Read DIOSPA QHELQACHISQ Quechua 1 SAMUEL 18 Bible Online

1 SAMUEL 18 - DIOSPA QHELQACHISQ Quechua bible

1 SAMUEL 18

¹Saulwan David rimayta tukurqoqtin hinataq, Jonatanpa sonqonta Davidqa suwarqorqan, chaymi Jonatanqa pay kikinta hina sinchita munakapurqan.

²Saultaq chay p'unchaymantapacha Davidta kamachinpaq qhepachikapurqan, manataq taytanpa wasinta kutipunanta munarqanchu.

³Chaymantan Jonatanwan Davidwan rimanakurqanku wiñaypaq amigontin kanankupaq, Davidta pay kikinta hina munakusqanrayku.

⁴Chaymantapas Jonatanqa capanta huk p'achantawan horqokuspa Davidman qoykurqan, kaqllataq espadanta, p'eqtanta, chumpintawan ima.

⁵Davidqa allintapunin hunt'arqan Saulpa tukuy kamachisqankunata, chaymi Saulqa soldadonkuna kamachiqpaq churaykurqan. Hinaspan lliw soldadokunawan Saulpa oficialninkunawanpas sinchitapuni munachikurqan.

⁶Davidpa Goliat-ta wañuchisqanmanta soldadokuna kutimpushaqtinkun, sapanka llaqtapi warmikuna rey Saultawan chaskiq taripamurqanku kusikuymanta takispa, tususpa, tinyata, platillotawan tocakuspanku.

⁷Warmikunataq tusukuspa takirqanku: — Saulmi waranqa runata wañuchimun, Davidtaq chunka waranqa runata wañuchimun, nispanku.

⁸Chay nisqanwantaq Saulqa pasaqta phiñakuspa nirqan: Ñoqataqa waranqa wañuchiqllataña qhawariwanku, Davidtataq chunka waranqa wañuchiqta. Chay hinaqa, reyllataña aswan churakapunkuman, nispa.

⁹Chaymantapachataq Saulqa millay ñawinwan Davidta qhawaykapurqan.

¹⁰Qhepantin p'unchaytaq Diospa kachasqan mana allin espíritu Saulman qonqay hamurqan. Hinan kamachikunan wasipi waq'a hina karqorqan, chaymi Davidqa wakin p'unchaykuna hina tocayta qallarirqan, Saultaq makinpi lanza hap'iykusqa kasharqan,

¹¹chayllamanmi Davidta perqaman ch'antirqoyta yuyaykurqospa lanzawan chanqarqan, Davidtaq iskay kutipi laq'ochirqan.

¹²Saulqa yachakurqanmi Señor Diosqa paymanta t'aqarikapuspa Davidwanña kashasqanta, chaymi Davidta manchakapurqan.

¹³Chayraykun ladonmanta Davidta hatarichipurqan, hinaspan waranqa soldado kamachiqta churarqan. Hinan soldadokunaq umallin Davidqa maqanakuykunaman rillaqpuni.

¹⁴Paypaqa tukuy ima ruwasqanpas wakillaqpunin, Señor Dios payta yanapasqanrayku.

¹⁵Allinta Davidpa purisqanta rikuspataq, Saulqa aswanta manchakapurqan.

¹⁶Llapa Israel runakunapas Judá runakunapas Davidtan munakurqanku, maqanakuyman rinankupaq kamachiqninku kasqanrayku.

¹⁷Huk p'unchaytaq Saulqa Davidta nirqan: — Kurak ususiy Merabta warmiykipaq qopusqayki, ichaqa ñoqapaqpas Señor Diospa sutinpi maqanakuypipas allin maqanakuq kanaykirayku, nispa. Saulqa yuyaykurqanmi mana pay kikinchu Davidta wañuchiyta, aswanpas Filistea runakunawan sipichiytan munarqan.

¹⁸Davidtaq nirqan: — ¿Pitaq ñoqari kani reypa qataynin kanaypaq? ¿Ima allintaq aylluypas Israel llaqtapi? nispa.

¹⁹Davidman Saúl Merab ususiyta qopusqayki nisqa p'unchay hunt'akuqtintaq, Davidman qonantaqa Mehola llaqtayoq Adrielman ususinta qoykapurqan.

²⁰Chay tukuywanpas Saulpa hukkaq ususin Micalmi Davidta munakurqan, chayta willaqtinkutaq Saulqa kusikurqan.

²¹Saulqa yuyaykurqanmi: Micalta qosqayki, niqtiyqa, ususiyraykuqa paymantakaman Filistea runakunawan sipichikunqa, nispa. Chaymi Davidta wakmanta nirqan: — Kunan ichaqa qatayniypuni kanki, nispa.

²²Chaymanta oficialninkunawan pakayllapi Davidta parlapayachimurqan: Reyqa sinchitapunin munakusunki, kaqllataq oficialninkunapas, chay hinaqa, qataynillanña kapuy, nispanku.

²³Chaymi oficialninkunaqa Davidman willarqanku Saulpa nisqankunata. Davidtaq kutichirqan: — ¿Qankunapaqri hina-hinallachu kanman huk wakcha mana imayoq runapaq reypa qataynin kayqa? nispa.

²⁴Chay nisqantan paykunaqa llapallanta Saulman willamurqanku.

²⁵Chaymi Saulqa yuyaykurqan awqan Filistea runaq makinpi Davidpa wañunantapuni, chaymi nillarqantaq: — Riychis, Davidman nimuychis, manan reyqa munan qolqeta qonku warmi wawayoqman chaytachu, aswanmi payqa munashan pachak Filistea runakunaq qhari-kayninpa qarachankunata awqanmanta vengakunanpaq, nispa.

²⁶Saulpa chay nisqankunata oficialninkuna Davidman willaqtinkutaq, paymanqa allillan rikch'akurqan reypa qataynin kay. Chaymi payqa manaraq tiempo hunt'akamushaqtin,

²⁷soldadonkunata pusaykukuspan iskay pachak Filistea runakunata wañuchimurqanku. Chaykunaq qhari-kayninpa qarachankunatataq aparqamurqan reyman, qataynin kayta munaspa. Saultaq ususin Micalta qoykapurqan.

²⁸Paymi Davidta Señor Dios yanapashasqanta yachaspa, ususin Micalpas munakusqanmantawan,

²⁹manchakapurqan ñawpaqmantaqa aswanta. Saulqa tukuy tiempon Davidpa awqanpuni kapurqan.

³⁰Sapa kuti Filistea umallikuna maqanakuyman lloqsimuqtinkutaq, Davidqa aswan allinpuni lloqsirqan Saulpa wakin oficialninkunamantaqa, chaymi Davidqa tukuypa allin reqsisqanpuni kapurqan.