Read DIOSPA QHELQACHISQ Quechua APOCALIPSIS 8 Bible Online

APOCALIPSIS 8 - DIOSPA QHELQACHISQ Quechua bible

APOCALIPSIS 8

¹Qanchiskaq sellosqata Cordero kichariqtintaq, hanaq pachapi kuskan horata hina ch'inyay karqan.

²Chaymantataq Diospa ñawpaqenpi sayashaq qanchis angelkunata rikurqani, paykunamanmi qanchis trompetakunata qorqan.

³Chay qhepatataq wak ángel hamurqan qorimanta incienso q'apachinayoq, hinaspa altarpa ñawpaqenpi sayaykurqan. Askha inciensotataq payman qorqan, Diospi llapa iñiqkunaq mañakuyninkutawan kuskata kamachikuy tiyanaq ñawpaqenpi kashaq qori altar patapi haywananpaq.

⁴Incienso q'apaytaq Diospi iñiqkunaq mañakuyninkupiwan kuska angelpa makinmanta Diospa ñawpaqenman wicharqan.

⁵Chaymantataq angelqa incienso q'apachinata hap'ispa, altarpi sansata chayman hunt'achirqan, hinaspa kay pachaman chayta wikch'uykamurqan, hinan chikchi q'aqyaqeykuna, kunununuykuna, lliphllikiykuna, pacha chhaphchikuykunapiwan karqan.

⁶Trompetayoqkama qanchis angelkunataq tocanankupaq wakichikurqanku.

⁷Ñawpaqkaq angelmi trompetata tocarqan, hinan chikchiqa ninawan yawarwan chhaqrusqa kay pachaman kallpawan chayamurqan, chaymi ruphaykurqan kay pachaq kinsakaq t'aqanta, sach'akunaq kinsakaq t'aqanta, llapa q'achukunaq kinsakaq t'aqantawan.

⁸Iskaykaq angelmi trompetata tocarqan, hinan ninawan rawrashaq hatun orqo hina lamar-qochaman wikch'uykusqa karqan, chaymi lamar-qochaq kinsakaq t'aqanqa yawarman tukurqan.

⁹Hinan lamar-qochapi kawsaq animalkunamanta kinsakaq t'aqan wañurqan, hinallataqmi barcokunamanta kinsakaq t'aqanpas chhallukapurqan.

¹⁰Kinsakaq angelmi trompetata tocarqan, hinan hanaq pachamanta huk hatun ch'aska urmaykamurqan nina k'anchay hina rawrakuspa, hinaspan urmaykamurqan mayukunaq pukyukunaq kinsakaq t'aqanman.

¹¹Chay ch'askaq sutinmi “Ajenjo” nisqa kasqa, hinan llapa unuq kinsakaq t'aqan ajenjo hina hayaman tukupurqan, chaymi askha runakuna chay unuwan wañurarqanku haya kasqanrayku.

¹²Tawakaq angelmi trompetata tocarqan, hinan intiq kinsakaq t'aqan, killaq kinsakaq t'aqan, ch'askakunaq kinsakaq t'aqanpas k'irisqa karqan, chaymi chaykunaq kinsakaq t'aqan tutayapurqan, tutaqpas p'unchaypapas kinsakaq t'aqan mana k'anchayniyoq kapurqan.

¹³Chaymantataq qhawarirqani, hinaspa hanaq pacha chawpinta huk anka phalashaqta rikurqani, paymi kunkayoqta waqyakurqan: ¡Ay, ay, imaynaraqmi, hayk'aynaraqmi kankichis hallp'a pachapi tiyaqkuna! ¡Imanankichismi, chay kinsa angelkunaraqmi trompetankuta tocananku kashan! nispa.