukllachasqa kashan.

¹⁰Pipas watukuq hamuspa mana kay yachachikuytachu yachachisunkichisman chayqa, ama chay runataqa wasiykichispi chaskiychischu, amataq allin hamuytapas qoychischu.

¹¹Pipas payta allin hamuyta qospa chaskiykuqqa mana allinkunata ruwaq-masinñan kapun.

¹²Askhapunin kashan qankunata rimapayanayqa, ichaqa manan cartallapichu chaykunataqa qelqamuykichisman, aswanpas watukuqmi hamuyta munashaykichis, uya-uyapura rimananchispaq, hinaspa q'ochukuyninchis hunt'asqa kananpaq.

¹³Diospa akllasqan ñañaykiq wawankunan napaykamusunkichis.