Read Da'a Kaili MATIUS 10 Bible Online

MATIUS 10 - Da'a Kaili bible

MATIUS 10

¹Yesus nompokio sampulu romba'a anaguruna mpaka ri ja'ina pade niwaina ka ira kuasa mompopalai seta-seta bo kuasa mompakabelo mpengele-ngele ju'a bo kalente nu koro ntau.

²Iwe'imo sanga sampulu romba'a anaguru etu: Pamulana i Simon to nidae i Petrus, pade naria wo'u Andreas tua'i i Petrus, Yakobus ana i Zebedeus bo Yohanes tua'i Yakobus,

³i Filipus bo i Bartolomeus, i Tomas bo i Matius topomperapi balasitee, Yakobus ana Alfeus, i Tadeus,

⁴i Simon to Zelote, pade Yudas Iskariot to mompobalu Yesus ka balina banepia.

⁵Ira sampulu romba'a nipakau Yesus ante tewai-tewai iwe'i: “Ne'e malau mpaka ri ngata-ngata tau-tau da'a to Yahudi bara mpaka ri ngata-ngata nto Samaria.

⁶Kalaumo ruru mpaka ri ja'i ntau to Yahudi, muli Israel to nasimbayu ewa bimba-bimba to natontona.

⁷Kalaumo bo patolele ka ira iwe'i: ‘Namosumo ntoana Alatala moparenta manusia ri dunia e'i ewa magau.’

⁸Pakabelo tau-tau to naju'a, pakatuwu bali tau-tau to namatena, pakabelo tau-tau to naju'a bete, popalai seta-seta to nesua ri ja'i ntau. Kuasa etu niwai bayangi ka komi. Jadi wai wo'u bayangi ka tau ntanina nuapa to niwai ka komi etu.

⁹Ne'e rakeni komi bulawa bara salaka bara doi tambaga riara karepemu.

¹⁰Ne'e rakeni komi batutu rapomboli baku. Ne'e rakeni baju rontonga, bara sapatu atau lembau, sabana topokarajaa masipato rapatuwu tau-tau to nitulungina.

¹¹Ane komi mesua riara kota bara ngata elomo samba'a tau to nabelo rarana mantarima komi rara njapona. Pade peto'omo komi ri ja'ina sampe komi malai mompalasi ngata etu.

¹²Tempo komi mesua rara njapo ntau, ulimo ka pue njapo iwe'i: ‘Perapi Pue mombagane komi.’

¹³Ane nabelo rara pue njapo etu pade ira mantarima komi, nuapa to niperapi komi nggari ja'i Alatala etu kana maroo ri ja'i ira. Tapi ane ira da'a madota mantarima komi, asele mpeganemu etu da'a mawela ira.

¹⁴Ane maria pue njapo bara pue ngata da'a madota mantarima komi atau da'a madota mangepe tesa komi, palaimo komi nggari sapo bara ngata ira pade sapunaimo sowu nggari kada komi ewa tandaina ira kana rasuku Alatala banepia.

¹⁵Aku mpu'u-mpu'u notesa ka komi, ri kaopu nu dunia banepia meliu nggatomo pesuku Alatala ka ira pade pesuku to rapawela ka pue ngata Sodom bo Gomora to naja'a mpu'u pokainggu ira!”

¹⁶“Kitamo! Aku nompakau komi malau ri tatongo tau-tau naja'a nasimbayu ewa bimba-bimba ri tatongo asulako. Jadi komi kana mata'u ewa ule bo monondo ewa tonji banggebodo.

¹⁷Komi kana mainga ri ja'i pura-pura tau sabana komi kana rakeni ratangara ri ngayo ntopotangara. Pade komi kana raboba riara sapo-sapo mpodade.

¹⁸Komi kana rakeni ri ngayo ntopoparenta-topoparenta bo magau-magau sabana komi nomparasaya Aku. Etumo loga nabelo ka komi mompakanoto ka ira bo ka tau-tau da'a to Yahudi isema Aku.

¹⁹Tempo komi rakeni ri ngayo ira ne'e maeka mompekiri nuapa ratesa komi ka ira bara iwenu komi mombasono ira. Sabana ri tempo etu wo'umo kana rawai ka komi tesa-tesa to masipato ratesa komi.

²⁰Tesa-tesa to rauli komi etu da'a tesa nggari pekiri komi mboto, tapi tesa nggari ja'i Nosa Nagasa nu Umamu Pue Alatala. I'amo to mokarajaa riara nta'i komi mompakanoto tesa nuapa to masipato ratesa komi.

²¹Kana marata tempona tau mombawai sampesuwuna mboto rapatesi pade uma mombawai anana mboto rapatesi. Pade ngana-ngana kana mangewa indo uma ira mboto bo mompatesi ira.

²²Komi kana raporau rara ntau pura-pura sabana komi nomparasaya Aku. Tapi isema-sema maroo momparasaya sampe ri kaopuna kana rapakasalama.

²³Ane komi rapandasa ntau ri saongu ngata palaimo mpaka ri ngata ntanina. Aku mpu'u-mpu'u notesa ka komi, da'apa komi malau mompebutu ngata ri tana Israel Aku, Ana nu Manusia kana marata.

²⁴Samba'a anaguru da'a neliu nggari guruna. Samba'a batua da'a neliu nggari madikana.

²⁵Naganamo ane samba'a anaguru mombarasai ewa to nirasai guruna pade samba'a batua mombarasai ewa to nirasai madikana. Ane Aku niuli ntau Beelzebul, Magau nu Seta, neliu-liupa komi to najadi topantuki Aku. Komi wo'u kana rauli sinja'i ira.”

²⁶“Jadi ne'e komi maeka ri ja'i ntau to mangewa komi. Sabana pura-pura pokainggu ira to nitampunisi kana rabonggaraka. Pura-pura to nitabuniaka natantumo rapakanoto.

²⁷Pura-pura to nitesaku ka komi tempo nggawengina kana ratesa komi tempo eona, pade nuapa to niposiwawayo ka komi kana raposilelei komi ka todea nggari bunggu nu ata.

²⁸Ne'e komi maeka ri ja'i ntau to madota mompatesi komi. Da'a ria kuasa ira mombasuku komi riara naraka. Tapi komi kana maeka ri ja'i Alatala to nakuasa mompatesi komi pade mombasuku komi riara naraka sampe ri kasae-saena.

²⁹Natantu ninjani komi tonji rone ane nipobalu olina romba'a saongu rupia. Tapi naupa da'a nadea olina ka manusia da'a ria samba'a tonji rone mamate ane da'a rapodota nu Umamu Pue Alatala.

³⁰Tapi komi neliu nggadeapa olina riara mpanggitana. Nau wulu wo'o komi mboto naopu puramo nibilana.

³¹Jadi ne'e komi maeka, sabana neliu nggasulipa oli komi pade oli tonji rone nadea.

³²Isema-sema mompangaku Aku ri ngayo manusia, Aku wo'u mompangaku i'a ri ngayo Umaku Pue Alatala ri suruga.

³³Tapi isema-sema mombasapu Aku ri ngayo manusia, Aku wo'u mombasapu i'a ri ngayo Umaku ri suruga.”

³⁴“Ne'e rapekiri komi karataku e'i manggeni posinggabelo ri dunia. Da'a nakono! Tapi karataku e'i mompoposinggarau tau.

³⁵Nggari karataku ngana langgai kana mangewa umana mboto, pade ngana besi mangewa indona, pade mania besi mangewa matu'ana besi.

³⁶Pade to najadi bali etumo ira saongu njapo mboto.

³⁷Tau to nompotowe uma bo indona neliupa nggari pompotowena ka Aku da'a masipato rauli topantuki Aku. Pade tau to nompotowe anana neliupa nggari pompotowena ka Aku da'a wo'u masipato rauli topantuki Aku.

³⁸Tau da'a nasadia mantuki Aku ante mpu'u-mpu'u rarana nau sampe mamate rapaku ri kayu parika, i'a da'a masipato rauli topantuki Aku.

³⁹Isema-sema da'a nasadia mamate sabana nantuki Aku, i'a da'a mombarata katuwua mabelo sampe ri kasae-saena. Tapi isema-sema nasadia mamate sabana mantuki Aku, i'amo to mombarata katuwua mabelo sampe ri kasae-saena.

⁴⁰Isema-sema mantarima komi, i'a wo'u mantarima Aku. Pade isema-sema mantarima Aku, i'a wo'u mantarima Pue Alatala to nompakau Aku.

⁴¹Isema-sema mantarima samba'a nabi nu Alatala sabana i'a mpu'u-mpu'u nabi nu Alatala, tau-tau etu kana mombarata tambo nasimbayu ewa to rawai ka nabi nu Alatala etu. Pade isema-sema mantarima samba'a tau nanoa rarana sabana i'a mpu'u-mpu'u tau nanoa, tau-tau etu kana mombarata tambo nasimbayu ewa to rawai ka tau nanoa rarana etu.

⁴²Pade isema-sema mantulungi topantuki Aku, nau aga mombawai saongu sanggiri ue rainu sabana i'a mpu'u-mpu'u topantuki Aku, natantumo tau-tau etu kana mombarata tambona banepia!”