Read Da'a Kaili MATIUS 11 Bible Online

MATIUS 11 - Da'a Kaili bible

MATIUS 11

¹Sangga naopupa Yesus nompatuduki sampulu romba'a anaguruna iwetu nalaimo I'a nggari setu ala mompatuduki tau pade mompatolele Kareba Belo riara ngata-ngata ri bagia etu.

²Tempo etu Yohanes Topediu naria riara tarunggu. Nggari setu i'a nangepe lele nantesa pura-pura nuapa to nipowia Kristus. Jadi i'a nompakau bara sakuya mba'a anaguruna malau mompekutana Yesus.

³Niulina ka ira, “Pekutanamo ka I'a iwe'i: ‘Komi e'imo Magau to Mompakasalama to nijanji Alatala, bara damariapa ntanina to rapopea kami?’ ”

⁴Sangga nangepe pompekutana etu nesonomo Yesus ka ira, “Panjilimo komi mpaka ri ja'i Yohanes pade uli ka i'a pura-pura nuapa to niepe pade nikita komi ri se'i.

⁵Tau naburo namala nekita, tau napunggu namala nolumako, tau naju'a bete nipakabelo bali, tau nabongo namala neepe, tau namate nipakatuwu bali, pade Kareba Belo nggari ja'i Alatala nipatolele ka tau napakasi.

⁶Nabelo ntotomo tau to da'a nokanggaura nomparasaya Aku.”

⁷Sangga nanjilipa anaguru-anaguru to nipakau Yohanes etu, nompamulamo Yesus notesa ka tau dea ewa katuwu Yohanes Topediu. Niulina, “Nuapa patuju komi nalau ranggarawana bopia? Aga manggita wio niburu mpoiri gusa'a guse'i? Natantu da'a iwetu.

⁸Jadi nuapa patuju komi malau gusetu? Ala manggita samba'a tau nopakea nagaya? Natantu da'a wo'u, sabana tau nopakea iwetu aga neto'o ri sapo magau.

⁹Jadi nuapa patuju komi malau gusetu? Ala manggita samba'a nabi? Nakono! Toramo! Yohanes neliu nggari nabi-nabi ntanina,

¹⁰sabana i'amo to nitesa riara Buku Nagasa iwe'i: ‘Kitamo! Aku mompakau batuaku mokolu nggari ja'imu, ala i'a mompakasadia jala ka Komi.’ ” [24]

¹¹Nanguli wo'umo Yesus, “Aku mpu'u-mpu'u notesa ka komi, riara dunia e'i da'apa naria neumba samba'a to neliu nggalanga katuwuna nggari Yohanes Topediu. Tapi tau to neliu nggaede katuwuna riara Poparenta nu Alatala i'amo to neliu nggalanga katuwuna nggari ja'i Yohanes.

¹²Nggari pamula nu pokarajaa Yohanes Topediu sampe we'i-we'i todea nu Alatala niewa ntau to madota mombakuasai ira. [25]

¹³Nompamula nggari nabi-nabi nggaolu sampe Yohanes we'i-we'i pura-pura nabi bo tesa-tesa riara buku i Musa nombaboto tempo e'i.

¹⁴Pade ane komi madota momparasaya tesa-tesa etu, Yohanes e'i nabi Elia to niboto mamimo nggaolu karatana.

¹⁵Isema-sema naria talingana, epemo mpakabelo-belo tesaku e'i!

¹⁶Aku motesa mompakanoto ka komi inggu tau-tau tempo we'i-we'i. Ira nasimbayu ewa ngana-ngana nekatoko ri potomu to nggari sampeto'ona nompongare roana to santanina iwe'i:

¹⁷‘Kami nantawui sasuli ala mompakadamba rara komi, tapi komi da'a ria nadamba. Kami nodade nasusa tapi komi da'a ria notumangi.’

¹⁸Iwetu wo'u inggu ntau ri ja'i Yohanes bo Aku. Tempo Yohanes etu narata i'a napuasa pade da'a nanginu anggur, pade ira aga nanguli i'a nipesua nu seta!

¹⁹We'i-we'i Aku, Ana nu Manusia narata. Aku nanggoni bo nanginu, tapi ira nanguli, ‘Kitamo tau e'i! I'a samba'a tau nadoko bo nalangu to nowega ka tau topomperapi balasitee bo tau-tau nasilaka!’ Tapi naupa iwetu, ane tau mantarima noto nggari ja'i Alatala kana manoto rakita aselena riara nggatuwu ira.”

²⁰Naopu etu nompamulamo Yesus nangontiaka pue ngata to da'a najea nggari silaka ira naupa nadea mpu'u kabaraka nikawia Yesus ri ngata ira.

²¹Niulina, “Umba komi, pue ngata Khorazim! Mandasa mpu'umo komi banepia! Pade mandasa mpu'umo komi to neto'o ri ngata Betsaida! Sabana ane rapana kabaraka-kabaraka to nikawiaku ri ngata komi etu kukawia ri ngata Tirus bo Sidon, natantu nasaemo ira tau-tau da'a to Yahudi kana majea nggari silaka ira. Nasaemo ira kana mopakea karu pade mombadika sowu ri balengga ira ewa tandaina nanjoso raramo ira mompekiri powia ira to naja'ana.

²²Tapi kuuli ka komi, tempo Pue Alatala mombatangara manusia banepia, pesuku komi meliu nggatomo nggari pesuku to rapawela ka pue ngata Tirus bo Sidon.

²³Pade komi pue ngata Kapernaum, komi nompekiri bara komi etu raore sampe ri suruga! Tapi etu da'a ntoto nakono! Komi kana ratajiaka riara naraka! Sabana ane rapana kabaraka-kabaraka to nikawiaku ri ngata komi kukawia ri ngata Sodom to naja'a mpu'u, natantumo ngata etu da'a naropu, tapi batena naria sampe we'i-we'i.

²⁴Tapi kuuli ka komi, tempo Pue Alatala mombatangara manusia banepia pesuku komi meliu nggatomo nggari pesuku to rapawela ka pue ngata Sodom!”

²⁵Tempona etu nosambayamo Yesus. Niulina, “Uma, Pue nu langi bo dunia, Aku mosukuru ri ja'imu sabana pura-pura etu nitabuniakamu nggari ja'i tau-tau to naria pangginjanina ante tau-tau to napandena. Tapi etu nipopokitamu ka tau-tau to naede katuwuna,

²⁶sabana etumo to nipodamba raramu, Uma.”

²⁷Naopu etu nanguli wo'umo Yesus, “Mpengele-ngele niwai Umaku ka Aku. To mpu'u-mpu'u nosinjani ante Aku, Ana nu Alatala aga Umaku Pue Alatala. Da'a ria tau ntanina. Pade to mpu'u-mpu'u nosinjani ante Umaku aga Aku, Anana bo isema-sema kupodota mompopanjani I'a ka ira.

²⁸Kamaimo ri ja'iku, komi pura-pura to nalengemo bo to nanggeni ntomo. Aku mboto manggabasaka panggenimu.

²⁹Tukimo parentaku pade pegurumo ri ja'iku, pade komi kana masana raramu. Sabana Aku nalusu bo naede raraku.

³⁰Parenta-parentaku da'a nakaja ratuki, pade panggeni to kuwai ka komi nanga'a.”