Read DIOSPA QHELQACHISQ Quechua 1 SAMUEL 1 Bible Online

1 SAMUEL 1 - DIOSPA QHELQACHISQ Quechua bible

1 SAMUEL 1

¹Efrainpa orqo-orqon Ramá llaqtapin Jerohampa churin Elcanaqa tiyarqan, ñawpa taytankunataq karqan Efraín ayllumanta Eliú, Tohu, Zufpiwan.

²Elcanaqa iskay warmiyoqmi karqan, hukkaqpa sutinmi karqan Ana, payqa mana wachakuqmi karqan. Hukkaqpañataq Penina, payqa wachakuqmi karqan.

³Elcanataq sapa watallapuni Silo llaqtaman wichaq Tukuy-atiyniyoq Señor Diosta yupaychaq, hinallataq sacrificiotapas haywaq. Silo llaqtapitaqmi iskay sacerdotekuna karqan, Elipa churinkuna Ofniwan Fineespiwan.

⁴Sacrificiota haywaspañataq Elcanaqa chay sacrificasqanmanta warmin Pininaman, qhari wawankunamanpas, warmi wawankunamanpas mikhunankupaq qorqan.

⁵Anamanmi ichaqa aswan allinninkaqta qorqan, anchata munakusqanrayku, hinaña Señor Dios wawakunata Anaman mana qorqanchu chaypas.

⁶Chayraykun Peninaqa Anata millayta k'amispa llakichiq, Señor Dios mana wachakuqta ruwasqanrayku.

⁷Watan-watanpas Diospa wasinman rispankun Peninaqa k'amillaqpuni, chaymi Anaqa khuyayta waqaq manataq mikhuqpaschu.

⁸Qosan Elcanataq nirqan: — Ana, mikhuyyá. ¿Imamantataq waqashanki? Chaytaq khayna llakisqari kashanki. ¿Manachu ñoqari chunka wawamantapas astawanraq kani? nispa.

⁹Chaymantataq Anaqa Silopi kashaspa mikhusqankumanta ukyasqankumanta sayarispa, llakisqa sonqontin sinchita waqaykukuspa Señor Diosmanta mañakurqan. Sacerdote Elitaq Dios yupaychana karpa punku hawapi huk tiyanapi tiyasharqan.

¹¹Anaqa Diosman prometekuspan nirqan: — Tukuy-atiyniyoq Señor Diosníy, kay warmi wawaykimanta yuyarikuway, llakikuyniypi amapuni qonqarpariwaychu. Kay warmi kamachiykimanqa huk qhari wawatayá qoykuway, chay qowasqaykitaqa qanllamantaqmi pasaqta qopusqayki, manan chukchantapas rutukunqachu, nispa.

¹²Ahinatan payqa Señor Diospa qayllanpi unayña mañakusharqan, Elitaq Anaq siminta qhawasharqan.

¹³Anaqa sonqon ukhullapin mañakusharqan, mana imata rimaspalla, simillanmi kuyusharqan mana uyarinata, chaymi Eliqa machasqa kananpaq yuyaspa

¹⁴nirqan: — ¿Hayk'aqkamataq machasqa kanki? Machasqaykimanta sanoyamuy, nispa.

¹⁵Hinan Anaqa kutichirqan: — Wiraqocháy, manan ñoqaqa vinowanpas ima machachikuq ukyanawanpas machasqachu kashani, aswanmi llakikuymanta nanasqa sonqoyoq mañaykukushani.

¹⁶Amalla millay warmipaq kay kamachiykita hap'iwaychu, ñoqaqa llakikuyniypi sonqoypa phutikuynintan willaykukusharqani, nispa.

¹⁷Niqtintaq Eliqa: — Israelpa Diosninmi tukuy mañakusqaykita qosunki, thak-kaypi ripuy, nirqan.

¹⁸Chaymi Anaqa nirqan: — Gracias, sumaqta qhawariwasqaykimanta, nispa. Hinaspan payqa kutipuspa mikhurqan, manañataq llakisqañachu karqan.

¹⁹Tutallamanta sayarispankutaq Señor Diosta yupaychaykuspa, Ramapi wasinkuman kutipurqanku. Chay qhepatataq Elcanaqa warmin Anawan puñuykurqan, Señor Diostaq mañakusqanta kutichirqan.

²⁰Chaymi Anaqa wiksallikurqan, killan hunt'akamuqtintaq qhari wawata wachakurqan, chay wawatataq suticharqan Samuelta,[1] payqa nirqanmi: Diosmanta mañakusqay wawan, nispa.

²¹Chaymantan Elcanaqa warmintin wawakunantin Silo llaqtaman wicharqan, Señor Diosman prometekusqanta hunt'ananpaq, sapa wata sacrificiota haywananpaqwan.

²²Anataq ichaqa mana wicharqanchu, payqa qosantan nirqan: — Manan riymanraqchu kay wawata ñuñumanta hanuk'anaykama, chaymantañan Señor Diosman apapusaq, chaypitaq pasaqta qhepakampunqa, nispa.

²³Qosan Elcanataq nirqan: — Allinmi yuyaykusqayki, chhaynata ruway, qhepakuy wawa hanuk'anaykikama, Señor Diostaq hunt'anaykipaq yanapasunki, nispa. Hinan Anaqa wawata uywaspa hanuk'anankama qhepakurqan.

²⁴Wawata hanuk'aspa hinataq, Silo llaqtapi Señor Diospa wasinman Samuelta pusampurqan, huk kinsa watayoq torillota, huk arroba hak'uta, huk p'uyñu vinotawan apamuspa.

²⁵Torillota nak'aspataq, wawata Elipa kasqanman pusampurqanku, hina huch'uyllata.

²⁶Chaymi Anaqa nirqan: — Wiraqocháy, yachanki hinapas, unayñan qanpa qayllaykipi Señor Diosmanta mañakusharqani, chay warmin kashani.

²⁷Kay wawatan Señor Diosmanta mañakurqani, hinan payqa qowarqan.

²⁸Kunantaqmi Señor Diosllamantaq qopunaypaq pusampushani, tukuy kawsasqan p'unchaypin Señor Diosllataña servispa kawsanqa, nispa. Hinan Señor Diosta chaypi yupaychaykurqan.