Read DIOSPA QHELQACHISQ Quechua 1 SAMUEL 8 Bible Online

1 SAMUEL 8 - DIOSPA QHELQACHISQ Quechua bible

1 SAMUEL 8

¹Samuelqa machuyaykapuspanmi churinkunata Israel runakuna chaninchaqta churarqan.

²Kurak churinpa sutinmi Joel karqan, sullk'akaqpataq Abías karqan, Beerseba llaqtapin paykunaqa servirqanku.

³Ichaqa manan taytanku hinañachu ruwarqanku, aswanpas qolqe sonqo kaspankun lluk'iykusqata chaskikuqku, chaninchaytapas waqllichiqku.

⁴Chaymi Israel kurak runakunaqa huñuykunakuspa Ramá llaqtaman Samuelwan parlaq rirqanku.

⁵Hinaspan nirqanku: — Qanqa machuñan kapushanki, churiykikunapas manañan qan hinañachu ruwanku, chayrayku reyta churapuwayku, wakin suyukuna hina reyniyoq kanaykupaq, nispa.

⁶“Reyta qowayku” nisqankun ichaqa Samuelmanqa mana allinchu rikch'akurqan, chaymi Señor Diosmanta payqa mañakurqan.

⁷Señor Diostaq Samuelta nirqan: — Uyarillay llaqtaq mañakusqasuykitaqa, manan qantachu pisichasunki, aswanpas ñoqatan pisichawanku, manaña paykunaq reynin kanayta munaspanku.

⁸Egipto suyumanta horqomusqaymantapachan wak dioskunata yupaychaspanku saqerparipuwanku, kaqllataqmi qantapas ñoqata hina pisichasunkiku.

⁹Uyarillay mañakusqankuta, ichaqa anyaykuspa sut'itapuni willay imakunatachus reyqa paykunata ruwanqa chayta, nispa.

¹⁰Hinan Samuelqa rey mañakuqkunaman Señor Diospa nisqanta willarqan:

¹¹— Munasqaykichis reyqa kay hinatan ruwasunkichis: Churiykichiskunatan soldadopaq apanqa, wakintan maqanakuy carretaman churanqa, wakintataq caballopi maqanakuqman, wakintataq carretanpa ñawpaqen phawaqman.

¹²Akllakullanqataq wakinta waranqa soldado kamachiqpaq, wakintataq phisqa chunka kamachiqpaq. Hinallataq chakmaqpaq, wakinta ichhuqpaq, wakintataq maqanakuypaq arma ruwaqpaq, wakintañataq carretaq imankunapas ruwaqpaq churanqa.

¹³Chay hinallataq ususiykichiskunatapas churanqa wayk'uqpaq, t'anta ruwaqpaq, q'apaq hawina wakichiqpaq ima.

¹⁴Uvas chakraykichismantapas, olivos chakraykichismantapas aswan allinnin kaqtan qechusunkichis, chay chakratataqmi oficialninkunaman rakiykunqa.

¹⁵Chakraykichispa ruruntapas uvasniykichistapas chunkamanta huknintan qopunkichis, kamachikuqninkunaman oficialninkunamanwan pagananpaq.

¹⁶Kaqllataqmi runa uywasqaykichiskunawan, allichachaq uywaykichiswan, asnoykichiswanpas ruwananta llank'achikunqa.

¹⁷Uywaykichismantapas chunkamanta huknintan qopunkichis, qankunapas paypa kamachillantaqmi kapunkichis.

¹⁸Chay hinata akllakusqaykichis rey ruwaqtinmi, qankunaqa Diosmanta waqyakuyta qallarinkichis, manañataqmi payqa uyarisunkichischu, nispa.

¹⁹Llapa runakunataq ichaqa Samuelpa nisqanta mana uyariqpas tukurqankuchu, aswanmi nirqanku: — ¡Reyniyoq kaytapunin munayku! nispa.

²⁰Wakin suyukuna hinan ñoqaykupas reyniyoq kasaqku, paymi kamachiwanqaku, maqanakuqpas ñawpaqeykuta lloqsispan maqanakamunqa, nispa.

²¹Samueltaq llaqtaq nisqanta llapallanta Señor Diosman willarqan.

²²Hinan Señor Diosqa nirqan: — Mañakusqankuman hina reyta churay, nispa. Chaymi Samuelqa Israel runakunata nirqan: — Ripuychis llaqtaykichista, nispa.