Read DIOSPA QHELQACHISQ Quechua APOCALIPSIS 12 Bible Online

APOCALIPSIS 12 - DIOSPA QHELQACHISQ Quechua bible

APOCALIPSIS 12

¹Huk hatun manchay señalmi hanaq pachapi rikhurirqan: Huk warmin kashasqa intiwan p'achallisqa, umantaq chunka iskayniyoq ch'askamanta coronayoq, killatataq sarushasqa.

²Chay warmiqa wiksallisqan kasqa, hinan wachakuy nanayta muchuspa qaparirqan.

³Chaymantataq wak señal hanaq pachapi rikhurirqan: Huk hatunkaray puka dragonmi kashasqa qanchis umayoq, chunka waqrayoq, sapanka umanpi coronayoqkama.

⁴Chupanwanmi hanaq pachapi kaq kinsakaq t'aqa qoyllurkunata aysarqan, hinaspan kay pachaman wikch'uykamurqan. Chay dragonmi wachakunanpaq kashaq warmiq ñawpaqenpi sayaykurqan, naceqtin hina wawata oqoykunanpaq.

⁵Chay warmin qhari wawata wachakurqan, chay wawan llapa suyukunata fierro varawan kamachinqa. Ichaqa chay wawan hoqarirqosqa kaspa kamachikuy tiyananpi tiyashaq Diosman apasqa karqan.

⁶Hinan chay wachakuq warmiqa ch'inneqman ayqerqan, Diospa wakichisqan cheqasman, chaypin warmiqa waranqa iskay pachak soqta chunkayoq p'unchay uywasqa kanqa.

⁷Chaymantataq hanaq pachapi hatun maqanakuy karqan. Miguelmi angelninkunantin dragón contra maqanakurqan, hinallataq dragonpas angelninkunantin Miguel contra maqanakurqan,

⁸ichaqa dragonmi angelninkunapiwan atipachikurqanku. Chaymi hanaq pachapi kanankupas manaña atikurqanñachu.

⁹Hinan chay hatun dragonqa angelninkunantin kay pachaman wikch'uykamusqa karqan. Paymi ñawpa mach'aqway, saqra, Satanás nisqa karqan. Paymi kay pachantinta q'otuspa pantachin.

¹⁰Chay qhepatataq hanaq pachapi kunkayoq waqyakuqta uyarirqani: Kunanmi chayamun Diosninchispa qespichiynin, atiynin, kamachikuynin, Cristonpa atiyninpas. Wawqe-pananchiskunata tumpaqmi hanaq pachamanta wikch'usqaña. Paymi wawqe-pananchiskunata Diosninchispa ñawpaqenpi tuta-p'unchay huchachashallaqpuni.

¹¹Wawqe-pananchiskunaqa Corderoq yawarninwanmi, Diospa simin willasqankupiwanmi dragonta atiparqanku, paykunaqa manan wañuyta manchakurqankuchu, aswanmi wañunankupaqpas listo kasharqanku.

¹²Chayrayku, hanaq pachakuna, ¡kusikuychis! Chaypi llapa tiyaqkuna, ¡q'ochukuychis! ¡Ay, imaynaraqmi kankichis kay pachapi lamar-qochapi tiyaqkuna! Saqran qankunaman uraykamun, sinchi phiñasqan kashan, tiempoqa pisillaña kananta yachaspa, nispa nishaqta.

¹³Chay dragontaq kay pachaman wikch'uykamusqa kasqanta rikukuspa, qhari wawa wachakuq warmita qatiykacharqan.

¹⁴Diosmi ichaqa chay warmiman hatun ankaq iskay raphranta qorqan, chay mach'aqwaypa qayllanmanta ch'inneqpi wakichisqa cheqasman phalarinanpaq, chaypi kinsa wata kuskanninta uywasqa kananpaq.

¹⁵Hinan mach'aqwayqa warmiq qhepanman siminmanta unuta aqturqan mayuta hinaraq, chay mayu warmita apananpaq.

¹⁶Hallp'ataq ichaqa kicharikuspa dragonpa aqtumusqan mayuta millp'uykurqan, ahinapin warmita yanaparqan.

¹⁷Chaymi dragonqa k'araktapuni warmipaq phiñakurqan hinaspa warmiq mirayninmanta kaq wakinkunawan maqanakuq rirqan, paykunaqa Diospa kamachikuyninkunatan hunt'anku, Jesuspa willasqanpi qaqata sayanku.

¹⁸Lamar-qocha pata aqo-aqopin dragonqa sayaykurqan.