Read DIOSPA QHELQACHISQ Quechua 1 SAMUEL 27 Bible Online

1 SAMUEL 27 - DIOSPA QHELQACHISQ Quechua bible

1 SAMUEL 27

¹Davidtaq sonqonpi yuyaykurqan: Ima p'unchaychá Saulpa wañuchisqan kasaq, aswan ripusaq Filistea suyuman, chaypi kaqtiyqa Saulpas mana maskhawanqañachu llapan Israel suyu ukhupi. Chay hinapin paymantaqa chinkakapusaq, nispa.

²Chaymi soqta pachak runantin Davidqa ripurqan Gat llaqtata rey Maocpa churin Aquispata.

³Chaypitaq Gat llaqtapi Aquiswan kuska tiyakurqanku, sapankanku wawantin warmintinkama, Davidpas iskaynin warmintin, Jezreel llaqtayoq Ahinoamwan, Carmel llaqtayoq Nabalpa viudan Abigailpiwan.

⁴Saultaq yacharqorqan Gat llaqtaman Davidpa ripusqanta, chaymi manaña paytaqa maskharqanñachu.

⁵Aquistataq Davidqa nirqan: — Allinpaq qhawariwanki chayqa, ama hinachu kay, suyuykipi huk cheqas llaqtata qowayku tiyakunaykupaq, manamá allinchu reypa tiyanan llaqtapi kay kamachiykikunaq tiyanaykuqa, nispa.

⁶Mañakusqanman hinataq Aquisqa Siclag llaqtata tiyanankupaq qorqan, chaymi chay p'unchaymantapacha Siclag llaqtaqa Judá suyuman yupasqa kapurqan.

⁷Davidtaq wata tawa killayoqta Filistea hallp'api tiyarqan.

⁸Siclag llaqtamantataq runakunantin lloqsirqan llat'anaq Gesurpa mirayninta, Gezriq mirayninta, Amalec runakunatawan. Paykunan chay suyu uray ladopi ñawpaqmantapacha tiyakurqanku Shur ch'inneqkama Egipto suyukama.

⁹Chay hallp'akunamanmi phawaykuqku, hinaspan qharitapas warmitapas wañuchimuqkupuni qatiykakamuqkutaq ovejakunata, wakakunata, asnokunata, camellokunatapas, hinallataq aparikamuqku p'achakunatapas. Chaymantataq Aquispa kasqanman kutimuqku.

¹⁰Aquistaq tapuykuyta yachaq: ¿Ima llaqtatan kunan kutiqa llat'anarqamunkichis? nispa. Davidtaq kutichiq: Neguev ch'inneqpi tiyaq Judá runakunatan, nispa, otaq: Neguev ch'inneqpi tiyaq Jerameelpa miraynintan, nispa, otaq: Neguev ch'inneqpi tiyaq Cen runakunatan, nispañataq.

¹¹Davidqa llapallantan qharitapas warmitapas wañuchimuq, paypa imachus ruwasqankunata Gat llaqtaman willakuq mana rinankupaq. Filistea hallp'api tiyashaspan Davidqa tukuy tiempo ahinallatapuni ruwaq.

¹²Aquistaq Davidpa nisqanta cheqaqpaq hap'irqan, chaymi nirqan: — Kayqa kamachiypunin kapunqa, llaqtanpas cheqnikapunñataq chayqa, nispa.