Read DIOSPA QHELQACHISQ Quechua 1 SAMUEL 16 Bible Online

1 SAMUEL 16 - DIOSPA QHELQACHISQ Quechua bible

1 SAMUEL 16

¹Señor Diostaq Samuelta nirqan: — ¿Hayk'aqkamataq waqanki Saulmantari? Ñoqan Israelpi rey kananmanta wikch'upuniña. Phaway, hap'isqayki waqraman aceiteta hunt'achimuy, kachasqaykin Belén llaqtapi Isaipa wasinman. Paypa churinkunamantan hukkaqninta akllakuniña rey kananpaq, nispa.

²Samueltaq nirqan: — ¿Imaynatataq risaqri? Risqayta yacharqospaqa Saulchá wañurqachipuwanqa, nispa. Señor Diostaq nirqan: — Huk malta wakata aysaykukuy, hinaspa ninki, Señor Diosman sacrificio haywaqmi rishani, nispa.

³Sacrificio haywanaykipaqtaq Isaita waqyachinki, chaypin ñoqa nisqayki ima ruwanaykitapas, hinaspa pitachus nisqayta aceitewan hawiykapuwanki rey kananpaq, nispa.

⁴Samueltaq Señor Diospa nisqanta hina ruwarqan. Belén llaqtaman chayaqtintaq kurak runakunaqa sinchi manchasqa taripamurqanku. Hinaspan payta tapuykurqanku: — ¿Kusikuy willakuywanchu hamushanki? nispa.

⁵Paytaq nirqan: — Arí, Señor Diosman sacrificio haywaqmi hamushani. Ch'uyanchakamuychis, hinaspa sacrificio haywana pataman riysiwaychis, nispa. Isaitataq wawakunantinta Samuelqa ch'uyanchaykurqan, hinaspa invitarqan sacrificio haywanaman.

⁶Paykuna chayamuqtinkutaq Samuelqa Eliabta qhawarirqan: Kaytapunichá Señor Diosqa reypaq akllakurqan, nispa.

⁷Señor Diostaq Samuelta nirqan: — Aman qhawankichu rikch'ayninta, hatun kaynintapas, manan paytaqa munanichu. Manan ñoqaqa runa hinachu patallanta qhawani, runallan rikch'aynintaqa qhawan, ñoqan ichaqa sonqonta qhawani, nispa.

⁸Chaymantan Isaiqa Abinadabta waqyaspa Samuelman asuykachirqan. Samueltaq: — Manan kaypaschu Señor Diospa akllakusqanqa, nirqan.

⁹Samuelman chimpamunanpaq waqyallarqantaq Samata, Samueltaq nirqan: — Manan kaypas Señor Diospa akllakusqanchu, nispa.

¹⁰Ahinatakaman Isaiqa qanchisnintin churinkunata Samuelpa qayllanman asuykachirqan, Samueltaq nirqan: — Manan kaykunamanta mayqenpas Señor Diospa akllakusqan kanchu, nispa.

¹¹Chaymi Samuelqa tapuykurqan: — ¿Llapanchu churiykikuna kaypi kashan? nispa. Isaitaq nirqan: — Sullk'akaq churiy kashanraqmi oveja michinapi, nispa. Niqtinmi Samuelqa nirqan: — Usqhaylla waqyachimuy, manan sacrificiota haywasunmanchu chayamunankama, nispa.

¹²Waqyachimuqtintaq churinqa chayamurqan, payqa sumaq rikch'ayniyoq puka uya, munay ñawikunayoqmi karqan. Hinan Señor Diosqa Samuelta nirqan: — Kaymi chay akllakusqay, kunanqa hawiykapuway, nispa.

¹³Chaymi Samuelqa waqrapi aceitewan wawqenkunaq qayllanpi hawiykurqan, chaymantapachan Señor Diospa Espiritun Davidman hunt'aykurqan, Samueltaq Ramá llaqtata kutipurqan.

¹⁴Señor Diospa Espiritunmi Saulmanta t'aqarikapurqanña, hinaspan mana allin espirituta Señor Diosqa kachamurqan Saulta ñak'arichinanpaq.

¹⁵Oficialninkunataq nirqan: — Señor Diospa kachamusqan mana allin espiritun qantaqa ñak'arichishasunki.

¹⁶Chayrayku, reyniyku, ñoqaykuta kachawayku huk arpa tocaqta maskhamunaykupaq, mana allin espíritu ñak'arichishasuqtiyki arpata tocaspa sonqoykita tiyaykachinanpaq, nispa.

¹⁷Paykunatataq Saulqa nirqan: — Phawaychis, allin tocaqta maskhamuwaychis, nispa.

¹⁸Chaymi oficialninmanta huknin nirqan: — Belén llaqtapi Isaipa churinmanta huknin kanmi, arpa tocayta allinta yachaq, sumaq rimakuq, sinchi kallpayoq, maqanakuypaq kusallaña, payqa Señor Diospa yanapasqantaqmi kanpas, nispa.

¹⁹Hinan Saulqa Isaiman kacharqan: Oveja michiq David churiykita kachamuway, nispa niqta.

²⁰Chaymi Isaiqa Saulman kachamurqan churin Davidta, asnopi t'anta cargaykusqata, huk qara p'uyñu vinontinta, huk cabrachantinta ima.

²¹Ahinatan Saulman Davidqa chayarqan, chaypin payqa Saulpa sinchi munasqa kamachin kapurqan, Saultaq arma apaysiqninta churakurqan.

²²Hinaspan Davidpa taytan Isaiman kacharqan: Valekuykin churiykita qopuwanaykipaq, payqa gustawanmi, nispa.

²³Sapa kuti Señor Diospa kachamusqan mana allin espíritu Saulta ñak'arichiqtintaq Davidqa arpanta hoqarispa tocaykuq, chayllan sonqonta tiyaykachikuq, mana allin espiritutaq paymanta t'aqarikuq.