Read DIOSPA QHELQACHISQ Quechua APOCALIPSIS 2 Bible Online

APOCALIPSIS 2 - DIOSPA QHELQACHISQ Quechua bible

APOCALIPSIS 2

¹Efeso llaqtapi iglesiaq angelninman qelqay: Paña makinpi qanchis qoyllurkunata hap'iqmi, qanchis qori candelero chawpipi puriqmi kay hinata nin:

²Ñoqan yachani lliw ruwasqaykikunata, sinchi llank'asqaykikunata, pacienciasqaykitapas. Yachallanitaqmi mana allin kaqtaqa mana hinallatachu qhawasqaykita, mana apóstol kashaspa “apostolmi kayku” niqkunata probaspa llulla kasqankuta hap'isqaykitapas.

³Qanqa sutiyraykun pacienciarqanki, muchurqanki, mana sayk'uspan ñoqarayku sinchita llank'arqanki.

⁴Chaywanpas kashanmi contraykipi: Manan ñawpaq hinañachu munakuwanki.

⁵Chay hinaqa, yuyariy manaraq urmashaspa imaynachus kasqaykita, hinaspa huchaykikunata saqepuspa Diosman kutirikuspayki ñawpaqkaq ruwasqaykikunata ruway. Manapuni Diosman kutirikuqtiykiqa usqhayllan qanman hamusaq, hinaspa candeleroykita maypichus kashasqanmanta wikch'usaq.

⁶Chaywanpas, kashanmi qanpa allinniykipaq: Nicolaita nisqa runakunaq ruwasqankuta cheqnikusqayki, chaykunatan ñoqapas cheqnikullanitaq, nispa.

⁷Ninriyoqqa iglesiakunaman Santo Espirituq nisqanta uyarichun. Atipaqmanqa kawsay sach'amantan mikhuchisaq, chay sach'an Diospa paraisonpi kashan, nispa.

⁸Esmirna llaqtapi iglesiaq angelninman qelqay: Ñawpaq kaqmi, qhepa kaqmi, wañusqanmanta kawsarimpuqmi kay hinata nin:

⁹Ñoqan yachani sasachakuykunapi ñak'arisqaykita, wakcha kasqaykitapas, ichaqa qhapaqmi kashanki. Yachallanitaqmi mana judío runa kashaspa “judío runan kayku” nispa ñakasqasuykitapas, chaykunaqa Satanaspa huñukuy t'aqanmi kanku.

¹⁰Ñak'arinaykimantaqa ama manchakuychu. Saqran wakinniykichista carcelman churachisunkichis, probasqa kanaykichispaq, hinaspan chunka p'unchayta ñak'arinkichis. Qanqa hunt'aqllapuni kay wañunaykiña kaqtinpas, ñoqataq wiñay kawsay coronata qosqayki, nispa.

¹¹Ninriyoqqa iglesiakunaman Santo Espirituq nisqanta uyarichun. Atipaqtaqa manan imananqapaschu iskaykaq wañuyqa, nispa.

¹²Pérgamo llaqtapi iglesiaq angelninman qelqay: Iskay ladon filo espadayoqmi kay hinata nin:

¹³Ñoqan yachani maypichus tiyasqaykita. Qanqa tiyanki Satanaspa kamachikusqan cheqaspin, chaywanpas hunt'aqllapunin sutiypi hap'ipakushanki. Ñoqapi iñiyniykitaqa manapunin saqerqankichu, qankuna ukhupi kaq hunt'aq testigoy Antipastaña Satanaspa tiyasqanpi wañuchishaqtinkupas.

¹⁴Chaywanpas kanpunin contraykipiqa: Wakinniykichismi Balaampa yachachikuyninta ruwashankichis. Chay Balaanmi Balacta yachachirqan Israel runakunata huchaman urmachiyta, idolokunaman sacrificio haywasqata mikhunankupaq, wasanchay huchata ruwanankupaqwan.

¹⁵Hinallataq wakinniykichispas Nicolaita nisqa runakunaq yachachikuyninta ruwashankichis.

¹⁶Chay hinaqa, huchaykita saqepuspa Diosman kutirikuy, mana chayqa usqhayllan hamusqayki, hinaspan simiymanta lloqsimuq espadawan chay runakuna contra maqanakusaq, nispa.

¹⁷Ninriyoqqa iglesiakunaman Santo Espirituq nisqanta uyarichun. Atipaqmanqa pakasqa “maná” nisqa t'antatan mikhuchisaq, hinallataq huch'uy rumichata qosaq, chay rumichapin mosoq suti qelqasqa kanqa, chaytan mana pipas reqsinchu, aswanpas chayta chaskiqllan, nispa.

¹⁸Tiatira llaqtapi iglesiaq angelninman qelqay: Rawrashaq nina ñawikunayoq, chakinkunapas k'anchashaq bronceman rikch'akuq Diospa Churinmi kay hinata nin:

¹⁹Ñoqan yachani ruwasqaykikunata, munakuyniykita, iñiyniykita, llank'asqaykita, pacienciasqaykitapas. Yachallanitaqmi ñawpaqkaq ruwasqaykimantaqa kunan astawan ruwashasqaykitapas.

²⁰Chaywanpas kashanmi contraykipi: Qanqa “profetisan kani” niq chay Jezabel warmitan hinallata qhawashanki, payqa kamachiykunatan yachachikuyninwan q'otun, chaymi paykunaqa wasanchay huchapi purinku, idolokunaman sacrificio haywasqakunatapas mikhunku.

²¹Ñoqaqa chay warmiq Diosman kutirikunanpaq tiempota qorqanin, ichaqa manan chay wasanchay huchapi puriyninta saqeyta munarqanchu.

²²Kunanmi Jezabelta sinchitapuni onqochisaq, hinallataq paywan wasanchaqkunatapas sinchita ñak'arichisaq, manachus chay millay ruwasqankumanta Diosman kutirikunqaku chayqa.

²³Wawankunatapas wañurqarichisaqmi, hinan llapa iglesiakuna yachanqaku sonqokunatapas, yuyaytapas t'aqwiq kasqayta. Sapankaykichistataq ruwasqaykichisman hina muchuchisqaykichis.

²⁴Tiatira llaqtapi wakinniykichismanmi nimuykichis: Qankunaqa manan chay Jezabelpa yachachikuyninta chaskirqankichischu, “Satanaspa pakasqa yachayninkuna” nisqankutapas manan reqsirqankichischu. Qankunamanqa manan wak sasa ruwaytachu kamachirqaykichis,

²⁵aswanpas qankunaqa imatachus yachasqaykichispi qaqata sayaychis kutimunaykama.

²⁶Pipas atipanman, hinaspa ñoqaq munasqay ruwaykunata tukukuykama hunt'anman chayqa, ñoqan payman atiyta qosaq suyukunata kamachinanpaq,

²⁷imaynan ñoqamanpas Yayay atiyta qowarqan hinata, hinaspan fierro varawan paykunata kamachinqa, t'uru manka hinataq ñut'u p'akisqa kanqaku.

²⁸Paymanqa qollasaqtaqmi pacha paqariy ch'askatapas, nispa.

²⁹Ninriyoqqa iglesiakunaman Santo Espirituq nisqanta uyarichun, nispa.