Read DIOSPA QHELQACHISQ Quechua 1 SAMUEL 13 Bible Online

1 SAMUEL 13 - DIOSPA QHELQACHISQ Quechua bible

1 SAMUEL 13

¹Saulqa takyasqa runaña kashaspan kamachikuyta qallarirqan, iskaykaq watapi kamachikushaspataq,

²Israel runakunamanta kinsa waranqa qharikunata akllakurqan. Chay qharikunamantan iskay waranqa Micmas llaqtapi Betelpa orqo-orqonkunapi Saulwan kasharqanku, waranqataq Jonatanwan Benjamín hallp'a Gabaa llaqtapi. Wakin runakunatañataq wasinkuman kachapurqan.

³Geba llaqtapi kashaq Filistea soldadokunaq wakin t'aqantan Jonatanqa phawaykuspa atiparqan, chaytan wakneqpi kashaq Filistea runakunaqa yacharqanku. Hinan Saulqa hinantin suyupi putututa tocanankupaq kamachispa nirqan: — Llapa Hebreo runakuna uyarichunku, nispa.

⁴Ahinapin llapa Israel runakunaqa kay willakuyta yacharqanku: Saulmi Filistea soldadokunaq wakin t'aqanta phawaykuspa atiparqan, chaymi Filistea runakunaqa Israel runakunata cheqnikurqanku, nisqata. Hinan Israel runakunaqa Saulpiwan Gilgalpi huñuykukurqanku.

⁵Kaqllataq Filistea soldadokunapas huñuykukurqanku Israel soldadokunawan maqanakunankupaq, kinsa chunka waranqa carretakuna, soqta waranqa caballopi soldadokuna, chakipi soldadokunataq qocha pata aqo hina mana yupay atiyraq karqanku. Paykunataq seqaykurqanku Bet-avén[3] llaqtaq inti lloqsimuy ladonpi Micmas llaqtaman, chaypitaq karpakurqanku.

⁶Chaymi awqankuq muyuykusqan kaspanku, Israel runakunaqa lliw ch'usaq pakakuq hatarirqanku, wakin qaqa wasiman, wakintaq qaqa t'oqoman, wakintaq sallaq ñawch'inman, hukkunataq aya p'ampana t'oqokunaman, hukkunañataq ch'aki t'oqokunaman.

⁷Wakin Hebreo runakunataq Jordán mayuta chimparqorqanku Gad hap'iymanwan Galaad hap'iymanwan. Saultaq kaq Gilgal llaqtapi kasharqan, paywan kashaq runakunataq khuyayta khatatatasharqanku.

⁸Saulqa Samuelpa nisqanman hinan qanchis p'unchayña suyasharqan, Samueltaq Gilgal llaqtaman mana hamurqanraqchu. Chaykamataq runakunaqa pisi-pisimanta chinkapusharqan,

⁹chaymi Saulqa nirqan: — Apamullawaychisña chay nak'asqaykichista Señor Diosman sumaq kawsay sacrificiota ruphachina sacrificiotawan haywanaypaq, nispa. Hinaspan ruphachina sacrificiota haywarqan.

¹⁰Chayraq tukukushaqtintaq Samuelqa chayarqamurqan, hinan Saulqa napaykuq tariparqan.

¹¹Samueltaq ichaqa nirqan: — ¿Imatataq ruwashankiri? nispa. Paytaq kutichirqan: — Runakunan chinkakuyta qallarirqan, qantaq nisqayki p'unchayta mana chayamunkichu, Filistea soldadokunataq astawanña Micmas llaqtapi huñuykukusharqan,

¹²chaymi nirqani: Kunallanchá Filistea soldadokunaqa hamurqonqa, manaraqtaq Señor Diosmantaqa yanapawananpaq mañakunipasraqchu, nispa. Chayraykun munay mana munay ñoqallaña ruphachina sacrificiota Señor Diosman haywarqani, nispa.

¹³Niqtinmi Samuelqa nirqan: — Waq'a hinan chayta ruwanki, Diosniyki Señor Diospa kamachisqasuykita mana kasuspayki, kasukullawaqchus karqan chayqa, qanqa mirayniykipiwanraqmi rey kawaqchis karqan.

¹⁴Kunanmi ichaqa, Señor Diosta mana kasukuq kasqaykirayku rey-kayniyki mana unaypaqchu kanqa, Señor Diosqa qanpa rantiykitan huk runata sayachinqa, sonqonman tupaqta Israel llaqtanpa reynin kananpaq, nispa.

¹⁵Hinaspan Samuelqa Gilgal llaqtamanta lloqsispa ripurqan. Wakin qhepaq runataq Saulwan seqaykurqan Gilgalmanta Benjamín hallp'api Gabaa llaqtaman chaypi soldadokunawan tupaq. Saultaq runanta yuparqan, hinan paywan kaqkuna soqta pachak karqan.

¹⁶Saulmi, churin Jonatanpiwan, runakunantin Benjamín hallp'a Geba llaqtapi karpakurqanku, Micmas llaqtapi Filistea soldadokunaq kashanankama.

¹⁷Chaymantataq Filistea soldadokuna kinsa t'aqa lloqsirqanku yanqapacha suwakuq, huk t'aqan Saulpa hallp'anpi Ofra llaqta cheqasman,

¹⁸huk t'aqataq Bet-horón llaqtaman, kinsakaq t'aqañataq Zeboim wayq'o ch'inneq qhawarinaman rirqanku.

¹⁹Llapan Israel hallp'apitaqmi mana karqanchu fierro takaq runa, Filistea runakunataq yuyaykurqanku paykunalla fierro takaq kayta, Hebreo runakunaq espadata lanzatawan mana takakuyta atinankupaq.

²⁰Chaymi Israel runakunaqa Filistea runakunamanraq rinanku karqan toro rejankuta, rawk'anankuta, hachankuta puntachachiq, ichhunankutapas kiruchachiq.

²¹Chhukunata hachatawan puntachaytan cobrakurqanku huk huch'uy qolqeta, rejata rawk'anatawan puntachaytataq iskay huch'uy qolqeta.

²²Chay hinapin, llapan Israel soldadoq mana karqanchu maqanakuy p'unchaypi espadanpas lanzanpas, Saulwan Jonatanllawanmi armayoq karqanku.

²³Filistea soldadokunataq Micmas q'asamanña chayarqosharqanku.