Read DIOSPA QHELQACHISQ Quechua APOCALIPSIS 9 Bible Online

APOCALIPSIS 9 - DIOSPA QHELQACHISQ Quechua bible

APOCALIPSIS 9

¹Phisqakaq angelmi trompetata tocarqan, hinan hanaq pachamanta kay pachaman urmaykamuq ch'askata rikurqani, chay ch'askataq chinkay-chinkay ukhu t'oqoq llaventa chaskirqan.

²Hinaspan chinkay-chinkay t'oqota kicharirqan, hinan chay ukhumanta hatun hornomanta hina q'osñi lloqsimurqan, chay q'osñitaq intitapas wayratapas tutayaykuchirqan.

³Chay q'osñimantataq hallp'a pataman langostakuna lloqsimurqan, chaykunan atiyta chaskirqanku kay pachapi alacrán kurukuna hina k'utukuq kanankupaq.

⁴Chaykunan kamachisqa karqanku pastokunatapas, llapa q'omer kaqkunatapas, lliw sach'akunatapas ama mikhunankupaq, aswanpas Diospa sellonwan mat'inkupi mana marcasqa runakunallata muchuchinankupaq.

⁵Ichaqa manan paykunata wañuchinankupaqchu atiyta chaskirqanku, aswanpas phisqa killa paykunata ñak'arichinallankupaqmi. Chay ñak'arichiyninmi karqan alacrán kuru runata k'utuspa nanachisqan hina.

⁶Chaymi runakunaqa chay p'unchaykunapi wañuyta munanqaku, ichaqa manan imapipas wañuyta tarinqakuchu, wañuytaña munaqtinkupas wañuyqa paykunamanta ayqenqan.

⁷Langostakunaq rikch'ayninmi kasqa awqa-tinkuypaq wakichisqa caballokuna hina, uyankutaq runaq uyan hina, umankupitaq kasqa qori coronaman rikch'akuq.

⁸Chukchankupas kasqa warmiq chukchan hinan, kirunkupas leonpa kirun hinan,

⁹qhasqo unkunkupas fierro unku hinan, raphrankuq sap'aqeynintaq askha caballokunawan awqa-tinkuyman phawaq carretakunaq raqhaqaqaynin hina.

¹⁰Chupankutaq alacrán kuruq chupan hina k'utunayoq kasqa, chupankupitaq atiyninku kasqa, phisqa killantin runakunata ñak'arichinankupaq.

¹¹Chay langostakunaq reyninmi karqan chinkay-chinkay ukhupi kamachikuq ángel, chaypa sutinmi hebreo rimaypi Abadón, griego rimaypitaq Apolión.[5]

¹²Ñawpaqkaq anananaymi pasarqonña, chaywanpas iskay kuti anananayraqmi hamushan.

¹³Soqtakaq angelmi trompetata tocarqan, hinan Diospa ñawpaqenpi kaq qori altarpa tawantin waqranmanta waqyakuyta uyarirqani.

¹⁴Hinan chay waqyakuqqa trompetayoq soqtakaq angelta nirqan: Hatun Eufrates mayupi watasqa kashaq chay tawa angelkunata paskay, nispa.

¹⁵Chaymi tawa angelkunata kacharirqan, llapa runakunamanta kinsakaq t'aqanta wañuchinankupaq. Paykunaqa chay watapaq, chay killapaq, chay p'unchaypaq, chay horapaq wakichisqallañan kasqaku.

¹⁶Caballería soldadokunataq iskay pachak waranqaq waranqan karqan. Ñoqan uyarirqani hayk'achus kasqankuta.

¹⁷Kay hinatan rikhuriypi rikurqani caballokunatapas sillakuqkunatapas: Sillakuqkunan kasqa nina q'ellu color, yana azul umiña color, azufre hina q'ellu color qhasqo unkuyoq. Caballokunaq umanmi leonpa uman hina kasqa, siminkumantataq lloqsimurqan nina, q'osñi, azufrepiwan.

¹⁸Chay manchay kinsa ñak'arichiywanmi, caballokunaq siminmanta lloqsimuq ninawan, q'osñiwan, azufrewan ima runakunamanta kinsakaq t'aqan wañuchisqa karqan.

¹⁹Caballokunaq atiyninqa siminkupin chupankupin kasqa. Chupankuqa mach'aqwaykuna hina umayoqmi karqan, chaykunawanmi k'iriqku.

²⁰Chay manchay ñak'arichiykunawan mana wañuchisqa wakin runakunaqa manapunin mana chanin ruwasqankuta saqepuspa Diosman kutirikurqankuchu, manallataqmi saqerqankuchu supaykuna yupaychayta, qorimanta, qolqemanta, broncemanta, rumimanta, k'ullumanta idolokunata yupaychaytapas. Chay idolokunaqa manan rikunchu, manan purinchu, manan uyarinpaschu.

²¹Manallataqmi saqepurqankuchu runa wañuchiyninkutapas, layqakuyninkutapas, qhelli huchapi puriyninkutapas, suwakuyninkutapas.