Read Da'a Kaili MATIUS 12 Bible Online

MATIUS 12 - Da'a Kaili bible

MATIUS 12

¹Tempo etu Yesus ante anaguruna noliu ri tinalu gando ri Eo Mpenonto. Tempo ira noliu ri setu nompamulamo anaguru Yesus nompui wua gando sakedi pade nionta sabana naoromo ta'i ira.

²Nanggita powia ira etu nangulimo bara sakuya mba'a tau to Parisi ri setu ka Yesus, “Kitamo! Anagurumu nombaliunaka Atura-atura agamata ante nowia anu nitagi ri Eo Mpenonto!”

³Tapi nesonomo Yesus ka ira, “Iwenumo? Da'apa nibasa komi tesa riara Buku Nagasa ewa powia i Daud nggaolu tempona i'a ante roa-roana naoro ta'i?

⁴I'a nesua riara Sapo Alatala pade nikonina roti to nipesomba ka Alatala ri setu. Tapi kakonona nantuki Atura-atura agamata roti etu aga mamala rakoni topanggeni-topanggeni agama. Da'a masipato rakoni Daud ante roa-roana.

⁵Bara da'apa wo'u nibasa komi to nitulisi riara Atura-atura agama. Ri Eo Mpenonto topanggeni-topanggeni agama nokarajaa riara Sapo Mpepue tapi ira da'a nireke nasala.

⁶Toramo mpakabelo-belo nuapa kuuli ka komi e'i. Ri se'i naria samba'a to neliu nggapoko nggari Sapo Alatala.

⁷Naria tesa nitulisi riara Buku Nagasa iwe'i: ‘To nipodotaku ala komi maasi mata manggita roamu. Da'a nipodotaku binata-binata rakeni rasambale ka Aku.’ [26] Ane komi mpu'u-mpu'u nangginjani patuju tesa etu natantumo komi da'a nombasalaraka tau-tau to da'a nasala.

⁸Sabana Aku, Ana nu Manusiamo to nakuasa ri Eo Mpenonto.”

⁹Naopu etu nalaumo Yesus nompalasi peto'o etu pade nesuamo I'a riara saongu sapo mpodade nto Yahudi.

¹⁰Ri setu naria samba'a tau namate palena sabingga. Naria bara sakuya mba'a tau ri setu madota mangelo sala Yesus ala mompangadu I'a. Etu sampe ira nompekutana I'a, “Nantuki Atura-atura agamata masipato kita mompakabelo tau naju'a tempo Eo Mpenonto bara da'a?”

¹¹Nesonomo Yesus ka ira, “Ane rapana maria samba'a ri tatongo komi to naria bimbana nanawu ralowu nandala tempo Eo Mpenonto nuapa rakawiana? Natantumo i'a kana malau mombasoreaka bimbana etu nggariara lowu nandala etu!

¹²Tapi samba'a manusia neliu nggadea olina nggari saongu bimba. Jadi ane iwetu, masipato kita mantulungi tau ri Eo Mpenonto!”

¹³Naopu etu nangulimo Yesus ka tau to namate palena sabingga etu, “Ojomo palemu!” Tau etu nangojo palena, pade kaliu-liu nabelo balimo palena nasimbayu ewa palena to sabinggana.

¹⁴Tapi tau-tau to Parisi ri setu nompalasi sapo mpodade etu pade nolibu mangelo jala mompatesi Yesus.

¹⁵Yesus nangginjani patuju ja'a tau-tau to Parisi etu. Jadi nalaumo I'a nggari setu mpaka ri peto'o ntanina. Nadea tau nantuki I'a pade I'a nompakabelo pura-pura tau to naju'ana.

¹⁶Pade nitagina ira ne'e motesa ka tau ntanina isema I'a.

¹⁷Ante iwetu nadupamo Tesa nu Alatala to niboto nabi Yesaya nggaolu iwe'i:

¹⁸“I'a e'imo Batuaku to nipelisiku. I'amo to nipotoweku bo nipodamba raraku. Nosa Nagasa kuwai ka I'a, pade I'a mompatolele ka pura-pura tau da'a to Yahudi parenta-parentaku nanoa.

¹⁹I'a da'a mosinggarau, pade I'a da'a wo'u mongare-ngare. Suarana da'a wo'u raepe ntau ri jala jama.

²⁰Wolo naringgolu da'a rapakakotona, pade sumbu mpoindo jelana aga nakampido da'a rapopayana. I'a bate-batena mokarajaa sampe parenta to nanoana etu ranjani manusia.

²¹Pade pura-pura manusia kana manjarumaka I'a.” [27]

²²Naopu etu naria samba'a tau nikeni mpaka ri ja'i Yesus to naburo bo nabobo sabana i'a nipesua seta. Pade Yesus nompakabelo tau etu sampe i'a namala notesa pade nekita bali.

²³Nanggita kajadia etu nogumaa mpu'umo tau dea ri setu sampe nosimpekutana ira samba'a bo samba'a, “Bara I'a e'imo Magau to Mompakasalama, Muli i Daud to nijanji Alatala nggaolu.”

²⁴Tapi tempo tau-tau to Parisi nangepe tesa ntau dea etu nesonomo ira, “A, tau e'i kuasana nggari ja'i Beelzebul, Magau nu Seta. Etu sampe I'a namala nompopalai seta-seta.”

²⁵Tapi ninjani Yesusmo pompekiri ira. Etu sampe niulina ka ira, “Ane rapana maria samba'a magau pade todea riara poparentana etu aga natibagi-bagi bo nosipobali, natantumo poparentana etu kana magero. Pade ane tau-tau ri saongu ngata bara ri saongu njapo aga natibagi-bagi bo nosipobali, natantumo ira kana magaro mosimpotatare.

²⁶Iwetu wo'u ane Magau nu Seta mompopalai roana seta-seta ntanina, batuana seta-seta aga natibagi-bagi bo nosipobali. Ane iwetu natantumo poparenta Magau nu Seta etu da'a maroo, aga magero wa'amo.

²⁷Niuli komi Aku nompopalai seta ante kuasa Beelzebul, Magau nu Seta. Tapi ane iwetu uli ka Aku ante kuasa isema roa-roa komi nompopalai seta-seta? Natantumo ante kuasa nggari ja'i Alatala! Jadi powia roamu mboto nompakanoto pombarata komi etu nasala!

²⁸Tapi Aku nompopalai seta-seta ante kuasa nggari ja'i Nosa Nagasa nu Alatala. Pade etu nompopokita ka komi Pue Alatala nompamulamo noparenta ri tatongo komi.

²⁹Iwenu tau mamala mesua riara njapo ntau to naroso ala mangala mbara-mbarana? Natantumo i'a nokolu mombabaga mantipunggu pue njapo to naroso etu. Pade naopu etu mamalamo i'a mangala mbara-mbarana etu. [28]

³⁰Isema-sema da'a nosanggani ante Aku, i'amo baliku. Isema-sema da'a nantulungi Aku, i'a etu nombagero panggawiaku.

³¹Jadi kuuli ka komi, mpengele-ngele silaka bo tesa nanguli sinja'i namala raampungi. Tapi ane tau manguli sinja'i Nosa Nagasa nu Alatala i'a da'a ntoto mamala raampungi.

³²Isema-sema motesa mangewa Aku, Ana nu Manusia mamala raampungi. Tapi isema-sema motesa mangewa Nosa Nagasa nu Alatala, da'a ntoto mamala raampungi, nabeloka we'i-we'i, nabeloka tempo banepiana.

³³Ane kayu to nabelona, nabelo wo'u wuana. Ane kayu da'a nabelo, da'a wo'u nabelo wuana. Sabana nggari wua kayu etu, ninjani komi kayu etu nabelo.

³⁴Komi tanu tau-tau topebagiu ewa ule! Da'a ntoto namala komi notesa to nabelona sabana naja'a mpu'u raramu! Sabana nuapa to nitesa ntau aga nantuki nuapa to naria riara nta'ina.

³⁵Tau nabelo rarana nombatesa to nabelona, sabana to niboli riara nta'ina nabelo puramo. Pade tau naja'a rarana nombatesa to naja'ana, sabana to niboli riara nta'ina aga kaja'ana.

³⁶Jadi toramo! Ri Eo Mpotangara banepiana pura-pura tau kana mombatanggu butu-butu tesa naja'a to nitesana.

³⁷Sabana tesamu mboto rapake mompakanoto ane komi masala bara da'a.”

³⁸Naopu etu nangulimo bara sakuya mba'a guru agama bo tau to Parisi ka Yesus, “Guru, kami madota manggita Komi mowia tandai to nipogumaa.”

³⁹Tapi nesonomo Yesus ka ira, “Naja'a mpu'umo komi pura-pura! Komi da'a natutu natundu ri ja'i Alatala! Komi nerapi Aku mowia saongu tandai to nipogumaa. Tapi da'a ntoto kukawia etu ka komi! Tandai to rapopokita ka komi aga tandai ewa to najadi ri ja'i nabi Yunus nggaolu.

⁴⁰Nasimbayu ewa nabi Yunus naria riara nta'i bau bete tolumbengi tolueo kasaena, iwetu wo'u Aku, Ana nu Manusia kana maria riara dayo tolumbengi tolueo kasaena.

⁴¹Ri Eo Mpotangara banepia pue ngata Niniwe kana rapakatuwu bali mpasanggani-nggani ante komi to natuwu we'i-we'i. Pade ira kana mompakasala komi, sabana ira najeamo nggari silaka ira tempo ira nangepe tesa nabi Yunus ka ira. Tapi we'i-we'i naria ri tatongo komi samba'a to neliu nggakuasa nggari nabi Yunus, tapi komi da'a madota mantarima tesana.

⁴²Wa'a wo'u ri Eo Mpotangara magau besi nggari sabingga puluna kana rapakatuwu bali mpasanggani-nggani ante komi. Pade i'a kana mompakasala komi, sabana i'a narata nggari ngata to nakawao mpu'u ala mangepe pepatuduki Magau Salomo. Tapi we'i-we'i naria ri tatongo komi ri se'i samba'a to neliu nggakuasa nggari Magau Salomo, tapi komi da'a madota mantarima tesana.”

⁴³“Tempo seta nesuwu nompalasi samba'a tau i'a nalau ranggarawa baina nangelo peto'o rapangosarakana, tapi da'a niratana.

⁴⁴Sabana etu i'a nanguli, ‘Aginapa aku matingguli mpaka ri sapo to nipalasiku ria.’ Sangga nanjilipa i'a niratanamo peto'o etu naboa, da'a ria topeto'o, pade sapo etu naopu nipegasa bo nipakasiayumo.

⁴⁵Pade seta etu nalau nompokio pitumba'a roana to neliu nggaja'a nggari i'a mboto. Pade naratamo ira nesua ri ja'i ntau etu pade naroo ri setu. Kaopuna katuwu ntau etu neliu mpu'umo kaja'ana nggari pamulana bopia. Iwetu wo'u to majadi ri ja'i tau-tau naja'a tempo we'i-we'i.”

⁴⁶Tempo Yesus danotesa-tesa ka tau dea etu, naratamo indona bo sampesuwu-sampesuwuna. Ira nenggore ri sawalikuna madota motesa ka I'a.

⁴⁷Pade naria samba'a tau nalau nanguli ka Yesus, “Uma, naria indomu bo sampesuwu-sampesuwumu ri sawalikuna. Ira madota motesa ka Komi.”

⁴⁸Nesonomo Yesus ka tau to notesa ka I'a etu, “Isemamo indoku bo isema sampesuwu-sampesuwuku?”

⁴⁹Nitujurakana anaguru-anaguruna pade niulina, “E'i puramo indoku bo sampesuwuku.

⁵⁰Sabana isema-sema nompowia dota Umaku ri suruga, ira etumo indoku bo sampesuwuku.”