Read DIOSPA QHELQACHISQ Quechua APOCALIPSIS 14 Bible Online

APOCALIPSIS 14 - DIOSPA QHELQACHISQ Quechua bible

APOCALIPSIS 14

¹Qhawarispaytaqmi rikurqani Sión orqo patapi Cordero sayashaqta, paywantaq pachak tawa chunka tawayoq waranqa runakunata, chaykunaq mat'inpitaq qelqasqa kasqa Corderoq sutin, Yayanpa sutinpiwan.

²Hanaq pachamantataq suenayta uyarirqani askha unu phaqchaqta hina, chikchi t'oqyaqpa manchay kunununusqanta hina. Chay suenayqa karqan arpa tocaqkunaq tocasqan hinan.

³Chay pachak tawa chunka tawayoq waranqa runakunan mosoq takita takirqanku kamachikuy tiyanaq ñawpaqenpi, tawa kawsashaqkunaq ñawpaqenpi, kurak runakunaq ñawpaqenpiwan. Manan pipas chay takita yachaqayta atirqankuchu, aswanpas kay pachamanta qespichisqa chay pachak tawa chunka tawayoq waranqa runakunallan.

⁴Paykunaqa manan warmikunawan wasanchay huchapi purirqankuchu, manataqmi warmiwan qhellichakurqankuchu. Paykunan Corderowan kuska purirqanku maytaña riqtinpas. Paykunaqa runakuna ukhumanta ñawpaqkaq ruru hinan Diospaq Corderopaqwan rantisqa karqanku.

⁵Chay runakunaqa manan llullakurqankuchu, paykunaqa mana ima huchayoqmi kanku.

⁶Rikullarqanitaqmi hanaq pachanta wak ángel phalashaqta. Chay angelmi wiñay qespikuypaq allin willakuykunata kay pachapi tiyaqkunaman, llapa suyukunaman, ayllukunaman, tukuy t'aqa rimaqkunaman, llaqtakunamanwan willanan karqan.

⁷Kunkayoqtataq nirqan: Diosta manchakuychis, payta yupaychaychis, juzganan p'unchaymi chayarqamunña. Yupaychaychis Diosta, paymi hanaq pachatapas kay pachatapas lamar-qochatapas pukyukunatapas kamaqqa, nispa.

⁸Iskaykaq angeltaq qhepanta hamuspa nirqan: Chay hatun Babilonia llaqtaqa urmapunñan, thunikunñan, paymi llapa suyukunata wasanchay huchawan heq'epachirqan, allin poqosqa vinowan machachiq hina, nispa.

⁹Chaymantataq kinsakaq ángel qhepankuta hamuspa kunkayoqta nirqan: Pipas manchay wak'a animalta rikch'aynintawan yupaychaqqa, hinallataq mat'inpi otaq makinpi marcachikuqpas,

¹⁰ukyallanqataqmi Diospa phiñakuynin vinota. Chay vinon Diospa phiñakuyninwan hunt'a vasoman mana imawan chhaqruspa hich'asqa karqan. Chayta ukyaspan ninawan azufrewan ñak'arichisqa kanqa ch'uya angelkunaq ñawpaqenpi, Corderoq ñawpaqenpiwan.

¹¹Paykunaq ñak'ariyninkuq q'osñintaq wiñay-wiñaypaq q'osñirin. Chay wak'a animalta rikch'aynintawan yupaychaqkunapas, sutinwan marcachikuqkunapas manan tutapas p'unchaypas thak-kayta tarinkuchu.

¹²Chayraykun Diospaq ch'uya kawsaqkunaqa paypa kamachikuyninkunata kasukuspa, Jesuspi qaqata sayaspa, pacienciata necesitanku.

¹³Hinan hanaq pachamanta huk kunkata uyarirqani: Kayta qelqay: Kusisamiyoqmi kanku kunanmantapacha Señorwan hukllachasqa wañuqkunaqa, nispa nishaqta. Santo Espiritupas ninmi: Arí, hinapunin. Muchusqankumantan samakapunqaku, ruwasqankupas paykunawanmi kashanqa, nispa.

¹⁴Qhawarispataq yuraq phuyuta rikurqani, phuyu patapitaq Runaq Churinman rikch'akuq tiyashaqta rikurqani, umanpi qori coronayoqta makinpipas kiruchasqa ichhunayoqta rikurqani.

¹⁵Wak angelmi Dios yupaychana wasimanta lloqsimurqan, phuyu patapi tiyashaqman kunkayoqta waqyakuspa: Ichhunaykiwan ichhuy, hinaspa cosechay, cosechana horan chayamunña, hallp'a pachapi cosecha poqosqaña kasqanrayku, nispa.

¹⁶Hinan phuyu patapi tiyashaqqa hallp'a pachata ichhunanwan ichhurqan, ahinapin hallp'a pachapi cosecha huñusqa karqan.

¹⁷Wak angelmi hanaq pachapi kaq yupaychana wasimanta lloqsimullarqantaq kiruchasqa ichhunayoq.

¹⁸Hinallataq altarmanta wak angelpas lloqsimurqan, paymi ninata kamachiq karqan, hinaspan kiruchasqa ichhunayoq angelta kunkayoqta waqyarqan: ¡Kiruchasqa ichhunaykiwan hallp'a pachapi uvas k'allmakunata ichhuy, uvasninqa poqosqañan kashan! nispa.

¹⁹Chaymi angelqa kiruchasqa ichhunanwan kay pachapi uvaskunata ichhurqan, hinaspan uvasta pallaspa hatun sarunaman hich'aykurqan, k'arakta phiñakuspa Diospa sarunanpaq.

²⁰Hinan chay uvasqa llaqta hawapi saruspa ch'irwasqa karqan, chaymi uvas sarunamanta yawar lloqsimuspa caballokunaq frenonkamaraq ayparqan, kinsa pachak kilometrokamataq phawarqanpas.