Read DIOSPA QHELQACHISQ Quechua 1 SAMUEL 11 Bible Online

1 SAMUEL 11 - DIOSPA QHELQACHISQ Quechua bible

1 SAMUEL 11

¹Huk killa hinaña kashaqtinmi, Galaadpi Jabes llaqtata Amón runakunaq reynin Nahasqa muyuykurqan. Chaymi Jabes runakunaqa Nahasta rogakurqanku: — Qankunata servinallaykupaqña rimanakusunchis, nispa.

²Nahastaq kutichirqan: — Arí, rimanakusunmanmi, llapaykichispa paña ñawiykichista horqonayku kaqtinqa, chay hinapin llapa Israel runakunaqa p'enqaypi rikukunqaku, nispa.

³Chaymi Jabes runakunaqa nirqanku: — Suyaykuwaykuraq qanchis p'unchayta llapan Israel llaqtakunaman willaqta kachanaykukama. Manapuniña pillapas yanapaqniyku kaqtinqa, qankunallataña servisqaykiku, nispa.

⁴Willaqkunataq Saulpa tiyasqan Gabaa llaqtaman chayamurqanku, hinaspa willarqanku imachus pasashasqanta, chaymi llaqtallantin llakikuymanta waqayta qallarirqanku.

⁵Chayllamanmi Saulqa torokunata qatiykukuspa chakramanta kutimusharqan, hinaspan nirqan: — ¿Imataq karqon chaytaq llaqtantin runari waqarashan? nispa. Willarqankutaq Jabes runakunaq nisqanta.

⁶Chayta uyariqtintaq Saulman Diospa Espiritun sinchi atiywan uraykamurqan, chaymi payqa pasaqta phiñakurqan.

⁷Hinaspan Saulqa iskay torota nak'aspa kuchurqarispa llapan Israel suyuman aparparichirqan, runakunatataq nichirqan: Llapan mana ñoqata Samueltawan maqanakuyman riysiwaqniykuq torontaqa kay hinatan ñut'usaq, nispa. Chayta rikuspankutaq Israel runakunaqa mancharikurqanku Señor Diospa imatapas paykunata ruwarqonanmanta, hinaspan llapanku ch'ulla runa hinalla puririmurqanku.

⁸Bezec llaqtapi Saulqa runakunata huñuqtintaq, Israel ayllukunamanta kinsa pachak waranqa karqan, Judá ayllumantataq kinsa chunka waranqa runa karqan.

⁹Chaymi Jabes llaqtamanta hamuq willaqkunata nirqanku: — Llaqtaykichis runaman willamuychis: — Paqarinmi chawpi p'unchayta hina librasqa kankichis, nispa. Chayta Jabes runakunaman willaqtinkutaq, paykunaqa kusikurqanku.

¹⁰Hinaspan awqankuman willachimurqanku: Paqarinmi lloqsimusaqku ima munasqaykichista ruwawanaykichispaq, nispa.

¹¹Qhepakaq p'unchaytaq Saulqa kinsaman soldadokunata t'aqarqarispa, chayraq pacha illarimushaqtin maqanakuq phawaykurqanku Amón runakunaq kasqanman. Hinaspan chawpi p'unchaykama wañurachirqanku, wakin mana hap'ichikuqkunataq sapa-sapalla ayqekapurqanku.

¹²Chaymantataq Israel runakunaqa Samuelta nirqan: — ¿Pikunataq nirqan, manan Saulqa rey kanmanchu, nispa? Apamuwayku chay runata wañuchinaykupaq, nispa.

¹³Saulmi ichaqa nirqan: — Manan pipas wañuchinakunqachu kaypiqa, kunan p'unchay Señor Diospa Israel suyuta qespichisqanrayku, nispa.

¹⁴Samueltaq runakunata nirqan: — Hakuchis Gilgal llaqtata, chaypitaq cheqaqpuni reyniyoq kasqanchista sut'inchamusun, nispa.

¹⁵Niqtinmi llapa runakunaqa Gilgalta rirqanku, chaypitaq Señor Diospa qayllanpi Saulta reypaq wakmanta churapurqanku. Hinaspan sumaq kawsay sacrificiota Señor Diosman haywarqanku, Saultaq llapa Israel runakunantin q'ochukurqan.