Read DIOSPA QHELQACHISQ Quechua 1 SAMUEL 3 Bible Online

1 SAMUEL 3 - DIOSPA QHELQACHISQ Quechua bible

1 SAMUEL 3

¹Samuel waynaqa Eliwan kuskan Señor Diosta servisharqan. Chay p'unchaykunapin Señor Diosqa runakunaman maynillanpiña rimarqan, manañan rikhuriykunapas kapusharqanñachu.

²Elipa ñawinkunaqa manan rikusharqanñachu machuyaykapusqanrayku. Huk tutan payqa puñunanpi puñusharqan,

³Samuelpas puñushallarqantaq karpa ukhupi Diospa arcan qayllapi, Diospa lamparanpas k'anchashallarqanraq.

⁴Señor Diostaq Samuelta waqyarqan: — ¡Samuel! ¡Samuel! nispa. Paytaq nirqan: — Kaypin kashani, nispa.

⁵Sayarispataq Eliman phawarispa nirqan: — Kaypin kashani, ¿imapaqmi waqyawanki? nispa. Elitaq nirqan: — Manan ñoqaqa waqyaykichu, ripuy puñunaykiman, nispa. Hinan puñuq kutipurqan.

⁶Huktawantaq Señor Diosqa Samuelta waqyamurqan: — ¡Samuel! nispa. Samueltaq sayarispa Eliman rirqan: — Kaypin kashani, ¿imapaqmi waqyawanki? nispa. Paytaq nillarqantaq: — Kutipuy wawáy, manan waqyaykichu, puñukampullay, nispa.

⁷Samuelqa manan Señor Diosta reqsirqanraqchu, manallataqmi Señor Diospas chay p'unchaykama rimapayarqanchu.

⁸Señor Diostaq Samuelta kinsa kutipiña waqyamurqan, paytaq sayarispa Eliman rillarqantaq: — Kaypin kashani, ¿imapaqmi waqyamuwanki? nispa. Hinan Eliqa repararqan Samuelta Señor Dios waqyamushasqanta.

⁹Chaymi Eliqa Samuelta nirqan: — Ripuy, puñukampuy, huktawan waqyamuqtintaq ninki: Uyarishaykin, Señor Diosníy, kay kamachiykiman rimaykamuway, nispa.

¹⁰Señor Diosmi hamuspa chaypi sayaykurqan, hinaspan ñawpaq kuti hina waqyamullarqantaq: — ¡Samuel! ¡Samuel! nispa. Samueltaq nirqan: — Señor Diosníy, rimaykamuway, kamachiykiqa uyarishaykin, nispa.

¹¹Chaymi Señor Diosqa payta nirqan: — Ñoqan Israelpi sinchi musphanata ruwasaq, lliwtaqmi sinchita musphaspa utirayasparaq qhepanqaku.

¹²Chay p'unchaytaqmi llapachallan Elipa ayllun contra nisqaykunata hunt'asaq.

¹³Kunanmi Eliman willanki, ñoqan ayllunta pasaqpaq chinkachipusaq, wawankunaq millay mana chanin ñoqa contra rimasqankumanta. Wawankunaq ruwasqanta yachashaspapas payqa manan wanachirqanchu.

¹⁴Chayraykun niniña: Elipa ayllunpa huchanqa manapunin pampachasqachu kanqa, ofrendataña haywaqtinpas sacrificiotaña qoqtinpas, nispa.

¹⁵Chaymantan Samuelqa puñuykapurqan paqarimunankama, rikch'arispataq Señor Diospa wasin punkuta kicharimurqan. Rikhuriypi uyarisqanta Eliman willaytaqa manchakurqanmi.

¹⁶Elitaq ichaqa Samuelta waqyamurqan: — Hamuy wawáy, nispa. Paytaq: — Kaypin kashani, nirqan.

¹⁷Hinan Eliqa nirqan: — ¿Ima nispan Señor Dios nisunki? Sut'illantapuni willaykuway. Ama pakaykuwaychu ima nisqasuykitapas, pakawankichus chayqa, Diosmi muchuchisunki, nispa.

¹⁸Chaymi Samuelqa llapallanta Señor Diospa nisqanta willarqan. Hinan Eliqa nirqan: — Señor Diosmi payqa, ima munasqanta ruwachun, nispa.

¹⁹Samuelqa wiñasharqanmi, Señor Diospas paywantaq kasharqan, chaymi Samuelpa rimasqanqa hunt'akurqankama.

²⁰Danmanta Beersebakama llapa Israel runakunapas yacharqankun Samuelqa Señor Diospa profetanpuni kasqanta.

²¹Señor Diosqa Silo llaqtapi rikhurishallarqanpunin, chaypin Samuelman rimapayaspa reqsichikurqan.