Read DIOSPA QHELQACHISQ Quechua 1 SAMUEL 7 Bible Online

1 SAMUEL 7 - DIOSPA QHELQACHISQ Quechua bible

1 SAMUEL 7

¹Quiriat-jearim llaqtamanta hamuspankutaq Señor Diospa arcanta apakampuspa Abinadabpa moqo patapi wasinman churapurqanku, chaypin churin Eleazarta ch'uyancharqanku, Señor Diospa arcanta qhawananpaq.

²Quiriat-jearim llaqtapin arcaqa unayta karqan, iskay chunka wata hina. Chay p'unchaykunapin Israel runakunaqa Señor Diosmanta mañakuspa waqapayarqanku.

³Samueltaq Israel runakunaman nirqan: — Tukuy sonqoykichismantachus Señor Diosman kutirikunkichis chayqa, Astarot diosakunata wak rikch'aykunatapas wikch'upuychis, hinaspa sonqoykichista wakichikuychis Señor Diosllataña yupaychanaykichispaq, hinan Señor Diosqa Filistea runakunamanta kacharichisunkichis, nispa.

⁴Chaymi Israel runakunaqa wikch'upurqanku Baal dioskunata Astarte diosakunatapas, hinaspa Señor Diosllataña yupaychapurqanku.

⁵Samueltaq Israel runakunata nirqan: — Mizpa llaqtaman huñukamuychis, Señor Diosmanta qankunapaq mañaykapunaypaq, nispa.

⁶Hinan Mizpa llaqtaman huñuykakamurqanku, unuta wisispataq Señor Diospa sutinpi hich'arqanku. Chay p'unchaymi ayunarqanku, chaypitaq rimarirqanku: Señor Dios contratapunin huchallikurqanchis, nispa. Samueltaq Mizpa llaqtapi Israel runakunata chanincharqan.

⁷Israel runakunaq Mizpapi huñukusqanta yachaspataq, Filistea runakunaqa wichamurqanku paykunawan maqanakuq. Chayta yachaspataq Israel runakunaqa paykunamanta mayta mancharikurqanku,

⁸chaymi Samuelta valekurqanku: — Ama samaykuspa Diosninchis Señor Diosmanta mañapuwayku Filistea runakunamanta amachaykuwanankupaq, nispa.

⁹Samueltaq ñuñuq ovejachata nak'aspa Señor Diospaq sacrificiota ruphachirqan, Israelta amachaykunanpaqtaq mañapurqan, chaymi Señor Diosqa mañakusqanta uyarirqan.

¹⁰Sacrificiota Samuel ruphachishallaqtinraqmi Filistea runakunaqa paykunaman asuykarqamurqanku phawaykunankupaq. Chay ratopachataq Señor Diosqa manchanata hanaq pachamanta kunununuchimurqan paykuna pataman, chaymi paykunaqa mancharikurqanku, chaykamataq Israel runakunaqa pasaqta atiparqanku.

¹¹Hinan Mizpa llaqtamanta phawarqospa, Filistea runakunata qatipaspa wañurachirqanku Bet-car llaqtaq urankamaraq.

¹²Chaymantataq Samuelqa huk rumita hoqarispa Mizpa llaqtawan Sen llaqtawan tupaypi churaykurqan, sutichaykurqantaq “Yanapay Qaqata”: Kaykaman Señor Diosqa yanapaykamuwanchis, nispa.

¹³Chhaynapin Filistea runakunaqa atipasqa karqanku, manañataq Diosqa paykunata Israel suyuman kachaykurqanchu Samuelpa kawsasqan p'unchaykunapi.

¹⁴Filistea runakunaq llapan Israelmanta qechusqanku llaqtakunataq kutichisqa kapurqan Ecrón llaqtamanta Gat llaqtakama, chay hinapin Israel runakunaqa wakmanta qechukapurqanku llapan hallp'ankuta. Hinallataq Israel runakunaqa Amor runakunawanpas sumaqta kawsarqanku.

¹⁵Samuelqa tukuy kawsasqan p'unchaykunapin Israelta kamachirqan.

¹⁶Sapa watataq watukuq rispa muyumuq Betel llaqtata, Gilgal llaqtata, Mizpa llaqtatawan, chaykunapin Israel runakunata kamachimuq.

¹⁷Chaymantataq kutimpuq Ramá llaqtapi wasinman, hinaspan chaypipas kamachillarqantaq. Samuelqa chaypin Señor Diospaq altarta ruwapurqan.